សហព័ន្ធស្រូវអង្ករកម្ពុជា បានបដិសេធនឹងព័ត៌មានដែលថាមានវត្តមានអង្ករផ្លាស្ទិច ចរាចរក្នុងទីផ្សារកម្ពុជា។
ការបញ្ជាក់របស់សហព័ន្ធស្រូវអង្ករកម្ពុជានៅថ្ងៃទី១៥ កក្កដា ធ្វើឡើងបន្ទាប់ពីមានព័ត៌មានតាមបណ្ដាញសង្គមហ្វេសប៊ុក(Facebook) ដែលបានចែករំលែកតៗគ្នា ពីការបារម្ភថាអង្ករនេះ កំពុងចរាចរក្នុងទីផ្សារ និងអាចប៉ះពាល់ដល់សុខភាពអ្នកបរិភោគ។
មន្ត្រីទំនាក់ទំនងព័ត៌មាននៃសហព័ន្ធស្រូវអង្ករកម្ពុជា លោក ហ៊ីម ខទៀត បញ្ជាក់ថា សហព័ន្ធស្រូវអង្ករកម្ពុជាបានសិក្សារកប្រភពព័ត៌មានដែលផ្សព្វផ្សាយ និងយកអង្ករដែលគេសង្ស័យនោះ ធ្វើពិសោធន៍ដោយអ្នកជំនាញ ហើយលទ្ធផលបញ្ជាក់ថាអង្ករនោះមិនមែនជាអង្ករផ្លាស្ទិចឡើយ៖ «យើងសូមអំពាវដល់ប្រជាពលរដ្ឋកុំភ័យព្រួយអ្វីទាំងអស់ ហើយក្នុងករណីដែលមានការសង្ស័យណាមួយ គឺសហព័ន្ធស្រូវអង្ករកម្ពុជា ស្វាគមន៍នូវរាល់ព័ត៌មាន ឬករណីសង្ស័យទាំងឡាយណានោះ ហើយសហព័ន្ធយើងមានអ្នកជំនាញ ដើម្បីបញ្ជាក់ជូនរាល់ការសង្ស័យខាងលើនោះ»។
យ៉ាងណាក៏ដោយ លោក ហ៊ីម ខទៀត បន្តថា ទីផ្សារអង្ករផ្លាស្ទិចនឹងមិនអាចហូរចូលទីផ្សារកម្ពុជាបានទេ ដោយហេតុផល២យ៉ាងទី១ កត្តាថ្លៃដើមដែលថ្លៃជាងអង្ករក្នុងស្រុករហូតដល់ពាក់កណ្ដាល ហើយបើបូកនឹងថ្លៃនាំចូលទៀត នឹងកាន់តែថ្លៃទ្វេដង ទី២ អាជីវករនឹងមិនអាចនាំចូលអង្ករដែលមានតម្លៃបែបនេះ មកប្រកួតប្រជែងជាមួយអង្ករក្នុងស្រុកដែលមានតម្លៃថោកជាងឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។