កម្មករ​ជាង​១០០​នាក់​នៅ​ខេត្ត​កំពត​ប្រមូល​ផ្តុំ​គ្នា​តវ៉ា​ប្រឆាំង​នឹង​ក្រុមហ៊ុន​ស៊ីម៉ងត៍​ថៃ​ប៊ុនរ៉ុង

ដោយ យ៉ង ចាន់តារា
2016-03-07
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
រង្វង់​មូល​ខេត្ត​កំពត
រង្វង់​មូល​ខេត្ត​កំពត
Photo: RFA

កម្មករ​ជាង ១០០​នាក់​នៃ​ក្រុមហ៊ុន​ផលិត​ស៊ីម៉ងត៍ ថៃ ប៊ុនរ៉ុង ស្ថិត​នៅ​ភ្នំ​ល្អាង ស្រុក​ទឹកឈូ ខេត្ត​កំពត បាន​ប្រមូល​ផ្តុំ​គ្នា​នៅ​ព្រឹក​ថ្ងៃ​ទី​៧ ខែ​មីនា ដើម្បី​ទាមទារ​ឲ្យ​ក្រុមហ៊ុន អនុវត្ត​លក្ខខណ្ឌ​ការងារ​ជាច្រើន​ចំណុច​ដែល​ពួក​គេ​ចង់​បាន។ ការ​ប្រមូល​ផ្តុំ​នេះ ធ្វើ​ឡើង​តាំង​ពី​ម៉ោង ៨​ព្រឹក​រហូត​ដល់​ម៉ោង ១​រសៀល ទើប​កម្មករ​ទាំងអស់​រំសាយ​គ្នា ក្រោយ​ពេល​ក្រុមហ៊ុន​យល់ព្រម​ទទួល​យក​លក្ខខណ្ឌ​មួយ​ចំនួន។

ប្រធាន​សហព័ន្ធ​សហជីព​កម្មករ​សំណង់ និង​ព្រៃ​ឈើ​កម្ពុជា លោក សុខ គីន បាន​បញ្ជាក់​ក្រោយ​កិច្ច​ចរចា​ជាមួយ​តំណាង​ក្រុមហ៊ុន​ស៊ីម៉ងត៍ ថៃ ប៊ុនរ៉ុង ថា ក្រុមហ៊ុន​យល់ព្រម​ទទួល​យក​លក្ខខណ្ឌ ៤​ចំណុច​ក្នុង​ចំណោម ៦​ចំណុច​ដែល​កម្មករ​ទាមទារ។

ការ​ចរចា​ដែល​ឈាន​ដល់​ការ​យល់ព្រម​នេះ ធ្វើ​ឡើង​ដោយ​មាន​ការ​ចូលរួម​ពី​តំណាង​មន្ទីរ​ការងារ​ខេត្ត​កំពត មន្ត្រី​នៃ​ស្នងការដ្ឋាន​នគរបាល​ខេត្ត​កំពត អភិបាល​ស្រុក​ទឹកឈូ តំណាង​សហជីព និង​តំណាង​ក្រុមហ៊ុន​ស៊ីម៉ងត៍ ថៃ ប៊ុនរ៉ុង៖ «ជំហរ​របស់​កម្មករ ទោះ​បី​ជា​គាត់​មិន​សប្បាយ​ចិត្ត ១០០​ភាគរយ ប៉ុន្តែ​គាត់​អាច​ទទួល​យក​បាន​នូវ​លទ្ធផល​ដែល​យើង​ចរចា ពីព្រោះ​រឿង​ពីរ​ផ្សេង​ទៀត​នោះ ជា​រឿង​បន្ទាប់​បន្សំ»

លក្ខខណ្ឌ ៤​ចំណុច​ដែល​ក្រុមហ៊ុន​យល់ព្រម​ដោះស្រាយ​នោះ គឺ​ទទួល​យក​អនុប្រធាន​សហជីព​ដែល​ត្រូវ​បាន​បញ្ឈប់​ពី​ការងារ ឲ្យ​ចូល​ធ្វើ​ការ​វិញ សង​ប្រាក់​ខែ​កម្មករ​សម្រាប់​ខែ​មករា និង​ខែ​កុម្ភៈ ដែល​ក្រុមហ៊ុន​បាន​កាត់​នោះ​មក​វិញ អនុវត្ត​ច្បាប់​ឈប់​សម្រាក​ប្រចាំ​ឆ្នាំ​ឲ្យ​បាន​ត្រឹមត្រូវ និង​ផ្តល់​ថ្ងៃ​ឈប់​សម្រាក​បុណ្យ​ដោយ​មាន​ប្រាក់​ឈ្នួល​ឲ្យ​បាន​ត្រឹមត្រូវ។ ចំណែក​លក្ខខណ្ឌ ២​ចំណុច​ដែល​ក្រុមហ៊ុន​មិន​ទទួល​យក​នោះ គឺ​ការ​អនុវត្ត​ការ​ផ្តល់​ថ្លៃ​អាហារ​ដូចៗ​គ្នា​សម្រាប់​បុគ្គលិក​ទាំងអស់ និង​ការ​ដក​អ្នក​គ្រប់គ្រង​ការដ្ឋាន ដែល​កន្លង​មក​រង​ការ​ចោទ​ថា បាន​ជេរ​ប្រមាថ​កម្មករ​និយោជិត។

ប្រធាន​សហព័ន្ធ​សហជីព​កម្មករ​សំណង់ និង​ព្រៃ​ឈើ​កម្ពុជា លោក សុខ គីន អះអាង​ថា មុន​នឹង​ឈាន​ដល់​ការ​ព្រមព្រៀង​គ្នា​នេះ ក្រុមហ៊ុន​ហាក់​មិន​មាន​ចេតនា​ចង់​ចរចា​ឡើយ ដោយ​អូស​បន្លាយ​តាំង​ពី​ព្រឹក​រហូត​ដល់​ម៉ោង​ជាង ១១​ថ្ងៃ​ត្រង់ ទើប​ក្រុមហ៊ុន​អញ្ជើញ​ខាង​សហជីព និង​ភាគី​ពាក់ព័ន្ធ ប្រជុំ​រក​ដំណោះស្រាយ។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស លោក មឿន តុលា ដែល​បាន​តាម​ដាន​រឿង​នេះ ថ្លែង​ថា លោក​សាទរ​ចំពោះ​ដំណោះស្រាយ​ដែល​ក្រុមហ៊ុន​ផ្តល់​ឲ្យ​តាម​ការ​ទាមទារ​របស់​កម្មករ។ លោក មឿន តុលា បន្ថែម​ថា នៅ​ក្នុង​កាលៈទេសៈ​ណា​ក៏ដោយ សាមគ្គីភាព​ក្នុង​ចំណោម​កម្មករ ជា​រឿង​មួយ​ចាំបាច់​បំផុត​នៅ​ពេល​ដែល​ពួក​គេ​រង​ការ​រំលោភ​បំពាន​សិទ្ធិ​ការងារ៖ «បទពិសោធន៍​នៃ​សាមគ្គីភាព ការ​ជំរុញ​របស់​ភាគី​កម្មករ​និយោជិត​ឲ្យ​និយោជក​អនុវត្ត​អ្វី​ដែល​ខ្លួន​បាន​ព្រមព្រៀង​នៅ​ថ្ងៃ​នេះ។ អ៊ីចឹង​ខ្ញុំ​គិត​ថា ដើម្បី​បញ្ចប់​រឿង​នេះ ភាគី​ក្រុមហ៊ុន​គួរ​តែ​អនុវត្ត​នូវ​អ្វី​ដែល​ខ្លួន​ព្រមព្រៀង​គ្នា​នៅ​ថ្ងៃ​ទី​៧ មីនា នេះ»

កម្មករ​ជាង ១៣០​នាក់​នៃ​ក្រុមហ៊ុន​ផលិត​ស៊ីម៉ងត៍ ថៃ ប៊ុនរ៉ុង ធ្លាប់​បាន​ធ្វើ​កូដកម្ម​មិន​ចូល​ធ្វើ​ការ​ម្តង​រួច​មក​ហើយ​កាល​ពី​ថ្ងៃ​ទី​២ មីនា ប៉ុន្តែ​ដោយ​មាន​ការ​សម្រប​សម្រួល​ពី​មន្ត្រី​នៃ​មន្ទីរ​ការងារ​ខេត្ត​កំពត និង​ការ​សន្យា​របស់​ក្រុមហ៊ុន ទើប​ពួក​គេ​យល់ព្រម​ចូល​ធ្វើ​ការ​វិញ។

តាម​រយៈ​ដំណោះស្រាយ​នៅ​ថ្ងៃ​ទី​៧ មីនា កម្មករ​ទាំងអស់​ដែល​ធ្វើ​កូដកម្ម នឹង​វិល​ចូល​ធ្វើ​ការ​វិញ​នៅ​ថ្ងៃ​ទី​៩ មីនា ខាង​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល