លទ្ធផលស្ទង់មតិថ្មីមួយរបស់ក្រុមហ៊ុនស្រាវជ្រាវ ហ្គាលឡប (Gullup) ផ្សាយកាលពីពេលថ្មីៗនេះ បង្ហាញថា ប្រទេសកម្ពុជា មានចំណាត់ថ្នាក់លេខរៀងទី៩ ក្នុងចំណោម ១៣៨ប្រទេស ដែលប្រជាពលរដ្ឋគ្មានភាពរីករាយក្នុងថ្ងៃកន្លងមក។
លទ្ធផលស្ទង់មតិធ្វើកាលពីឆ្នាំ២០១៣ បង្ហាញថា ប្រទេសអ៊ីរ៉ាក់ ជាប្រទេសជាប់លំដាប់លេខ១ គ្មានភាពរីករាយច្រើនជាងគេ បន្ទាប់មកទៀត គឺប្រទេសអ៊ីរ៉ង់។
ការស្ទង់មតិរបស់ក្រុមហ៊ុនស្រាវជ្រាវ ហ្គាលឡប សិក្សាទៅលើអារម្មណ៍របស់ពលរដ្ឋក្នុង ១៣៨ប្រទេស ដោយសាកសួរអ្នកទាំងនោះអំពីអារម្មណ៍របស់គេ ដែលមានក្នុងចិត្ត កាលពីថ្ងៃម្សិល ថាតើពួកគេមានអារម្មណ៍បែបណា? សំណួរស្ទង់មតិទាក់ទងនឹងបទពិសោធន៍របស់ពលរដ្ឋ ដែលមានក្នុងថ្ងៃកន្លងមក រួមមាន ថាតើពួកគេមានក្តីព្រួយបារម្ភខ្លាំង ការឈឺចាប់ផ្នែករាងកាយខ្លាំង មានកំហឹងខ្លាំង និងបញ្ហាតានតឹងផ្លូវចិត្តខ្លាំងឬទេ? ប្រសិនបើពលរដ្ឋដែលត្រូវគេសាកសួរទាំងនោះ ឆ្លើយថា កាលពីថ្ងៃម្សិលមិញ ពួកគេពិតជាមានបញ្ហាទាំងនោះមែន។ ដូច្នេះ លទ្ធផលនឹងបង្ហាញថា ពួកគេមានបទពិសោធន៍មិនល្អ ក្នុងប្រទេសទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។