បុគ្គលិក ពលករ និងកម្មករខ្មែរប្រមាណ ៥០០នាក់ ដែលកំពុងបម្រើការឲ្យក្រុមហ៊ុនវិនិយោគរបស់ប្រទេសកូរ៉េ បានជួបជុំគ្នាជាលើកទី១ នៅឯពហុកីឡាដ្ឋានជាតិអូឡាំពិក នៅថ្ងៃទី១៨ ខែតុលា ឆ្នាំ២០១៤។
ការជួបជុំគ្នានេះ នៅក្នុងពិធីអបអរសាទរមួយដែលមានឈ្មោះថា កម្មវិធីចិត្តតែមួយ ដើម្បីពង្រឹងទំនាក់ទំនងរវាងប្រជាជននៃប្រទេសទាំងពីរ គឺប្រជាជនកម្ពុជា និងកូរ៉េ ដែលរៀបចំដោយស្ថានទូតសាធារណរដ្ឋកូរ៉េ ប្រចាំកម្ពុជា។
ឯកអគ្គរដ្ឋទូតនៃសាធារណរដ្ឋកូរ៉េ ប្រចាំកម្ពុជា បានលើកសរសើរដល់បុគ្គលិក ពលករ កម្មករកម្មការិនីខ្មែរ ថាមានចិត្តអំណត់ ខិតខំប្រឹងប្រែងធ្វើការ ដែលជំរុញឲ្យគ្រឹះស្ថានសហគ្រាសទាំងនោះពង្រឹង និងផ្ដល់ជំនាញដល់បុគ្គលិក និងកម្មករខ្មែរបន្ថែមទៀត។
ឯកអគ្គរដ្ឋទូតនៃសាធារណរដ្ឋកូរ៉េ ប្រចាំកម្ពុជា លោក គីម ហាន់ ស៊ូ (Kim Han Soo) មានប្រសាសន៍តាមរយៈអ្នកបកប្រែរបស់លោកថា លោកបានទទួលដំណឹងពីសហគ្រាសកូរ៉េ យ៉ាងច្រើនថា ពលករកម្មករខ្មែរមានភាពឧស្សាហ៍ព្យាយាមជាងប្រទេសមួយចំនួន ក្នុងការបំពេញការងារ។ ហេតុនេះ សហគ្រាសកូរ៉េ ទាំងនោះ កំពុងមានតម្រូវការបុគ្គលិកខ្មែរជាច្រើនទៀត។
លោក គីម ហាន់ ស៊ូ៖ «ខ្ញុំបានឮព័ត៌មានថា បងប្អូនប្រជាពលរដ្ឋខ្មែរយើងដែលគាត់ធ្វើការ ជាពិសេសបងប្អូនដែលគាត់ទៅធ្វើការនៅប្រទេសកូរ៉េ គាត់មិនសូវជាមានជំនាញទេ គាត់មិនមែនជាអ្នកជំនាញទេ ប៉ុន្តែពួកគាត់ គឺស្វាហាប់ ឧស្សាហ៍ព្យាយាម ហើយនៅប្រទេសខ្មែរហ្នឹង ក៏អ៊ីចឹងដែរ។ គាត់មិនសូវជាមានជំនាញ ក៏ប៉ុន្តែគាត់ខំប្រឹង ខាងសហគ្រាសក៏ដូចជាក្រុមហ៊ុនកូរ៉េ គាត់បានតាំងចិត្តមួយថា ទោះបីជាមានការលំបាកយ៉ាងណាបន្តិចក៏ដោយ គឺដើម្បីផ្ដល់នូវចំណេះដឹងខាងជំនាញច្បាស់លាស់ដល់ពួកគាត់ ដែលចូលមកធ្វើការ ទោះបីជាយើងមានការនឿយហត់បន្តិច ប៉ុន្តែខំប្រឹងទាំងអស់គ្នា តស៊ូទាំងអស់គ្នានៅក្នុងការងារ»។
លោកថ្លែងបែបនេះនៅក្នុងកម្មវិធីចិត្តតែមួយ ដើម្បីពង្រឹងទំនាក់ទំនងរវាងប្រជាជននៃប្រទេសទាំងពីរ គឺប្រជាជនកម្ពុជា និងកូរ៉េ រៀបចំដោយស្ថានទូតសាធារណរដ្ឋកូរ៉េ ប្រចាំកម្ពុជា នៅឯពហុកីឡាដ្ឋានជាតិអូឡាំពិក នៅថ្ងៃទី១៨ ខែតុលា ឆ្នាំ២០១៤។
«សំឡេងស្រែកអបអរសាទរនៅក្នុងស្តាត»
ឯកអគ្គរដ្ឋទូតនៃសាធារណរដ្ឋកូរ៉េ ប្រចាំកម្ពុជា លោក គីម ហាន់ ស៊ូ បានថ្លែងទៀតថា កម្មវិធីរបៀបនេះនៅប្រទេសកូរ៉េ គេហៅថាជាកម្មវិធីជួបជុំគ្រួសារ។ ដូច្នេះ កម្មវិធីនេះនឹងផ្ដល់ឱកាសឲ្យបានប្រាស្រ័យទាក់ទងល្អរវាងគ្នា និងគ្នា ដែលជំរុញឲ្យបុគ្គលិក និងចៅហ្វាយនាយ មានភាពសិទ្ធិស្នាលនឹងគ្នា ឈានទៅរីកចម្រើនខាងផ្នែកការងារ។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ដែលបានចូលរួមនៅក្នុងពិធីនោះ ថ្លែងថា កិច្ចសហការលើវិស័យពលករនៃប្រទេសទាំងពីរ គឺកម្ពុជា និងកូរ៉េ ពិតជាល្អណាស់។ លោកថា មានពលករខ្មែរជាង ៣ម៉ឺននាក់ ដែលបានទៅធ្វើការនៅសាធារណរដ្ឋកូរ៉េ មកដល់ពេលបច្ចុប្បន្ន៖ «ថ្មីៗនេះខ្ញុំបានទៅសាធារណរដ្ឋកូរ៉េ ដើម្បីចរចាសុំបន្ថែមកូតាប្រចាំឆ្នាំ។ ហើយពលករយើងត្រូវបានរដ្ឋាភិបាលកូរ៉េ វាយតម្លៃជាគុណភាពលេខ១ក្នុងចំណោម ១៥ប្រទេស ដែលបញ្ជូនពលករទៅកូរ៉េ»។
យ៉ាងណាក៏ដោយ លោក អ៊ិត សំហេង បានអំពាវនាវឲ្យប្រជាពលរដ្ឋជៀសវាងការចាញ់បោកជនខិលខូច ដែលធានានាំពួកគេទៅធ្វើការនៅប្រទេសកូរ៉េ។ លោកថា មានតែច្រកមួយប៉ុណ្ណោះ គឺតាមរយៈប្រព័ន្ធរដ្ឋ និងរដ្ឋ ដែលតម្រូវឲ្យបេក្ខជនដាក់ពាក្យប្រឡង គឺបានរៀបចំដោយក្រសួងការងារ រាល់១ឆ្នាំម្ដង៖ «កុំជឿនរណា កុំជឿមេខ្យល់ កុំជឿអីទាំងអស់ សុទ្ធតែពួកបោកប្រាស់ បើសិនជានរណាធ្វើបែបនេះ សុំឲ្យរាយការណ៍មកក្រសួង យើងនឹងចាត់វិធានការភ្លាមទៅតាមច្បាប់»។
ឯកសាររបស់ស្ថានទូតកូរ៉េ បានឲ្យដឹងថា ទំហំពាណិជ្ជកម្មរវាងប្រទេសកូរ៉េ និងកម្ពុជា បានកើនឡើងពី ៥៤លានដុល្លារនៅឆ្នាំ១៩៩៧ ដល់ ៧៥០លានដុល្លារនៅឆ្នាំ២០១៣ គឺកើនឡើងប្រហែល ១៤ដង។ រីឯចំនួនភ្ញៀវទេសចរជនជាតិកូរ៉េ ដែលចូលមកកម្ពុជា ក៏មានការកើនឡើងពីមួយឆ្នាំទៅមួយឆ្នាំ។ កាលពីឆ្នាំ២០១៣ ភ្ញៀវទេសចរជនជាតិកូរ៉េ មានចំនួន ៤៣ម៉ឺននាក់ គឺឈរនៅលំដាប់លេខ៣ បន្ទាប់ពីវៀតណាម និងចិន។ បច្ចុប្បន្ន ពលរដ្ឋកូរ៉េ ដែលកំពុងស្នាក់នៅកម្ពុជា មានជាង ៨ពាន់នាក់។ ចំណែកពលរដ្ឋខ្មែរនៅប្រទេសកូរ៉េ វិញ មានប្រហែល ១ម៉ឺន ២ពាន់នាក់។
កម្មវិធីចិត្តតែមួយនេះ ក៏មានការសម្ដែងរបាំប្រពៃណីខ្មែរ និងកូរ៉េ និងការសម្ដែងតៃខ្វាន់ដូ។ ក្រៅពីនោះ ក៏បង្កឱកាសឲ្យកម្មករ ឬបុគ្គលិកបម្រើការឲ្យក្រុមហ៊ុន និងសហគ្រាសចូលរួមកម្មវិធីប្រកួតកីឡាកាយសម្បទា ដើម្បីយករង្វាន់ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។