ព្រះសង្ឃមួយអង្គសុគត និងមនុស្ស ៧នាក់បានស្លាប់ និងរបួសជាង ៣០នាក់ក្នុងគ្រោះថ្នាក់ចរាចរណ៍កាលពីរសៀលថ្ងៃទី២៣ ខែមេសា រវាងរថយន្តក្រុងនិងឡានស្ទូចនៅភូមិបឹងព្រីង ឃុំព្រៃតូច ស្រុកមោងឬស្សី ខេត្តបាត់ដំបង។
អធិការនគរបាលស្រុកមោងឬស្សី លោក គិត ហ៊ាង មានប្រសាសន៍ថា រថយន្តក្រុងក្រុមហ៊ុន ភី.អេស (PS) ដឹកអ្នកដំណើរពីភ្នំពេញ ទៅទីក្រុងប៉ោយប៉ែត បានបុកឡានស្ទូចក្នុងដំណើរបញ្ច្រាសទិសគ្នា។ លោកសន្និដ្ឋានថា គ្រោះថ្នាក់ចរាចរណ៍នេះ ដោយសារការធ្វើប្រហែសរបស់អ្នកបើកឡានក្រុង៖ «យើងមើលទៅកន្លែងគ្រោះថ្នាក់ឃើញឡានក្រុងរំលោភខាងស្ដាំគេ ព្រោះឃើញមានស្នាមអូសកង់ ហើយបុកគ្នាចំពីមុខពេញទំហឹង ធ្វើឲ្យរួញឡានក្រុងតែម្ដង»។
លោកបន្តថា អ្នកបើកឡានស្ទូចស្លាប់ម្នាក់ និងរបួសធ្ងន់ម្នាក់។ ចំណែកឯឡានក្រុង សុគតព្រះសង្ឃមួយអង្គ និងស្លាប់ ៦នាក់ ហើយរបួសធ្ងន់ និងស្រាលចំនួន ៣១នាក់។ សមត្ថកិច្ចបានបញ្ជូនអ្នករងរបួសទៅសង្គ្រោះបន្ទាន់នៅមន្ទីរបង្អែកខេត្តបាត់ដំបង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។