ប្រធានរដ្ឋបាលជលផល លោក ណៅ ធួក ថ្លែងនៅថ្ងៃទី២២ ខែសីហា ឆ្នាំ២០១៣ ថា មន្ត្រីក្រោមឱវាទបានចុះបង្ក្រាបបទល្មើសនេសាទច្រើនខេត្ត បានចំនួន ៣៦០ករណី ក្នុងរដូវបិទនេសាទ។
លោកបន្តថា ករណីបទល្មើសនេសាទឆ្នាំ២០១៣ បានថយចុះច្រើនជាងឆ្នាំកន្លងទៅ។ លោកថា បទល្មើសនេសាទដែលបង្ក្រាបបានច្រើន គឺជាតំបន់នៅជាប់នឹងបឹងទន្លេសាប ទន្លេមេគង្គ និងទន្លេចតុមុខ៖ «៣៦០ករណីហើយនៅពោធិ៍សាត់ បាត់ដំបង សៀមរាប កំពង់ធំ កំពង់ឆ្នាំង កំពង់ចាម ព្រៃវែង កណ្ដាល ក្រចេះ ស្ទឹងត្រែង ក្នុងគ្រប់កន្លែង»។
ទោះបីជាប្រធានរដ្ឋបាលជលផលអះអាងថា បានបង្ក្រាបបទល្មើសនេសាទជាង ៣០០ករណីក្តី អាជ្ញាធរ និងប្រជាពលរដ្ឋនៅក្នុងស្រុកកោះធំ ខេត្តកណ្ដាល ថ្លែងថា ឧបករណ៍នេសាទខុសច្បាប់ដូចជា លូស្បៃមុង ឬហៅថា សៃយឺន បង្កើនការដាក់ចាប់យកកូនត្រីតូចៗទើបញាស់នៅក្នុងភូមិព្រែកសឹង្ហ រហូតដល់ភូមិព្រែកស្បូវ ក្នុងឃុំសំពៅពូន បំផ្លាញធនធានត្រីក្នុងចម្ងាយដីពី ៤គីឡូម៉ែត្រ ទៅ ៥គីឡូម៉ែត្រ។
ពលរដ្ឋភូមិព្រែកសឹង្ហ លោក យាន យឿង អះអាងថា ជនជាតិវៀតណាម ជាអ្នកប្រើសៃយឺនដាក់បាំងទឹកទន្លេបំផ្លាញធនធានត្រីនៅក្នុងឃុំសំពៅពូន៖ «ដាក់ទ្រង់ទ្រាយធំបែបនេះ មិនមែនខ្មែរអ្នកដាក់ទេ សុទ្ធតែជនជាតិយួន តែម្តងមកដាក់ហ្នឹង។ ប៉ិនដាក់ទ្រង់ទ្រាយធំជាចំហមុខនេះ មិនមែនខ្មែរទេ ហើយកន្លែងជលផលទីតាំងគាត់នៅមុខភូមិព្រែកសឹង្ហ ហ្នឹងតែម្តង។ គាត់គ្រាន់តែចុះមកតាមបណ្តោយព្រែកចេញមក គាត់ឃើញតែម្តងបទល្មើសទាំងអស់ហ្នឹង តែគាត់អត់បានឃើញផងហ្នឹង មិនដឹងគាត់នៅសម្ងំធ្វើអី បើចាំដាក់ទីតាំងក្បែរ បើថាឆ្ងាយដូចនៅភ្នំពេញ ដូចនៅចតុមុខអី ដូចថាឆ្ងាយ មិនអាចធ្វើការងារហ្នឹងឃើញ។ ចុះបើនៅគ្រាន់តែផ្អៀងខ្លួន គ្រាន់តែបង្វិលខ្លួន ឃើញហើយគាត់អត់ឃើញ មិនដឹងជារបៀបម៉េចដែរ គួរឲ្យឆ្ងល់ដែរ»។
មន្ត្រីរាជការក្នុងឃុំសំពៅពូន លោក ចាន់ ថន ថ្លែងថា មានមន្ត្រីជលផលកំពុងប្រចាំការនៅក្នុងតំបន់ដែលជនជាតិវៀតណាម ប្រើឧបករណ៍សៃយឺន ដាក់បាំងទឹកចាប់យកត្រីតូច និងត្រីធំនោះ។ ប៉ុន្តែ មន្ត្រីជលផលទាំងនោះធ្វើមិនឃើញអំពើល្មើសច្បាប់នេសាទនេះទេ។ លោកចោទថា ទំនងជាបានទទួលសំណូកពីជនជាតិវៀតណាម នោះហើយ។ លោកថា កាលពីឆ្នាំកន្លងទៅ ប្រជាពលរដ្ឋក្នុងឃុំសំពៅពូន បានប្រមូលគ្នាចុះចាប់យកឧបករណ៍នេសាទខុសច្បាប់ឈ្មោះសៃយឺន នោះ បានច្រើនរយម៉ែត្រ ប៉ុន្តែប្រឈមនឹងការគំរាមពីអ្នកកាន់អាវុធកាងឲ្យឈ្មួញវៀតណាម៖ «គឺនៅតែភូមិព្រែកសឹង្ហ ហ្នឹង គឺសៃយឺន ហ្នឹង ដាក់តាំងពីចុងព្រែក រហូតមកដល់ដើមភូមិ ហើយចម្ងាយតាំងពីចុងព្រែកមក វារាប់គីឡូប្រហែលជា ៤ ទៅ ៥គីឡូម៉ែត្រ។ អីចឹង គឺអត់អាចមានត្រីណាមួយដែលថានៅសល់ តាំងពីកូនត្រីទើបញាស់អី ក៏អស់រលីងដែរ»។
ជំទប់ទី២ ឃុំសំពៅពូន ស្រុកកោះធំ ខេត្តកណ្ដាល លោក កៃ ច្រាយ ថ្លែងថា អាជ្ញាធរបានឃើញ និងបានទទួលពាក្យបណ្ដឹងបទល្មើសនេសាទនោះ ប៉ុន្តែអាជ្ញាធរឃុំសំពៅពូន មិនមានសមត្ថភាពចុះបង្ក្រាបអំពើល្មើសច្បាប់នេសាទនេះទេ៖ «អាហ្នឹងតាមការពិតជនជាតិខ្មែរ អ្នកនៅពីក្រោយខ្នង ព្រោះអាហ្នឹងជនជាតិយួន វាមកដាក់សៃយឺន នៅកន្លែងហ្នឹង»។
ប្រធានរដ្ឋបាលជលផល លោក ណៅ ធួក ឲ្យដឹងថា ផលត្រីនឹងកើននៅឆ្នាំ២០១៣ ប្រសិនបើទឹកទន្លេឡើងខ្លាំងជាងបច្ចុប្បន្ន។ លោកបន្តថា ក្នុងឆ្នាំ២០១៣ រដ្ឋបាលជលផលដាំកូនឈើ ព្រៃលិចទឹក បានប្រមាណ ៦០ហិកតារ នៅខេត្តកំពង់ឆ្នាំង ពោធិ៍សាត់ និងខេត្តបាត់ដំបង ហើយក៏មានមន្ត្រី និងអាជ្ញាធរដែនដីកំពុងការពារព្រៃនោះ កុំឲ្យមានអ្នកកាប់បំផ្លាញ។ ចំពោះដើមកោងកាង វិញ ដាំនៅក្នុងទឹកសមុទ្របានជាង ៣០ហិកតារ ដាំនៅខេត្តកំពត និងខេត្តកោះកុង ដើម្បីធ្វើជាជម្រកដល់ធនធានសមុទ្រ។ លោកឲ្យដឹងទៀតថា ការជួយបូមខ្សាច់នៅមុខកោះពេជ្រ បានជួយឲ្យជម្រៅទឹកទន្លេមានជម្រៅជ្រៅ ដោយបំបាត់ដីកកពីមុន ដែលបាំងលំហូរនៃទឹកទន្លេចូលទៅបឹងទន្លេសាប ហើយក៏ងាយស្រួលដល់បានបន្លាស់ទីរបស់ត្រី ដែលបានបន្តពូជហែលចូលបឹងទន្លេសាប វិញកាន់តែច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។