កម្មករ៦នាក់ក្នុងចំណោម៦៧នាក់ដែលរបួសដោយសារក្រឡាប់ឡានស្ថិតក្នុងសភាពធ្ងន់ធ្ងរ
2016.10.28
កសិករនៅខេត្តកណ្ដាល លោក ស្រី ហៀង ជាឪពុកកម្មករដែលរងរបួសក្នុងគ្រោះថ្នាក់ចរាចរណ៍ ផ្ដល់បទសម្ភាសន៍ដល់អាស៊ីសេរី នៅមុខមន្ទីរពេទ្យកាល់ម៉ែត កាលពីថ្ងៃទី២៧ ខែតុលា ឆ្នាំ២០១៦។
RFA/Phann Yasy
ពលកររោងចក្រកាត់ដេរ យូ.ឌី.អេស (U.D.S) ចំនួន ៦៧នាក់ ត្រូវបានបញ្ជូនទៅព្យាបាលរបួសនៅមន្ទីរពេទ្យកាល់ម៉ែត បន្ទាប់ពីឡានដែលពួកគេជិះទៅធ្វើការជាងរៀងរាល់ថ្ងៃក្រឡាប់កាលពីព្រឹកថ្ងៃព្រហស្បតិ៍ ទី២៧ ខែតុលា នៅឃុំឫស្សីជ្រោយ ស្រុកមុខកំពូល ខេត្តកណ្ដាល។
ព័ត៌មានពីមន្ទីរពេទ្យកាល់ម៉ែត ឲ្យដឹងថា មកដល់រសៀលថ្ងៃព្រហស្បតិ៍ ទី២៧ ខែតុលា មនុស្ស ៦នាក់ក្នុងចំណោម ៦៧នាក់ ដែលរងរបួស កំពុងស្ថិតក្នុងសភាពធ្ងន់ធ្ងរដែលត្រូវការវះកាត់សង្គ្រោះបន្ទាន់។
ប្រធានផ្នែកបច្ចេកទេសនៃមន្ទីរពេទ្យកាល់ម៉ែត លោកសាស្ត្រាចារ្យ កុយ វ៉ាន់នី បន្ថែមពីលើនេះទៀតថា អ្នករបួសចំនួន ៦១នាក់ទៀត ទោះបីជាមិនមានរបួសធ្ងន់ គ្រូពេទ្យកំពុងបន្តតាមដានថា តើអាការៈនឹងអាចប្រែប្រួលទៅជាយ៉ាងណា។
កម្មករកាត់ដេរទាំង ៦៧នាក់នេះ គឺជាជនរងគ្រោះនៃគ្រោះថ្នាក់ចរាចរណ៍មួយនៅលើបណ្ដោយផ្លូវជាតិលេខ៦ សង្កាត់ព្រែកលៀប ខណ្ឌឫស្សីកែវ។ រថយន្តដឹកពលករកាត់ដេររបស់រោងចក្រ យូ.ឌី.អេស បានក្រឡាប់ចាក់អ្នកដំណើររបស់ខ្លួនទៅលើថ្នល់។
ពលករកាត់ដេរលោកស្រី អ៊ឹម សុលីម ជាមួយនឹងបងប្អូនរបស់លោកស្រី ៣រូបទៀតជាអ្នកធ្វើដំណើរលើរថយន្តនោះ។ ខុសពីបងប្អូនលោកស្រីដែលកំពុងសម្រាកព្យាបាលរបួសលោកស្រី សុលីម មិនបានរងរបួសអ្វីទាំងអស់ក្រៅពីការតក់ស្លុតក្នុងអារម្មណ៍ និងការព្រួយបារម្ភទៅស្ថានភាពរបស់បងប្អូន។
លោកស្រីឯកភាពពណ៌នាពីទិដ្ឋភាពនៅពេលក្រឡាប់ឡាននោះមកអាស៊ីសេរី៖ «កាលដំបូង (មួយ) ឡានតែ ៦០នាក់ជាងទេ តែកន្លះខែក្រោយនេះមានអ្នកធ្វើតេសថែម អ៊ីចឹងគេកៅអី ៣ ចេញឲ្យឈរវិញ។ អ្នកឈរមានជាង ៣០នាក់។ ពេលក្រឡាប់ឡានអូសជាង ២០ម៉ែត្រ។ ពេលឡានអូសហ្នឹងហើយដែលមានរលាត់ដៃរលាត់ជើងរលាត់មុខ។ ណាមួយមានបែកកញ្ចក់។ កញ្ចក់ជួងមុខតែម្ដង។ អ្នកនៅលើហែកតង់ចេញ។ ពេលចេញរួច ជួយហែកតង់គ្នាយកអ្នកសន្លប់ និងអ្នករបួសចេញយកទៅដាក់កៀនៗថ្នល់»។
កសិករមួយរូបនៅខេត្តកណ្ដាល លោក ស្រី ហៀង អាយុ ៧៣ឆ្នាំ ធ្វើដំណើរមកមន្ទីរពេទ្យកាល់ម៉ែត ទាំងស្លៀកក្រមា បន្ទាប់ពីទទួលដំណឹងថា កូនស្រីរបស់លោកតាបានជួបគ្រោះថ្នាក់ចរាចរណ៍ ហើយកំពុងសម្រាកព្យាបាលនៅមន្ទីរពេទ្យ។ លោកគឺជាអាណាព្យាបាលមួយរូបក្នុងចំណោមអាណាព្យាបាលជាច្រើនដែលមកអង្គុយត្រៀបត្រានៅក្បែរអគារព្យាបាលរង់ចាំស្ដាប់ដំណឹងពីជនរងគ្រោះ៖ «អារម្មណ៍ហ្នឹងគឺញាប់ញ័ររន្ធត់ បារម្ភពីកូន។ មកនេះគ្មានលុយគ្មានកាក់អ្វីទេ គឺមកតែខ្លួនទេ។ ព្រលឹងមកកូនអស់ហើយ»។
មន្ត្រីស្នងការនគរបាលក្រុងភ្នំពេញ លោក សំ សាលីន ឲ្យដឹងថា មកដល់រសៀលថ្ងៃទី២៧ ខែតុលា នេះ លោកមិនទាន់បានទទួលបញ្ជាពីថ្នាក់លើទេថា នឹងមានចំណាត់ការយ៉ាងណាទៅលើតៃកុងឡាន និងក្រុមហ៊ុន យូ.ឌី.អេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
