មជ្ឈមណ្ឌលសិទ្ធិមនុស្សកម្ពុជា (CCHR) ផ្ញើលិខិតចំហមួយទៅលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី ១៨ សីហា ជំរុញក្រសួងពាក់ព័ន្ធ និងអាជ្ញាធរមូលដ្ឋាន ឲ្យបញ្ឈប់លក្ខខណ្ឌតម្រូវឲ្យសុំការអនុញ្ញាត រៀបចំបាតុកម្មដោយសន្តិវិធី។
មជ្ឈមណ្ឌលសិទ្ធិមនុស្សកម្ពុជាបានលើកឡើងពីការលំបាករបស់ខ្លួនកន្លងមក ជាមួយអាជ្ញាធរមូលដ្ឋាន រាល់ពេលរៀបចំវគ្គបណ្ដុះបណ្ដាល និងព្រឹត្តិការណ៍នានា ស្រដៀងគ្នានឹងការរារាំងរបស់អាជ្ញាធរខណ្ឌមានជ័យចំពោះ គម្រោងជិះកង់របស់អង្គការមាតាធម្មជាតិ (Mother Nature) ដែលមានយុវជនជិះកង់ដើម្បីលើកកម្ពស់ការយល់ដឹង អំពីផែនការសាងសង់ទំនប់វារីអគ្គិសនី នៅស្រុកអារ៉ែង ខេត្តកោះកុង កាលពីថ្ងៃទី ១៧ សីហានេះ។
ចំពោះការរារាំងកន្លងមកពីសំណាក់អាជ្ញាធរ ហាក់ផ្ទុយស្រឡះពីមាត្រាច្បាប់ស្ដីពីបាតុកម្មដោយសន្តិវិធី ត្រឹមតែបញ្ជាក់ថា បាតុកម្មដោយសន្តិវិធី នៅទីសាធារណៈណាមួយ គ្រាន់តែជូនដំណឹងជាលាយលក្ខណ៍អក្សរ ទៅអាជ្ញាធរដែនដីមានសមត្ថកិច្ចនៅទីកន្លែងនោះ ហើយអាជ្ញាធរខកខានមិនបានឆ្លើយតបរហូតដល់ពេលកំណត់នោះ បានន័យថាអាជ្ញាធរបានព្រមព្រៀងហើយ ចំណែកឯអាជ្ញាធរក៏គ្មានសិទ្ធិទៅបំបែកបាតុកម្មបានដែរ។ សរុបមកបាតុករមិនតម្រូវឲ្យមានច្បាប់អនុញ្ញាតសុំធ្វើបាតុកម្ម ដូចការលើកឡើងរបស់ អភិបាលខណ្ឌមានជ័យ ដែលរារាំងក្រុមយុវជនអង្គការមាតាធម្មជាតិនោះទេ បាតុករគ្រាន់តែជូនដំណឹងទៅអាជ្ញាធរពាក់ព័ន្ធនានាបានហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។