ប្រធានគណៈកម្មការវត្តឧទុម្ពរ ខេត្តកំពង់ឆ្នាំង បដិសេធថា មិនបានគំរាមព្រះចៅអធិការកាន់កាប់បច្ច័យរបស់វត្តទេ។ ការបដិសេធនេះ គឺបន្ទាប់ពីព្រះអនុគណស្រុករលាប្អៀរ ប្រតិកម្មនឹងប្រធានគណៈកម្មការវត្ត លោក ឡឹង ចិន្ដា ដែលទាមទារកាន់កាប់បច្ច័យពីព្រះចៅអធិការវត្តឧទុម្ពរ។
ប្រធាន និងសមាជិកគណៈកម្មការវត្តឧទុម្ពរ បានបញ្ជាក់ពីការគ្រប់គ្រងថវិកាកសាងរបងវត្តចំនួន ៥៦ប្រឡោះ ស្មើនឹងទឹកប្រាក់ ៥៦លានរៀល ដើម្បីឆ្លើយតបនឹងការចោទប្រកាន់របស់អនុគណស្រុករលាប្អៀរ ដែលចោទថា បើចៅអធិការវត្តឧទុម្ពរ មិនឲ្យ លោក ឡឹង ចិន្ដា ជាប្រធានគណៈកម្មការវត្តគ្រប់គ្រងបច្ច័យក្នុងវត្ត គេនឹងមិនឲ្យពុទ្ធបរិស័ទហែអង្គកឋិនទានចូលក្នុងវត្ត ដើម្បីទទួលបានបច្ច័យឡើយ។
ប្រធានគណៈកម្មការវត្តឧទុម្ពរ លោក ឡឹង ចិន្ដា ហៅ គីម ថ្លែងនៅថ្ងៃទី១ ខែសីហា ថា កាលពីខែកក្កដា ឆ្នាំ២០១៤ លោកស្នើឲ្យចៅអធិការព្រះនាម អឿ សំណាង បោះត្រាប្រគល់ការងារ និងថវិកាសម្រាប់កសាងរបងវត្តមែន តែមិនបានប៉ះពាល់ដល់បច្ច័យផ្សេងៗទៀតរបស់វត្តឡើយ។ លោកថា គណៈកម្មការវត្តមានតែខំកៀរគររកម្ចាស់កម្មវិធីបុណ្យផ្សេងៗ ដើម្បីទទួលបានបច្ច័យកសាងវត្ត តែបែរជាព្រះចៅអធិការវត្តប្រព្រឹត្តអំពើខុសឆ្គងជាច្រើន ហើយមកចោទរូបលោកថារារាំងមិនឲ្យពុទ្ធបរិស័ទដង្ហែអង្គកឋិនទាន ឬចូលធ្វើបុណ្យនៅក្នុងវត្តទៅវិញ៖ «កាលណោះលោក (ចៅអធិការព្រះនាម អឿ សំណាង) និមន្តមកខាងធម្មការប្រកាសថា លោកគ្រប់គ្រងទាំងលុយកាក់ស្អីៗ ហើយគណៈកម្មការគ្រាន់តែដឹងឮ។ ដល់ធ្វើរបងហ្នឹង ខ្ញុំអ្នកសុំទាមទារថា បើតេជគុណមិនឲ្យខ្ញុំករុណាកាន់លុយហ្នឹង ឲ្យខ្ញុំករុណាធ្វើរបងម៉េចកើត»។
អនុគណស្រុករលាប្អៀរ ព្រះនាម វង្ស កុសល សម្ដែងការមិនពេញចិត្តចំពោះប្រជាពុទ្ធបរិស័ទចំណុះជើងវត្តឧទុម្ពរ ដែលតែងតែរករឿងចោទប្រកាន់ចៅអធិការ ឬព្រះសង្ឃគង់នៅក្នុងវត្តតាំងពីសម័យសង្គមរាស្ដ្រនិយមមក។ ព្រះអង្គមានថេរដីកាថា រឿងផ្ដិតមេដៃសុំដកព្រះចៅអធិការវត្តឧទុម្ពរ អាចមានអ្នកញុះញង់នៅពីក្រោយពុទ្ធបរិស័ទ ខណៈដែលព្រះអង្គទទួលបានព័ត៌មានថា គណៈកម្មការវត្តមានការថ្នាំងថ្នាក់ជាមួយព្រះចៅអធិការ៖ «អាការៈថ្នាំងថ្នាក់ពេញចិត្ដមិនពេញចិត្ដមានមេញុះញង់ទេ អារឿងហ្នឹងនោះទាន! អាត្មាមានលេចឮរហូតអ៊ីចេះទៀតណោះ មានប្រធានគណៈកម្មការគំរាមលោករហូតដល់ថា បើលោកមិនឲ្យកាន់លុយទេ គាត់នឹងទៅប្រាប់ប្អូនគាត់ហែកឋិនចូលណាទៀតណោះ មានហែហូរអាត្មាក្ដាប់បាន»។
ទាក់ទងរឿងនេះដែរ ព្រះចៅអធិការវត្តឧទុម្ពរ ស្រុករលាប្អៀរ ត្រូវអ្នកភូមិឧទុម្ពរ ដែលជាពុទ្ធបរិស័ទចំណុះជើងវត្ត នាំគ្នាផ្ដិតមេដៃប្ដឹងទៅអាជ្ញាធរឃុំ ស្រុក និងមន្ទីរធម្មការ ដើម្បីសុំដកតំណែងចៅអធិការព្រះនាម អឿ សំណាង ចេញពីវត្ត ប៉ុន្តែបណ្ដឹងនេះនៅចម្រូងចម្រាសនៅឡើយ ដោយមន្ត្រីសង្ឃមិនទាន់ចុះស៊ើបអង្កេតឲ្យបានច្បាស់ ជុំវិញការចោទរបស់ប្រជាពុទ្ធបរិស័ទទៅលើព្រះចៅអធិការវត្តរូបនោះ។
ចៅអធិការព្រះនាម អឿ សំណាង ត្រូវពុទ្ធបរិស័ទចោទថា បានដើរលេងយប់ ចាក់ធុងបាសឮៗពេលយប់ ពោលពាក្យមិនសមជាសង្ឃ កិបកេងបច្ច័យ និងលេងល្បែង។ អ្នកភូមិក៏រិះគន់ដែរថា ពេលខ្លះចៅអធិការព្រះនាម អឿ សំណាង មិនបានគោរពវិន័យធម៌ក្នុងនាមជាព្រះសង្ឃ ដោយគង់កូតទ្រមើលពួកនេនៗ លាត់ស្បង់ចីពរលេងឈូសដាក់លុយក្នុងបរិវេណវត្តអារាមក៏មាន។
អធិករណ៍ ឬជម្លោះរវាងចៅអធិការជាមួយគណៈកម្មការវត្ត ពុទ្ធបរិស័ទនៅក្នុងវត្តឧទុម្ពរ ផ្ទុះឡើងតាំងពីពាក់កណ្ដាលឆ្នាំ២០១៥។ នៅព្រឹកថ្ងៃទី១ ខែសីហា ឆ្នាំ២០១៥ អ្នកភូមិឧទុម្ពរ នៃឃុំស្វាយជ្រុំ ប្រមាណ ៧០នាក់ បានជួបមេឃុំឲ្យជួយដោះស្រាយរឿងសុំដកតំណាងចៅអធិការរូបនេះ ប៉ុន្តែលោកមេឃុំមិនអាចដោះស្រាយបាន ហើយសន្យាថានឹងយកទៅជាក់ជូនអនុគណស្រុកពិនិត្យ និងដោះស្រាយវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។