ប្រជាពលរដ្ឋជាសាច់ញាតិយោធិនពលី កំពុងជួបការលំបាកដោយសារខ្វះខាតលុយកាក់ ដើម្បីយកទៅសងម្ចាស់បំណុលវិញ បន្ទាប់ពីបានខ្ចីសម្រាប់យកទៅធ្វើបុណ្យសពនោះ។
សាច់ញាតិយុទ្ធជនពលីរស់នៅភូមិប្រហ៊ូត ឃុំត្រពាំងស្រែ នៃស្រុកមេសាង លោក ស៊ឹម កុសល ថ្លែងនៅថ្ងៃទី២១ ធ្នូ ថាលោកបានទៅសាកសួរសុំបើកប្រាក់សមាគមយោធិនពលីពីមន្ត្រីសង្គមកិច្ចស្រុកនេះជាច្រើនដងរួចមកហើយ ប៉ុន្តែមន្ត្រីសង្គមកិច្ចរូបនេះហាក់ធ្វើព្រងើយកន្តើយ ដោយឆ្លើយដោះសាម្តងថាខែនេះ ម្តងថាខែនោះ អូសបន្លាយពេលជាបន្តបន្ទាប់ ដោយពុំបានរកវិធីដោះស្រាយឲ្យពួកគេនោះទេ។
លោក ស៊ឹម កុសល៖ «ខាងក្រសួងសង្គមកិច្ច ហ្នឹង គេឲ្យធ្វើលិខិតមរណភាពហ្នឹង ធ្វើហើយអស់រលីង រៀបចំអស់ហើយ។ ក្រសួងសង្គមកិច្ច គេថារយៈពេល ៦ខែ បានលុយហើយ។ ដល់ ៦ខែអត់ឃើញ រយៈពេលមួយឆ្នាំ។ ឥឡូវម៉ែខ្ញុំគាត់ស្លាប់រយៈពេលជិត ២ឆ្នាំហើយ អត់ឃើញបានលុយវិញទេ ទទេ! អត់មានដែលបានមួយរៀល។ អត់ដឹងផងលោកគ្រូ ក្រសួងសង្គមកិច្ច គេមិនទាន់ដល់លេខរៀងៗមិនដឹងយ៉ាងម៉េចគេទេ អត់ដឹងមូលហេតុគេតែម្ដង»។
លោក ស៊ឹម កុសល បញ្ជាក់បន្ថែមថា ប្អូនរបស់លោកជាមន្ត្រីយោធា បានស្លាប់ក្នុងសមរភូមិនៅខេត្តកំពង់ចាម កាលពីឆ្នាំ១៩៨៤។ លោកថា ក្រោយពីមន្ត្រីយោធិនបានស្លាប់ទៅ ម្ដាយរបស់ខ្លួនបានបង្វែរប្រាក់ខែរបស់យោធិនពលីដាក់ក្នុងសមាគមពលីនៅស្រុកមេសាង ដើម្បីរក្សាទុកប្រាក់ទាំងនោះទៅប្រើប្រាស់សម្រាប់ធ្វើបុណ្យសពអោយម្ដាយរបស់យោធិនពលីនោះវិញ។ ប៉ុន្តែ បន្ទាប់ពីម្ដាយរបស់លោកបានស្លាប់អស់រយៈពេលជិត ២ឆ្នាំទៅហើយ ក៏នៅពុំបានទទួលប្រាក់បន្តិចណាពីសមាគមពលីនៅស្រុកមេសាង នេះនៅឡើយទេ។
ប្រជាពលរដ្ឋ ឲ្យដឹងថា សមាជិកម្នាក់នៃសមាគមពលី នឹងទទួលបានប្រាក់ប្រហែល ៤លានរៀល សម្រាប់ធ្វើបុណ្យទានពេលស្លាប់។
ឆ្លើយតបនឹងបញ្ហានេះ ប្រធានការិយាល័យសង្គមកិច្ចស្រុកមេសាង លោក យី សុផល មានប្រសាសន៍ថា ម្ដាយរបស់យោធិនពលីពិតជាបានបង់ប្រាក់ចូលក្នុងសមាគមពលី ដាក់ក្នុងនាមម្ដាយយោធិនពលីប្រាកដមែន។ លោកបញ្ជាក់ថា ក្នុងពេលឆាប់ៗនេះ សមាគមពលីស្រុកនឹងប្រគល់ប្រាក់ដែលគាត់បានបង់ក្នុងសមាគម ទៅឲ្យសាច់ញាតិរបស់គាត់យកទៅរៀបចំធ្វើបុណ្យសពម្ដាយយោធិនពលី។ លោកបន្តថា ចំពោះសំណុំឯកសារ លោកបានរៀបចំបញ្ជូនទៅក្រសួងសង្គមកិច្ច អស់ទៅហើយ។ ហើយបញ្ហាការយឺតយ៉ាវ ដោយសារមានឈ្មោះអ្នកស្លាប់ដែលបានចូលក្នុងសមាគមពលីមានចំនួនច្រើន នាំឲ្យមានការកកស្ទះ។
លោក យី សុផល៖ «អត់មានលុយផ្ដល់ឲ្យ វាច្រើនពេក ដល់អ៊ីចឹងរដ្ឋាភិបាលក៏គេគិតដែរ មិនមែនថាគេមិនគិតទេ គ្រាន់តែថាលុយវារត់អត់ទាន់ វាច្រើនពេក។ អ្នកស្លាប់វាច្រើន ក្នុងមួយខេត្តស្លាប់ច្រើន អ៊ីចឹងវាមិនអាចរត់ទាន់ទេ លុយយើងកាត់បង់ប្រចាំខែមានដែរ ប៉ុន្តែដោះស្រាយវាអត់ទាន់។ មិនមែនគេមិនឲ្យទេ គ្រាន់តែថាលុយហ្នឹងវារាងយូរបន្តិច»។
ទោះជាយ៉ាងនេះក្ដី សាច់ញាតិយោធិនពលីបង្ហើបថា កន្លងមក ក្រុមគ្រួសាររបស់យោធិនពលីតែងតែជួបការលំបាកទាំងបញ្ហាបើកប្រាក់ខែ និងប្រាក់បំណាច់ផ្សេងៗ តែងមានការយឺតយ៉ាវជាប្រចាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។