បុរសម្នាក់បានរងរបួស និងត្រាក់ទ័រមួយគ្រឿងខូចខាត ដោយសារផ្ទុះមីនតោនដែលកប់ក្រោមដីមួយគ្រាប់។ ហេតុការណ៍គ្រោះថ្នាក់នេះ កើតឡើងកាលពីព្រឹកថ្ងៃទី២១ ខែកុម្ភៈ នៅលើដីចម្ការឋិតនៅចំណុចអូរជ្រៅ ភូមិថ្នល់កែង ឃុំអូរអណ្ដូង ស្រុកសាលាក្រៅ ខេត្តប៉ៃលិន។
ជនរងគ្រោះមានឈ្មោះ ជុំ សុខនី អាយុ ២៦ឆ្នាំ ថ្លែងថា រូបលោកជាអ្នកស៊ីឈ្នួលភ្ជួរដីចម្ការឲ្យគេ។ កន្លែងដែលមានគ្រាប់មីនតោននោះ ជាដីចម្ការចាស់ មានគេភ្ជួររាស់ដាំដំណាំច្រើនឆ្នាំមកហើយ ប៉ុន្តែមិនបណ្ដាលឲ្យគ្រាប់មីននោះផ្ទុះទេ ស្រាប់តែពេលចុះទៅភ្ជួរឲ្យគេ ក៏ជួបគ្រោះថ្នាក់តែម្ដង៖ «ខ្ញុំទៅភ្ជួរដីឲ្យគេ ទើបភ្ជួរបានពីរទៅបីគន្លង ស្រាប់តែគ្រាន់មីននោះផ្ទុះនៅជាប់ជើងដំបូក។ កន្លែងហ្នឹងបើកត្រាក់ទ័រកិនពីរទៅបីដង ហើយទៅម្ដងទៀតទម្លាក់ផាលប៉ះចំ ផ្ទុះខូចផាល និងបែកកង់ក្រោយទាំងពីរ។ រូបខ្ញុំរបួសត្រូវដៃ និងអំបែងត្រូវក។ ខ្ញុំស៊ីឈ្នួលភ្ជួរដីឲ្យគេ ប៉ុន្តែដីហ្នឹងគេភ្ជួរច្រើនឆ្នាំមកហើយ»។
ជនរងគ្រោះឈ្មោះ ជុំ សុខនី បន្ទាប់ពីមានគ្រោះថ្នាក់ដោយសារគ្រាប់មីន ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យបង្អែក ស្រុកសាលាក្រៅ បន្ទាប់មកត្រូវបានក្រុមគ្រួសារបញ្ជូនបន្តមកដេកសម្រាកព្យាបាលនៅមន្ទីរពេទ្យឯកជនមួយ នៅក្នុងខេត្តបាត់ដំបង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។