សហព័ន្ធស្រូវអង្ករកម្ពុជា នឹងជួបអ្នកពាក់ព័ន្ធនៅក្នុងវិស័យស្រូវអង្ករសំខាន់ៗ ដើម្បីដោះស្រាយបញ្ហាប្រឈមក្នុងវិស័យស្រូវអង្ករកម្ពុជា។ សេចក្ដីប្រកាសព័ត៌មានរបស់សហព័ន្ធស្រូវអង្ករកម្ពុជា ចេញផ្សាយថ្ងៃទី៧ ខែមីនា បង្ហាញថា ក្រុមប្រឹក្សាភិបាលរបស់ខ្លួនកាលពីពេលថ្មីៗនេះ បានសម្រេចដាក់ផែនការគន្លឹះសំខាន់ៗមួយចំនួន ដើម្បីដោះស្រាយបញ្ហាប្រឈមក្នុងវិស័យស្រូវអង្ករ។
ប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ មានប្រសាសន៍ថា “សហព័ន្ធស្រូវអង្ករកម្ពុជា កំពុងប្រឹងប្រែងយ៉ាងខ្លាំងធ្វើការជាមួយសមាជិក និងអ្នកពាក់ព័ន្ធទាំងអស់ ពិសេសក្រសួងស្ថាប័នរាជរដ្ឋាភិបាល ស្វែងរកដំណោះស្រាយសម្រាប់វិស័យស្រូវអង្ករ ដែលជាវិស័យមួយដ៏មានសក្ដានុពល និងសារសំខាន់ សម្រាប់សេដ្ឋកិច្ចជាតិ ជាពិសេសសម្រាប់ទ្រទ្រង់ជីវភាពប្រជាកសិករខ្មែរ និងសន្តិសុខស្បៀង”។
អ្នកពាក់ព័ន្ធនៅក្នុងវិស័យស្រូវអង្ករសំខាន់ៗ ដែលមានតំណាងមកពីខាងរោងម៉ាស៊ីនកិនស្រូវ ក្រុមហ៊ុននាំចេញអង្ករ និងសហគមន៍កសិករ គ្រោងនឹងចូលរួមធ្វើសន្និសីទសារព័ត៌មាននៅថ្ងៃទី៩ ខែមីនា ដើម្បីចែករំលែកព័ត៌មានស្ដីពីផែនការគន្លឹះ ក្នុងការដោះស្រាយបញ្ហាប្រឈមក្នុងវិស័យស្រូវអង្ករក្នុងរយៈពេលខ្លី និងរយៈពេលវែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។