គណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញា ហៅថ្នាក់ដឹកនាំសហជីពធំៗចំនួន៦ អោយទៅប្រជុំបន្ទាន់នៅថ្ងៃសុក្រ ទី២៧ ខែធ្នូ ពីរឿងតវ៉ាប្រឆាំងនឹងការដំឡើងប្រាក់ខែ។
គណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញា បានចេញលិខិតអញ្ជើញ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរ លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ លោកស្រី ម៉ម ញឹម ប្រធានសម្ព័ន្ធសហជីពជាតិនៃឧស្សាហកម្មវាយនភ័ណ្ឌកាត់ដេរកម្ពុជា និងលោកស្រី យ៉ាង សោភ័ណ្ឌ ប្រធានសហព័ន្ធសហជីពកម្ពុជា ទៅប្រជុំនៅក្រសួងការងារ ជាបន្ទាន់ ក្រោមការដឹកនាំរបស់ លោក អ៊ុំ មាន រដ្ឋលេខាធិការក្រសួងការងារ។
កាលពីថ្ងៃទី២៥ ខែធ្នូ ក្រសួងការងារ បានបញ្ជាឲ្យសហជីពទាំងអស់ដែលប្រឆាំងទៅនឹងការសម្រេចដំឡើងប្រាក់ខែកម្មកររបស់គណៈកម្មការប្រឹក្សាការងារ និងកំពុងបំពុលបរិយាកាស អោយបញ្ឈប់បន្ទាន់នូវការបំផុសកម្មករឲ្យធ្វើបាតុកម្ម។
អគ្គលេខាធិការគណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញា លោក ប្រាក់ ចាន់ធឿន នៅថ្ងៃទី២៦ ខែធ្នូ បានព្រមានចាត់វិធានការតាមផ្លូវច្បាប់ ចំពោះមន្ត្រីសហជីព និងថ្នាក់ដឹកនាំគណបក្សនយោបាយខ្លះ ដែលរឹងទទឹងបំផុសឲ្យកម្មករធ្វើបាតុកម្ម។
«សំឡេង»
លោក ប្រាក់ ចាន់ធឿន បន្តថា មានកម្មករជាង ៥០០រោងចក្រនៅទូទាំងប្រទេស នៅបន្តការងារធម្មតា ខណៈដែលកម្មករជិត ១០០រោងចក្រ បានរួមធ្វើបាតុកម្មជាមួយគណបក្សប្រឆាំង ហើយគណបក្សមួយនេះកំពុងកេងចំណេញនយោបាយពីកម្មករ។ លោកទទួលស្គាល់ថា សង្វាក់ផលិតកម្មនៅរោងចក្រខ្លះកំពុងកកស្ទះ ហើយថៅកែរោងចក្រអាចនឹងដកខ្លួនទៅវិនិយោគនៅប្រទេសផ្សេង។
«សំឡេង»
ក្រុមសហជីពហាក់ធ្វើផ្គើនទៅនឹងការកោះហៅចរចារឿងប្រឆាំងនឹងការដំឡើងប្រាក់ខែ ដោយបានសរសេរលិខិតមួយទៅ លោក វ៉ាន់ ស៊ូអៀង ប្រធានសមាគមរោងចក្រកាត់ដេរកម្ពុជា បញ្ជាក់ពីជំហរបន្តធ្វើបាតុកម្មចាប់ពីដើមខែមករា តទៅឲ្យទាល់តែបានជោគជ័យនៅតាមបណ្ដាក្រុមហ៊ុន និងការដង្ហែក្បួនជាសាធារណៈ ដើម្បីទាមទារឲ្យមានការដំឡើងប្រាក់ឈ្នួលយ៉ាងតិច ១៦០ដុល្លារនៅឆ្នាំ២០១៤។
ក្រុមប្រឹក្សាការងារដែលមានភាគីថៅកែរោងចក្រ រដ្ឋាភិបាល និងសហជីព បានសម្រេចដំឡើងប្រាក់ខែគោលឲ្យកម្មករពី ៨០ ដល់ ៩៥ដុល្លារ ចាប់ពីខែមេសា ឆ្នាំ២០១៤។ នៅឆ្នាំបន្តបន្ទាប់ទៀត នឹងត្រូវដំឡើង ១៥ដុល្លារទៀត រហូតដល់ឆ្នាំ២០១៨ ទើបប្រាក់ខែកម្មកររោងចក្រឡើងដល់ ១៦០ដុល្លារ។ ការសម្រេចផ្តល់ប្រាក់ខែជាដំណាក់ៗនេះ ត្រូវបានពន្យល់ថា ដើម្បីពង្រឹងជីវភាពកម្មករ និងរក្សានិរន្តរភាពវិស័យកាត់ដេរ និងស្បែកជើងនៅកម្ពុជា។ ក្រុមប្រឹក្សាការងារបញ្ជាក់ថា ការសម្រេចនោះធ្វើឡើងត្រឹមត្រូវតាមច្បាប់ ហើយបើអង្គការសហជីពណាប្រឆាំងជំទាស់ គឺប្រឆាំងនឹងច្បាប់។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បដិសេធទទួលការសម្រេចនោះ។ លោកបានប្រៀបធៀបការសន្ទុះបាតុកម្មរបស់កម្មករនៅពេលនេះ ហាក់ដូចជាការបាក់ទំនប់ដែលមិនអាចទប់បាន ដើម្បីទាមទារការដំឡើងប្រាក់ខែក្នុងកម្រិតសមរម្យ។
«សំឡេង»
ការសិក្សាជាច្រើនរកឃើញថា មូលហេតុប្រាក់ខែតិចធ្វើឲ្យកម្មករមិនអាចរស់នៅបាន នៅពេលដែលតម្លៃស្បៀងអាហារកាន់តែកើនខ្ពស់។ កម្មករជាង ៧០% មានភាពស្គមស្គាំង និងស្លេកស្លាំង ដែលជាកត្តាមួយធ្វើឲ្យកម្មករសន្លប់កំឡុងពេលបំពេញការងារ។
អ្នកវិភាគសេដ្ឋកិច្ច ធ្លាប់អះអាងថា ការដំឡើងប្រាក់ខែគោលឲ្យកម្មករ គឺអាចធ្វើបានលើសពី ១០០ដុល្លារក្នុងមួយខែ។ ការអះអាងនេះ បន្ទាប់ពីអ្នកសេដ្ឋកិច្ចរកឃើញថា ថៅកែរោងចក្រកាត់ដេរទាំងអស់ក្នុងមួយឆ្នាំនៅសល់ប្រាក់ជាង ២ពាន់លានដុល្លារ ទុកសម្រាប់ចំណាយលើកម្រៃផ្សេងៗទាក់ទងនឹងការគ្រប់គ្រង ការចំណាយប្រតិបត្តិការ និងផលចំណេញ។ ក្រោយពីផាត់ការចំណាយលើថ្លៃប្រាក់ខែកម្មករ ៣០០លានដុល្លារ និងថ្លៃនាំចូលវត្ថុធាតុដើមសម្រាប់ផលិតចំនួន ១.៧០០លានដុល្លារ។
មន្ត្រីជាន់ខ្ពស់នៃសមាគមរោងចក្រកាត់ដេរកម្ពុជា លោក ជាតិ ខេមរា មានប្រសាសន៍ថា ក្រុមហ៊ុនមិនអាចដំឡើងប្រាក់ខែឲ្យកម្មករឲ្យបានច្រើនភ្លាមៗក្នុងរយៈពេលខ្លីបានទេ ព្រោះអាចប៉ះពាល់ដល់និរន្តរភាពនៃការវិនិយោគ។
«សំឡេង»
មន្ត្រីជាន់ខ្ពស់នៃសមាគមរោងចក្ររូបនេះក៏បានព្រមានថា អ្នកវិនិយោគខ្លះអាចនឹងដកខ្លួនចេញទៅរកស៊ីនៅប្រទេសវៀតណាម និងប្រទេសឡាវ វិញ ប្រសិនបើកម្មករនៅតែបង្កឲ្យមានវិបត្តិដែលធ្វើឲ្យរាំងស្ទះដល់សង្វាក់ផលិតកម្ម ដែលនាំឲ្យគ្មានការបញ្ជាទិញទំនិញពីកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។