អធិការ​ស្រុក​បរិបូរណ៍​ខេត្ត​កំពង់ឆ្នាំង​រង​ការ​ចោទ​ថា​ប្រព្រឹត្ត​អំពើ​ពុក​រលួយ​និង​ក្រាញ​អំណាច

ដោយ ជិន ជេដ្ឋា
2017.02.12
អធិការដ្ឋាន​នគរបាល​ស្រុក​បរិបូរណ៍ ២០១៦ ៨៥៥ អធិការដ្ឋាន​នគរបាល​ស្រុក​បរិបូរណ៍ ខេត្ត​កំពង់ឆ្នាំង។ រូបថត​ថ្ងៃ​ទី​២៤ ខែ​តុលា ឆ្នាំ​២០១៦។ RFA/Chhin Chetha
RFA/Chhin Chetha

ស្នងការ​នគរបាល​ខេត្ត​កំពង់ឆ្នាំង និង​អធិការ​ស្រុក​បរិបូរណ៍ រង​ការ​ចោទ​ថា​បាន​ឃុបឃិត​គ្នា​ដើម្បី​រក្សា​តំណែង​អធិការ​ស្រុក​បរិបូរណ៍ លោក ជាង សុវណ្ណារិទ្ធិ ដែល​គ្រប់​អាយុ​ចូល​និវត្តន៍​ទៅ​ហើយ​នោះ។ ស្នងការ​នគរបាល​ខេត្ត និង​អធិការ​ស្រុក បដិសេធ​ចំពោះ​ការ​ចោទ​ប្រកាន់​នេះ ដោយ​យល់​ថា ការ​ចោទ​ប្រកាន់​ធ្វើ​ឡើង​ដើម្បី​ចង់​កាច់កុង​គ្នា និង​ស្អប់​គ្នា​ប៉ុណ្ណោះ។

លិខិត​មួយ​ច្បាប់​ផ្ញើ​មក​កាន់​អាស៊ីសេរី ដោយ​ដាក់​ថា យើង​ខ្ញុំ​ទាំងអស់​គ្នា​ជា​មន្ត្រី​នគរបាល​នៅ​ស្រុក​បរិបូរណ៍ ខេត្ត​កំពង់ឆ្នាំង បាន​ចោទ​លោក ជាង សុវណ្ណារិទ្ធិ ថា​កាត់​ប្រាក់​ខែ​បុគ្គលិក​ជា​ប្រចាំ និង​ចង់​ក្រាញ​យក​តំណែង​ជា​អធិការ​ដោយ​មិន​ព្រម​ចូល​និវត្តន៍​តាម​លិខិត​សម្រេច​របស់​អគ្គនាយកដ្ឋាន​បុគ្គលិក នៃ​អគ្គស្នងការដ្ឋាន​នគរបាល​ជាតិ នោះ​ទេ។ លិខិត​បន្ត​ថា ពួក​គេ​ជួប​ការ​លំបាក ហើយ​ខំ​តែ​អរ​ថា​លោក​អធិការ​ព្រម​ចូល​និវត្តន៍ ប៉ុន្តែ​សព្វថ្ងៃ​នៅ​ធ្វើ​ការ​ដដែល។

ឆ្លើយតប​នឹង​ការ​ចោទ​ប្រកាន់​នេះ អធិការ​ស្រុក​បរិបូរណ៍ លោក ជាង សុវណ្ណារិទ្ធិ ថា​លោក​ស្គាល់​អ្នក​ដែល​ស្អប់​លោក ហើយ​តែងតែ​រាយការណ៍​ទៅ​ស្ថាប័ន​ផ្សេងៗ​ដើម្បី​រក​រឿង​ចោទ​ប្រកាន់​លោក។ ប៉ុន្តែ​កន្លង​ទៅ លោក​មិន​ដែល​ធ្វើ​ឲ្យ​មន្ត្រី​ក្រោម​ឱវាទ​ថ្នាំងថ្នាក់​ចិត្ត ឬ​កាត់​ប្រាក់​ខែ​ពួក​គេ​នោះ​ទេ ហើយ​ការ​សម្រេច​ឲ្យ​ចូល​និវត្តន៍​របស់​ថ្នាក់​លើ​នេះ លោក​មិន​ប្រកែក​ប្រណាំង ឬ​ក្រាញ​អំណាច​ឡើយ៖ «ខ្ញុំ​អត់​ដឹង​ផង ព្រោះ​ថ្នាក់​លើ​អត់​បាន​ប្រាប់​ខ្ញុំ​ផង (អត់​ទទួល​បាន​លិខិត​ឲ្យ​ចូល​និវត្តន៍​នៅ​ឡើយ) មាន​មនុស្ស​ស្អប់​ខ្ញុំ​នៅ​ក្នុង​អង្គភាព​ហ្នឹង។ ខ្ញុំ​អត់​ដែល​មានទៅ​កាន់​លុយ​កូន​ចៅ​ណា​ទេ បើ​បង​ឯង​ចង់​ដឹង សួរ​កូន​ចៅ​ខ្ញុំ​ទៅ»

អាស៊ីសេរី បាន​ទាក់ទង​មន្ត្រី​នគរបាល​នៃ​អធិការដ្ឋាន​នគរបាល​ស្រុក​បរិបូរណ៍ បួន​នាក់​ផ្សេង​ទៀត​ដើម្បី​បញ្ជាក់​បន្ថែម​ជុំវិញ​ការ​ចោទ​ប្រកាន់​នេះ។ ពួក​គេ​ឲ្យ​ដឹង​ស្រដៀង​គ្នា​ថា កាល​ពី​បី​ឆ្នាំ​មុន​ដែល​មន្ត្រី​នគរបាល​ទាំងអស់​មិន​ទាន់​បើក​ប្រាក់​ខែ​តាម​ធនាគារ ពិត​ជា​មាន​ការ​កាត់​កង​ខ្លះ​មែន ប៉ុន្តែ​លោក ជាង សុវណ្ណារិទ្ធិ មិន​ដែល​អសកម្ម​នឹង​ការងារ ឬ​ធ្វើ​ឲ្យ​កូន​ចៅ​ថ្នាំងថ្នាក់​ចិត្ដ​នោះ​ទេ។

ចំណែក​ស្នងការ​នគរបាល​ខេត្ត​កំពង់ឆ្នាំង លោក ឡុច សុវណ្ណរ៉ា បញ្ជាក់​ថា លោក​បាន​ទទួល​លិខិត​សម្រេច​របស់​អគ្គនាយកដ្ឋាន​បុគ្គលិក​កាល​ពី​បី​ថ្ងៃ​មុន ហើយ​បាន​ចាត់ចែង​ឲ្យ​មន្ត្រី​ផ្នែក​បុគ្គលិក​ធ្វើ​លិខិត​ទៅ​សាមី​ខ្លួន ដែល​មាន​ឈ្មោះ​ត្រូវ​រៀបចំ​សំណុំ​បែបបទ​ចូល​និវត្តន៍​ទាំងនោះ​ហើយ។ លោក​បដិសេធ​ថា លោក​មិន​បាន​ឃុបឃិត ឬ​ចង់​រក្សា​មន្ត្រី​ណា​ម្នាក់​មិន​ឲ្យ​ចូល​និវត្តន៍​តាម​ច្បាប់​កំណត់​នោះ​ទេ៖ «រឿង​ថា​ខ្ញុំ​ទុក​អ្នក​នេះ ឬ​អ្នក​នោះ ខ្ញុំ​មិន​មាន​សិទ្ធិ​ទេ តែ​មាន​ឈ្មោះ​ធ្លាក់​ពី​លើ​មក​យ៉ាង​ម៉េច ត្រូវ​តែ​អនុវត្ដ​តាម។ បើ​អ្នក​ទាំងអស់​ហ្នឹងបាន​មកបំពេញ​បែបបទ​គ្រប់​ហើយ ចប់​យើង​នឹង​បញ្ជូន​ទៅ​ហើយ ប៉ុន្តែ​ការ​កំណត់​ពេលវេលា ខ្ញុំ​មិន​ទាន់បាន​កំណត់​ទេ ព្រោះ​អា​ហ្នឹង​ក៏​គេ​អត់​បាន​កំណត់​ដែរ គេ​គ្រាន់​ថា​ឲ្យ​ឈ្មោះ​ទាំងអស់​ហ្នឹង ដើម្បី​បំពេញ​បែបបទ​ចូល​និវត្តន៍ ហើយ​យើង​កំពុង​តែ​ធ្វើ​ហើយ ប៉ុន្តែ​វាមិន​យូរ​ទេ ព្រោះ​គ្នា​តែ ១២​នាក់»

លិខិត​មួយ​ច្បាប់​ចុះ​ថ្ងៃ​ទី​២៧ ខែ​មករា ឆ្នាំ​២០១៧ របស់​អគ្គនាយកដ្ឋាន​បុគ្គលិក​នៃ​អគ្គស្នងការដ្ឋាន​នគរបាល​ជាតិ តម្រូវ​ឲ្យ​មន្ត្រី​នគរបាល​នៅ​ខេត្ត​កំពង់ឆ្នាំង ចំនួន ១២​រូប ដែល​មាន​អាយុ ៥៥​ឆ្នាំ ឬ​កើត​នៅ​ឆ្នាំ​១៩៦២ ដើម្បី​រៀបចំ​សំណុំ​បែបបទ​ចូល​និវត្តន៍។ លិខិត​ដដែល​បង្ហាញ​ថា អធិការ​ស្រុក​បរិបូរណ៍ លោក ជាង សុវណ្ណារិទ្ធិ មាន​ឈ្មោះ​ត្រូវ​ចូល​និវត្តន៍​នៅ​លេខ​រៀង​លើ​គេ ក្នុង​ចំណោម​មន្ត្រី​ទាំង ១២​រូប។

មន្ត្រី​នគរបាល​ជាតិ​ទាំង ១២​រូប​នោះ កំពុង​បម្រើ​ការងារ​នៅ​តាម​ប៉ុស្តិ៍​រដ្ឋបាល អធិការដ្ឋាន និង​ស្នងការដ្ឋាន​នគរបាល​ខេត្ត​កំពង់ឆ្នាំង ដែល​មាន​ឋានន្តរសក្ដិ​ជា​វរសេនីយ៍ត្រី វរសេនីយ៍ទោ និង​វរសេនីយ៍ឯក៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។