គ្រូពេទ្យប្រចាំនៅមណ្ឌលសុខភាពអង្គតាស្រែ ស្រុករមាសហែក ខេត្តស្វាយរៀង បានរៀបរាប់ឲ្យដឹងថា ប្រធានមន្ទីរសុខាភិបាលខេត្តបានផ្ទេរឈ្មោះពេទ្យឆ្មបចំនួន ៤រូប ចេញពីមន្ទីរពេទ្យបង្អែកខេត្តស្វាយរៀង ក្នុងនោះគ្រូពេទ្យចំនួន ៣រូប ត្រូវបានផ្ទេរឲ្យទៅប្រចាំការនៅមណ្ឌលសុខភាពអង្គតាស្រែ មណ្ឌលសុខភាពម្រាម និងមណ្ឌលសុខភាពត្រពាំងផ្ដៅ ក្នុងស្រុករមាសហែក ខេត្តស្វាយរៀង។ មណ្ឌលសុខភាពទាំងនោះ ស្ថិតនៅតំបន់ដាច់ស្រយាលពីទីប្រជុំជន ពុំសូវមានប្រជាពលរដ្ឋរស់នៅឡើយ។ ដោយឡែក គ្រូពេទ្យម្នាក់ទៀតត្រូវបានប្រធានមន្ទីរផ្ទេរឈ្មោះ ឲ្យទៅប្រចាំការនៅមណ្ឌលសុខភាពមួយកន្លែងក្នុងក្រុងស្វាយរៀង។
អ្នកគ្រូពេទ្យនៅមណ្ឌលសុខភាពអង្គតាស្រែ ម្នាក់ ដែលទើបតែបានផ្ទេរចេញពីមន្ទីរពេទ្យបង្អែកខេត្តស្វាយរៀង កញ្ញា ចាន់ សាមុត ឲ្យដឹងនៅថ្ងៃទី២ វិច្ឆិកា ថា គ្រូពេទ្យដែលពុំត្រូវបានគេផ្ទេរឈ្មោះឲ្យទៅប្រចាំការនៅមណ្ឌលសុខភាពទីដាច់ស្រយាលនោះ ព្រោះគេមានខ្សែធំ។ គ្រូពេទ្យដដែលបន្តថា ខ្លួនធ្លាប់បានទៅបកស្រាយពន្យល់ និងអង្វរប្រធានមន្ទីរសុខាភិបាល ពីផលលំបាកជុំវិញបញ្ហាការផ្លាស់ឲ្យទៅប្រចាំការនៅទីដាច់ស្រយាលនេះដែរ។ ប៉ុន្តែ ប្រធានមន្ទីរនៅតែធ្វើព្រងើយ ពុំព្រមស្ដាប់ហេតុផលការបកស្រាយពន្យល់នោះឡើយ។
កញ្ញា ចាន់ សាមុត៖ «ចេះតែទទូចឲ្យចង់ទៅហ្នឹងហើយ ដល់ពេលខ្ញុំវែកញែកច្រើនអ៊ីចឹងថា ហេតុអីបានជាមានអ្នកថ្មីអីចូលអ៊ីចឹង ហើយខ្ញុំនៅច្រើនខែច្រើនឆ្នាំហើយ ម៉េចក៏ខ្ញុំមិនបានចូលកន្លែងឆ្មបហ្នឹង។ តាមពិត ខ្ញុំធ្វើការហ្នឹងគេឲ្យនៅកន្លែងទូទៅផង កន្លែងសង្គ្រោះបន្ទាន់ផង ខ្ញុំមានបានចូលកន្លែងឆ្មបទេ។ ដល់ពេលអ៊ីចឹង គាត់ចេះតែថាគេមានចំណាពីអ្នកធំៗអ៊ីចឹង គេចេះតែចូលបានហើយ។ ពួកអាឯងគ្មានខ្សែអ៊ីចឹង អាឯងទៅនៅស្រុកទៅ។ គាត់និយាយអ៊ីចឹងឲ្យខ្ញុំ អូយ !ខ្ញុំធ្លាក់ថ្លើមហ្មងឮគាត់និយាយអ៊ីចឹង»។
ឆ្លើយតបនឹងការចោទប្រកាន់នេះ ប្រធានមន្ទីរសុខាភិបាលខេត្តស្វាយរៀង លោក កែ រដ្ឋា មានប្រសាសន៍ថា ការផ្ទេរមន្ត្រីពេទ្យឆ្មបឲ្យទៅប្រចាំការនៅមណ្ឌលសុខភាពតាមស្រុក ក្នុងគោលបំណងដើម្បីពង្រឹងការថែទាំសុខុមាលភាពប្រជាពលរដ្ឋនៅតាមទីជនបទ តាមគោលនយោបាយរបស់រាជរដ្ឋាភិបាល។ ហើយបានអនុវត្តការងារនេះ ធ្វើឡើងយ៉ាងយកចិត្តទុកដាក់ ដោយពុំបានប្រកាន់ខ្សែរយៈបក្ខពួកដូចការចោទប្រកាន់ឡើយ។
លោក កែ រដ្ឋា៖ «ខ្ញុំក្នុងនាមជាមន្ទីរសុខាភិបាលបុគ្គលិកទាំងអស់ សុទ្ធតែជាកូនជាចៅទាំងអស់។ ប៉ុន្តែធម្មតា វាត្រូវតែអនុវត្តទៅតាមច្បាប់ទៅតាមការណែនាំរបស់ក្រសួងសុខាភិបាល ធ្វើម៉េចឲ្យបានថាមានឆ្មបទៅជួយនៅកន្លែងមណ្ឌលសុខភាព ដែលឆ្ងាយៗ ដែលទទួលដូចការហានិភ័យខ្ពស់។ ព្រោះបើយើងមិនមានឆ្មបហ្នឹងទេ គឺថាប្រជាពលរដ្ឋគាត់ទទួលហានិភ័យ គ្រោះថ្នាក់ក្នុងការបង្កើតកូន»។
ប្រតិកម្មរបស់មន្ត្រីពេទ្យឆ្មបនេះ ធ្វើឡើងបន្ទាប់ពីទទួលបានសេចក្ដីប្រកាសរបស់មន្ទីរសុខាភិបាលខេត្តស្វាយរៀង ចុះថ្ងៃទី១ តុលា ឆ្នាំ២០១៣ តម្រូវឲ្យមន្ត្រីពេទ្យឆ្មបទាំង ៤រូប ដែលបម្រើការនៅមន្ទីរពេទ្យបង្អែកខេត្តស្វាយរៀង ឲ្យទៅប្រចាំការនៅមណ្ឌលសុខភាពស្រុករមាសហែក និងមណ្ឌលសុខភាពក្នុងក្រុងស្វាយរៀង។ ក្រុមគ្រូពេទ្យទទូចសុំឲ្យក្រសួងសុខាភិបាល និងមន្ត្រីដែលមានការពាក់ព័ន្ធនឹងបញ្ហាការផ្ទេរឈ្មោះនេះ ជួយដោះស្រាយធ្វើយ៉ាងណាឲ្យបានវិលត្រឡប់មកបម្រើការនៅមន្ទីរពេទ្យបង្អែកខេត្តស្វាយរៀង ដូចដើមវិញ។
ច្បាប់ស្ដីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា មាត្រាទី៧ ចែងថា អ្នករាជការក្របខ័ណ្ឌ អាចដាក់ឲ្យទៅបម្រើការ ឬបំពេញមុខងារក្រៅពីក្របខ័ណ្ឌដើមរបស់ខ្លួនបាន ក្នុងករណីចាំបាច់ និងមានការយល់ព្រមពីសាមីខ្លួន។ អ្នករាជការក្របខ័ណ្ឌ មានសិទ្ធិសុំផ្លាស់កន្លែងធ្វើការទៅតាមប្ដី ឬប្រពន្ធបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។