នៅថ្ងៃទី១១ មេសា អតីតកម្មករឡឥដ្ឋចំនួន ៤គ្រួសារ ក្នុងចំណោម ១៩៤គ្រួសារ នៅសង្កាត់ចាក់អង្រែលើ បានប្រមូលផ្ដុំគ្នានៅក្រសួងរៀបចំដែនដី នគរូបនីយកម្ម និងសំណង់ ដើម្បីទាមទារសំណងប្រាក់គោលនយោបាយពីរដ្ឋាភិបាលចំនួន ១លានរៀល ក្នុងមួយគ្រួសារ ដែលជាសំណងក្រោយពីរដ្ឋយកអតីតឡឥដ្ឋទី១ នេះ ដើម្បីធ្វើផ្លូវថ្នល់។
ការតវ៉ារបស់អតីតកម្មករឡឥដ្ឋទាំងនេះ ធ្វើឡើងក្រោយពីពួកគេរកឃើញថា តំណាងកម្មករបានធ្វើឲ្យបាត់ឈ្មោះកម្មករច្រើនជាងអ្វីដែលពួកគេឡើងមកតវ៉ានេះបន្ថែមទៀត។ ប៉ុន្តែ តំណាងកម្មករឡឥដ្ឋដែលរងការចោទប្រកាន់ អះអាងថា គឺជាក្រុមដែលស្ថិតនៅក្រៅបញ្ជី។
កម្មករឡឥដ្ឋចំនួន ៤គ្រួសារ ដែលទាមទារគោលនយោបាយ អះអាងថា ការពិតតំណាងកម្មករដែលបានយកសំណុំបែបបទ ស្នើសុំគោលនយោបាយពីរដ្ឋាភិបាល ដើម្បីផ្ដល់ប្រាក់សំណង ១លានរៀលនេះ គឺធ្វើឡើងដោយពុំមានតម្លាភាព និងមានអំពើពុករលួយ។
លោក ម៉ាក់ ជួប ដែលអះអាងថាជាតំណាងអតីតកម្មករឡឥដ្ឋ នៅចាក់អង្រែលើ មានប្រសាសន៍នៅថ្ងៃទី១១ មេសា ថា អ្វីដែលក្រុមកម្មករចំនួន ៤គ្រួសារ ដែលមានសមាជិកប្រមាណ ១០នាក់ ឡើងមកតវ៉ានេះ គឺធ្វើយ៉ាងណាសុំឲ្យក្រសួងរៀបចំដែនដី នគរូបនីយកម្ម និងសំណង់ ពិនិត្យមើលឡើងវិញចំពោះដែលត្រូវទទួលបានប្រាក់គោលនយោបាយ តែបែរជាមិនបានទៅវិញ។ លោកចាត់ទុកថា លោក សួន សុម៉ាលី ដែលដើរតួនាទីជាតំណាងកម្មករ បានយកញាតិដាក់នៅក្រសួង ដោយពុំបានរាប់បញ្ចូលពួកគាត់ដែលជាអតីតកម្មករពិតប្រាកដ តែបែរជាយកឈ្មោះអ្នកដទៃមកជំនួសវិញ៖ «គោលបំណងដែលៗខ្ញុំទាមទារហ្នឹង គឺខ្ញុំសុំទាមទារឲ្យខាងបងជួយចាក់ផ្សាយ ហើយសុំឲ្យក្រសួងដែនដី នគរូបនីយកម្ម និងសំណង់ ជួយពិនិត្យ និងជួយដោះស្រាយឲ្យពួកខ្ញុំដែលជាកម្មករ»។
វិទ្យុអាស៊ីសេរី ពុំអាចទាក់ទងមន្ត្រីក្រសួងរៀបចំដែនដី នគរូបនីយកម្ម និងសំណង់ ដើម្បីស្នើសុំការអត្ថាធិប្បាយបានទេ នៅថ្ងៃទី១១ មេសា ជុំវិញបញ្ហានេះ។
ក៏ប៉ុន្តែ លោក សួន សុម៉ាលី ដែលរងការចោទប្រកាន់ពីក្រុមកម្មករឡឥដ្ឋ ដែលថាបានធ្វើឲ្យបាត់ឈ្មោះរបស់ពួកគេ ចាត់ទុកអ្នកដែលតវ៉ាទាមទារគោលនយោបាយថា គឺជាអ្នកដែលប្រកាន់ជំហរមិនទទួលយកគោលការណ៍ប្រាក់សំណងចំនួន ១លានរៀលទេ។ លោកបន្តថា ហេតុនេះទើបលោកសម្រេចជ្រើសរើសយកអ្នកដែលស្ម័គ្រចិត្តចំនួន ១៩៤គ្រួសារ៖ «រឿងហ្នឹង ពេលដែលខ្ញុំហៅមកផ្ដិតមេដៃអាដែងចុងក្រោយ ដែលឡើងមកក្រសួងនេះទាំងអស់នេះ អត់ឃើញមកផ្ដិត។ ដូច្នេះអាណែផ្ដិតមេដៃមកក្រសួងហ្នឹង ឈ្មោះគេយកពិតប្រាកដ ហើយអ្នកមិនបានមក គឺអត់ហើយ»។
អតីតរោងចក្រឡឥដ្ឋទី១ ត្រូវបានរដ្ឋរឹបអូសមកគ្រប់គ្រង ក្រោយពីរោងចក្រមួយនេះត្រូវបិទទ្វារមិនដំណើរការ ចាប់តាំងពីឆ្នាំ១៩៩៣។ ក្រោយពីត្រូវបិទទ្វារ និងពុំមានសំណងប្រាក់អតីតភាពការងារ កម្មករ ១៩៤គ្រួសារ បានដាក់ពាក្យបណ្ដឹងជាបន្តបន្ទាប់ ដើម្បីស្វែងរកដំណោះស្រាយ។ នៅទីបំផុត រដ្ឋាភិបាល បានសម្រេចផ្ដល់គោលនយោបាយចំនួន ១លានរៀល ជាថ្នូរនឹងការប្រើប្រាស់ទីតាំងនោះ ដើម្បីធ្វើផ្លូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។