ពលករខ្មែរ ៧នាក់ស្លាប់ និង១៤នាក់របួសនៅប្រទេសថៃ ដោយសារសំណង់អគារមួយបាក់សង្កត់លើក្នុងពេលពួកគេកំពុងបំពេញការងារ។ នៅថ្ងៃទី២៧ កុម្ភៈ មន្ត្រីស្ថានទូតខ្មែរប្រចាំក្រុងបាងកក បានអមដំណើរក្រុមគ្រួសារជនរងគ្រោះ ដើម្បីទទួលសពពលករទាំងនោះមកកម្ពុជាវិញ ខណៈពលករខ្មែរដែលរងរបួសនៅព្យាបាលនៅមន្ទីរពេទ្យថៃ បន្តទៅទៀត។
អ្នកនាំពាក្យក្រសួងការបរទេសកម្ពុជា លោក កុយ គួង ឲ្យដឹងនៅថ្ងៃទី២៧ កុម្ភៈ ថា កម្មករដែលស្លាប់នៅពេលនោះមានចំនួនសរុប ១០នាក់ ក្នុងនោះមានកម្មករខ្មែរចំនួន ៧នាក់ ប្រុស៤ ស្រី៣ និង ១៤នាក់ទៀតរងរបួស ក្នុងនោះមានប្រុស ៩ និងស្រី ៥នាក់។
លោកថា ឧបទ្ទវហេតុនេះកើតឡើងក្នុងការដ្ឋានសង់មន្ទីរពេទ្យថៃមួយ កាលពីថ្ងៃទី២៥ កុម្ភៈ ស្ថិតក្នុងខេត្តសមុទ្រប្រាខាន់ (Samut Prakharn) ប្រទេសថៃ (Thailand)៖ «ហេតុការណ៍នេះកើតនៅឯមន្ទីរពេទ្យមួយដែលអគារហ្នឹងគេសាងសង់បន្ថែម។ កើតវេលាថ្ងៃត្រង់ គឺពលករខ្មែរយើងមាការសម្រាកទទួលទានអាហារ ខ្លះទទួលទានអាហារ ហើយមានការសម្រាកអ៊ីចឹងទៅ ស្រាប់តែពិតាននោះវាធ្លាក់។ ពេលដែលស្លាប់នោះ គឺស្លាប់ពលករសរុប ១០នាក់។ ប៉ុន្តែក្នុងនោះមានខ្មែរយើង ៧នាក់ ហើយរបួស ១៤នាក់ខ្មែរយើងទាំងអស់ មានប្រុស៩ ស្រីចំនួន ៥នាក់»។
លោកបន្តថា នៅពេលនេះក្រុមហ៊ុនសំណង់ថៃ ដែលទទួលខុសត្រូវសាងសង់មន្ទីរពេទ្យថៃ នោះ បានផ្ដល់ប្រាក់ឧបត្ថម្ភគ្រួសារសពខ្មែរជាបឋមក្នុងមួយគ្រួសារចំនួន ២០.០០០បាត ស្មើប្រមាណជាង ២លានរៀល ដើម្បីធ្វើសោហ៊ុយជាបណ្ដោះអាសន្ន សម្រាប់ដឹកជញ្ជូនសពមកស្រុកខ្មែរ។ រីឯកម្មកររងរបួសនៅបន្តព្យាបាលនៅមន្ទីរពេទ្យប្រទេសថៃ បន្តទៅទៀតសិន។
លោក កុយ គួង៖ «ថ្ងៃនេះគឺថាមន្ត្រីស្ថានទូតយើងអមដំណើរជាមួយគ្រួសារសពដើម្បីនាំយកសាកសពមកប្រទេសខ្មែរយើងវិញនៅថ្ងៃហ្នឹង នៅថ្ងៃទី២៧ (កុម្ភៈ) យើងហ្នឹង។ ហើយខ្ញុំសុំបញ្ជាក់ដែរថា យើងមិនចាំបាច់មានការប្ដឹងផ្ដល់អីទេ ព្រោះអានេះគេហៅថា គ្រោះថ្នាក់ការងារ យើងដោះស្រាយទៅតាមផ្លូវច្បាប់ប៉ុណ្ណោះឯង។ ដូច្នេះ ស្ថានទូតយើងកំពុងធ្វើការមមាញឹកជាមួយនឹងអាជ្ញាធរថៃ ពាក់ព័ន្ធ ក៏ដូចជាមួយក្រុមហ៊ុនហ្នឹង ដើម្បីទាមទារសំណងទៅតាមច្បាប់»។
ទាក់ទងការបាក់អគាររបស់នេះដែរ កាសែតថៃ បាងកក ប៉ុស្តិ៍ (Bangkok Post) ចុះផ្សាយថា កម្មករ ដែលស្លាប់និងរបួសនោះ គឺដោយសារធ្នឹមបេតុងមួយយ៉ាងធំនៅជាន់ទីមួយបាក់កិនលើ នៅពេលកម្មករកំពុងបាយថៃត្រង់។
កាសែតបន្តថា សំណង់ថ្មីនេះសង់តភ្ជាប់អគារមន្ទីរពេទ្យចាស់ឈ្មោះថា មន្ទីរពេទ្យ រ៉ាម៉ាធិបឌី (Ramathibodi) ដែលគុណភាពនៃការសាងសង់នេះមិនរឹងមាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។