ក្រសួងប្រៃសណីយ៍ និងទូរគមនាគមន៍ បានចេញសេចក្តីប្រកាសព័ត៌មានមួយនៅថ្ងៃទី១៨ ខែធ្នូ ស្ដីពីលទ្ធផលនៃកិច្ចប្រជុំមួយកាលពីថ្ងៃទី១៣ ខែធ្នូ របស់បណ្ដាប្រតិបត្តិករទូរស័ព្ទទាំង ៩ក្រុមហ៊ុន ដោយប្រតិបត្តិទូរស័ព្ទទាំងអស់បានឯកភាពគោរព និងអនុវត្តការសម្រេចរបស់រាជរដ្ឋាភិបាល ពាក់ព័ន្ធនឹងការកំណត់ថ្លៃសេវាទូរស័ព្ទចល័ត អចល័ត និងថ្លៃតភ្ជាប់បណ្ដាញ ព្រមទាំងយកចិត្តទុកដាក់ខ្លាំងលើបញ្ហាគុណភាពសេវា ចៀសវាងការប្រកួតប្រជែងគ្នាតាមសង្គ្រាមតម្លៃដែលប៉ះពាល់ដល់គុណភាពសេវាកម្ម។
កិច្ចប្រជុំនោះ បណ្ដាប្រតិបត្តិករទូរស័ព្ទទាំងអស់ គ្រោងរៀបចំបង្កើតនូវសមាគមទូរគមនាគមន៍មួយ (Telecom Association) ដើម្បីជាប្រយោជន៍ជជែក និងដោះស្រាយវិវាទ និងធ្វើឲ្យមានតម្លាភាពរវាងគ្នា សម្រាប់ជជែកពិភាក្សាជាមួយបញ្ញត្តិករ ឬអ្នករៀបចំឲ្យអនុវត្តបទបញ្ជាសេវាទូរគមនាគមន៍ និងរាជរដ្ឋាភិបាលជាដើម។
កិច្ចប្រជុំរវាងប្រតិបត្តិករទូរស័ព្ទនេះ ធ្វើឡើងបន្ទាប់ពីទីស្ដីការគណៈរដ្ឋមន្ត្រី បានចេញសេចក្តីជូនដំណឹង ឬ ស.ជ.ណ បញ្ជាឲ្យក្រុមហ៊ុនទូរស័ព្ទចល័តទាំងអស់មិនត្រូវផ្តល់លុយបន្ថែមដែលបណ្ដាលឲ្យអត្រាហៅចេញក្នុងប្រព័ន្ធតិចជាង ៤,៥សេនដុល្លារក្នុងមួយនាទី និងត្រូវអនុវត្តតាមតម្លៃកំណត់ពីសារាចរអន្តរក្រសួង កាលពីឆ្នាំ២០០៩ រវាងក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច។
មន្ត្រីបញ្ញត្តិករមួយរូបធ្លាប់ប្រាប់ថា ក្រុមហ៊ុន ស្មាត (Smart) មិនបានអនុវត្តតាមសារាចរអន្តរក្រសួងលេខ២៣២ រវាងក្រសួងប្រៃសណីយ៍ និងក្រសួងសេដ្ឋកិច្ច កាលពីឆ្នាំ២០០៩ ដោយផ្តល់សេវាហៅចេញចូលទូរស័ព្ទក្នុងតម្លៃទាបជាងតម្លៃដើម ដើម្បីប្រជែងទីផ្សារយកអតិថិជន ដែលយុទ្ធសាស្ត្រនេះធ្វើឲ្យប៉ះពាល់ដល់ការប្រកួតប្រជែងដោយស្មោះត្រង់ និងធ្វើឲ្យប៉ះពាល់ដល់ការប្រមូលពន្ធលើវិស័យមួយនេះ។ ភ្លាមៗ ក្រុមហ៊ុន ស្មាត បានផ្លាស់ប្ដូរកម្មវិធីសេវាកម្មរបស់ខ្លួនឲ្យស្របទៅនឹងការសម្រេចរបស់រដ្ឋាភិបាល។
លិខិតរបស់ក្រសួងប្រៃសណីយ៍ ក៏បានរំលឹកថា ការបន្ទាបតម្លៃដែលក្រុមហ៊ុនខ្លះទម្លាក់មកស្ទើរស្មើសូន្យនោះ គឺជាការបង្ខូចតម្លៃ ដែលផ្ទុយពីបទប្បញ្ញត្តិនៃអង្គការពាណិជ្ជកម្មពិភពលោក ដែលកម្ពុជា ជាសមាជិកក្នុងការធានាការប្រកួតប្រជែងដោយសេរី និងស្មោះត្រង់ចំពោះអ្នកវិនិយោគ។ ការប្រជែងមិនស្មោះត្រង់ ធ្វើឲ្យក្រុមហ៊ុនមួយចំនួនដួលរលំ និងត្រូវបានបញ្ចូលជាមួយក្រុមហ៊ុនដទៃ ដែលនាំឲ្យប៉ះពាល់ដល់ស្ថិរភាពនៃវិស័យ និងជំនឿទុកចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។