ក្រុមយុវជនជាអ្នកកាសែតសហគមន៍រួមគ្នាធ្វើផែនទីរូបភាពបង្ហាញទិសតំបន់អារ៉ែង
2015.07.20
គម្រោងបច្ចេកវិទ្យាទំនាក់ទំនង និងព័ត៌មាននៃមជ្ឈមណ្ឌលអប់រំច្បាប់សម្រាប់សហគមន៍ រួមនឹងក្រុមយុវជនជាអ្នកកាសែតសហគមន៍ រួមគ្នាធ្វើផែនទីរូបភាពភូមិសាស្ត្រនៅតំបន់អារ៉ែងប្រចាំឆ្នាំ២០១៥ និងត្រូវដាក់ផ្សាយនៅលើគេហទំព័រផែនទីហ្គូហ្គល (Google)។
ផែនទីរូបភាពភូមិសាស្ត្រនេះ អាចជួយណែនាំអ្នកទេសចរ ឬអ្នកមានមុខងារដទៃទៀត ដែលចង់ទៅតំបន់អារ៉ែងក្នុងស្រុកថ្មបាំង ខេត្តកោះកុង បានងាយស្រួល។
ការកសាងផែនទីរូបភាពចង្អុលប្រាប់ទិសទៅកាន់ភូមិសាស្ត្រតំបន់អារ៉ែងនេះ ជាផ្នែកមួយនៃគម្រោងជួយជំរុញឲ្យភ្ញៀវទេសចរនៅតំបន់នោះកើនឡើង និងជួយចូលរួមអភិរក្សតំបន់ព្រៃធម្មជាតិ និងសត្វគ្រប់ប្រភេទដែលនៅសេសសល់ចុងក្រោយ នៅភាគនិរតីនៃខេត្តកោះកុង នោះ។
ប្រធានគម្រោងបច្ចេកវិទ្យាទំនាក់ទំនង និងព័ត៌មាន នៃមជ្ឈមណ្ឌលអប់រំច្បាប់សម្រាប់សហគមន៍ លោក ង៉ែត ម៉ូសេ ដែលដឹកនាំធ្វើផែនទីនេះ បានឲ្យដឹងកាលពីថ្ងៃទី១៧ កក្កដា ថា បន្ទាប់ពីការខិតខំប្រឹងប្រែងចូលរួមពីក្រុមយុវជនជាអ្នកកាសែតសហគមន៍រយៈពេល ៣ថ្ងៃ នៅដើមសប្ដាហ៍នេះ ក្រុមការងារសម្រេចបានប្រមាណ ៦០ភាគរយហើយក្នុងជំហានដំបូង៖ «យើងធ្វើបានច្រើនកន្លែងដែរ គឺយើងធ្វើចាប់ពីវាលពីរទៅ ព្រោះវាលពីរគេធ្វើហើយដោយធ្វើមួយគីឡូម្តងៗរហូតដល់ថ្មបាំង បន្តរហូតដល់ឃុំជំនាប់ ទៅកន្លែងព្រៃអារក្ស ព្រៃត្រណមរបស់ជនជាតិជង និងផ្លូវចូលទៅឆាយអារ៉ែង»។
លោកបន្តថា ជំហានទីមួយនេះផ្អាកត្រឹមហ្នឹងសិន ដោយសារតំបន់ផ្សេងៗទៀតមានផ្លូវពិបាកធ្វើដំណើរចូលទៅដល់ ព្រោះរដូវនេះជារដូវវស្សាមានភ្លៀងធ្លាក់ច្រើន។
លោក ង៉ែត ម៉ូសេ បានឲ្យដឹងពីអត្ថប្រយោជន៍នានានៃការកសាងផែនទីនេះ ដូចជាលើកម្ពស់តំបន់ទេសចរណ៍ដែលនៅដាច់ស្រយាលពីទីប្រជុំជន បង្ហាញផ្លូវទៅកាន់ទីកន្លែងណាមួយក្នុងតំបន់ទេសចរណ៍ ដើម្បីឲ្យអ្នកទេសចរងាយស្វែងរក។ ម្យ៉ាងទៀត ការជ្រើសតំបន់អារ៉ែងជាជំហានដំបូងនៃកម្មសិក្សានោះ ដោយសារតំបន់នោះនៅដាច់ស្រយាល គ្មានបណ្ដាញទូរស័ព្ទទាក់ទងគ្នាបាន ជាតំបន់ដែលមានសក្ដានុពលព្រៃឈើ សត្វព្រៃ ដែលត្រូវរួមគ្នាអភិរក្ស ហើយក៏ជាឱកាសមួយសម្រាប់ក្រុមយុវជនស្វែងយល់លម្អិតពីតំបន់ព្រៃភ្នំ សត្វគ្រប់ប្រភេទនៅទីនោះថែមទៀត ក្រៅពីការធ្វើផែនទីនៅតំបន់នោះ៖ «អ្នកនៅកន្លែងណាក៏ដោយទូទាំងពិភពលោក គេចង់ដឹងពីស្រុកខ្មែរ តំបន់ ឬកន្លែងណាមួយមានទេសភាពបែបម៉េច ហើយបើគេចង់មក គេមើលផែនទីហ្នឹងទៅគេអាចមកបានដោយមិនចាំបាច់អ្នកនាំផ្លូវក៏បាន»។
ក្រុមការងារធ្វើផែនទីរូបភាពបង្ហាញផ្លូវទៅកាន់តំបន់ទេសចរណ៍ស្ទឹងអារ៉ែងនេះ មានជាង ២០នាក់ ភាគច្រើនជាយុវជន សិក្ខាកាមសិក្សាពីព័ត៌មានវិទ្យា និងការសរសេរព័ត៌មានស្ដីពីសហគមន៍ ដែលជាគម្រោងរបស់មជ្ឈមណ្ឌលអប់រំច្បាប់សម្រាប់សហគមន៍ និងក្រុមយុវជន អេស.ប៊ី.អ៊ិន (SBN) ព្រមទាំងយុវជនដទៃទៀត ដែលសកម្មក្នុងការសរសេរព័ត៌មានសង្គមថ្មីៗផ្សព្វផ្សាយតាមបណ្ដាញសង្គមហ្វេសប៊ុក (Facebook)។
សមាជិកក្រុមយុវជន អេស.ប៊ី.អ៊ិន (SBN) យុវជន ហេង ពិសិដ្ឋ ដែលសមាជិកមួយចំនួនចូលរួមក្នុងសកម្មភាពនេះដែរ បានឲ្យដឹងដែរថា គម្រោងនេះបានជួយច្រើនដល់យុវជនទទួលបានបទពិសោធន៍ការងារថ្មីៗ ដល់ភ្ញៀវទេសចរ និងអ្នកភូមិទទួលបានចំណូលពីភ្ញៀវទេសចរដែលចូលទៅតំបន់អារ៉ែង៖ «ភ្ញៀវជាតិ និងអន្តរជាតិ ពួកគាត់អាចចូលទៅមើលក្នុងហ្គូហ្គល (Google) គាត់អាចឃើញទីតាំងហ្នឹង ហើយងាយស្រួលធ្វើដំណើរទៅដោយខ្លួនឯងបាន ក្នុងករណីគាត់ទាក់ទងអ្នកភូមិ ឬអ្នកដែលធ្លាប់ទៅទីនោះ និងចុះបង្រៀនប្រជាសហគមន៍ឲ្យចេះសរសេរព័ត៌មានខ្លី និងផ្តល់ព័ត៌មានគាត់អាចការពារព្រៃឈើក្នុងសហគមន៍នោះបាន តាមរយៈការផ្តល់ព័ត៌មានចេញមកក្រៅ ឬមកអ្នកសារព័ត៌មានអាជីពឲ្យជួយផ្សព្វផ្សាយ»។
ក្រុមហ៊ុនហ្គូហ្គល (Google) ធ្លាប់បានធ្វើផែនទីបង្ហាញផ្លូវទៅកាន់តំបន់អារ៉ែងរួចម្តងមកហើយនៅចន្លោះឆ្នាំ២០១៣ និងឆ្នាំ២០១៤ ប៉ុន្តែមិនទាន់សព្វជ្រុងជ្រោយនៅឡើយ។ លោក ម៉ូសេ បញ្ជាក់ថា ក្រុមការងាររបស់លោកចង់ធ្វើដាច់ដោយឡែកមួយទៀត និងធ្វើបច្ចុប្បន្នភាពបន្តពីហ្គូហ្គល (Google) ដោយថតបញ្ចូលនូវទីតាំងថ្មីៗថែមទៀត ដែលក្នុងផែនទីហ្គូហ្គល (Google) មិនទាន់មាន។
ចំណែកយុវជន អាន វិចិត្រ ជាអ្នកធ្វើការស្ម័គ្រចិត្តនៅមជ្ឈមណ្ឌលអប់រំច្បាប់សម្រាប់សហគមន៍ ស្ថិតក្នុងក្រុមការងារផែនទីនោះដែរ បានឲ្យដឹងថា ការសម្រេចចិត្តទៅសិក្សាស្វែងយល់ និងធ្វើផែនទីរូបភាពពីភូមិសាស្ត្រនៅតំបន់អារ៉ែងនោះ ដោយសារតំបន់នេះកំពុងមានការចាប់អារម្មណ៍ខ្លាំងពីមជ្ឈដ្ឋានទូទៅ ជាតំបន់អេកូទេសចរណ៍ដ៏កម្រមួយ ដែលទើបត្រូវបានគេចចេញពីគម្រោងវារីអគ្គិសនីមួយរយៈនេះ៖ «បរិស្ថានអារ៉ែងដែលគេចាត់ទុកថាជាព្រៃចុងក្រោយ ហើយទីនោះស្ថិតនៅឆ្ងាយ ទាំងផ្លូវពិបាក ថែមទាំងរដ្ឋាភិបាលកំពុងប៉ុនប៉ងធ្វើសម្បទានដីទៅឲ្យក្រុមហ៊ុនចិន មួយ ដើម្បីធ្វើទំនប់វារីអគ្គិសនី ដែលនាំឲ្យប៉ះពាល់ព្រៃឈើ និងសត្វព្រៃដែលរស់នៅតំបន់ហ្នឹង»។
លោក ង៉ែត ម៉ូសេ បានឲ្យដឹងថា ជំហានទីពីរដែលឈានទៅបញ្ចប់គម្រោងនេះ នឹងអាចចាប់ផ្ដើមធ្វើបន្តទៀតនៅចុងឆ្នាំ២០១៥ នេះ។ លោកឲ្យដឹងទៀតថា ទៅថ្ងៃខាងមុខ អង្គការលោកមានគម្រោងធ្វើផែនទីដូចគ្នានេះនៅតំបន់ទេសចរណ៍ដាច់ស្រយាលដទៃទៀត៕