ក្រុមអាជីវករផ្សារដើមគ ជាច្រើនរយនាក់ បានប្រមូលផ្តុំគ្នាសាជាថ្មី ដើម្បីតវ៉ាប្រឆាំងនឹងការរុះរើផ្សារ។ ការប្រមូលផ្តុំគ្នា ចាប់ផ្ដើមតាំងពីម៉ោង ៦ព្រឹករហូតដល់ម៉ោង ៩ព្រឹកថ្ងៃទី១៧ សីហា ទើបក្រុមអាជីវករសម្រេចរំសាយ ក្រោយពីមន្ត្រីខុទ្ទកាល័យលោកនាយករដ្ឋមន្ត្រី ចេញមកទទួលយកញត្តិ និងសន្យាដោះស្រាយបញ្ហានេះ។
អាជីវករផ្សារដើមគ នៅរាជធានីភ្នំពេញប្រមាណ ៥០០នាក់ បានប្រមូលផ្តុំគ្នានៅជិតផ្ទះ លោក ហ៊ុន សែន ក្បែរវិមានឯករាជ្យនៅព្រឹកថ្ងៃទី១៧ ខែសីហា ដើម្បីទាមទារឲ្យលោកនាយករដ្ឋមន្ត្រី ជួយអន្តរាគមន៍ឲ្យពួកគាត់អាចបន្តលក់ដូរនៅកន្លែងរបស់ខ្លួនរហូតដល់ចប់កុងត្រា។
ការប្រមូលផ្តុំគ្នាតវ៉ានេះ កើតឡើងសាជាថ្មីម្តងទៀត ក្រោយពេលអាជ្ញាធរផ្សារនៅបន្តការវាស់វែងតទៅទៀត ដែលធ្វើឲ្យក្រុមអាជីវករបារម្ភខ្លាចមានការរុះរើផ្សារនៅមុនអាណត្តិនៃកិច្ចសន្យា។
កិច្ចសន្យាជួលតូប និងស្តង់របស់អាជីវករមានរយៈពេល ១០ឆ្នាំ គិតចាប់ពីថ្ងៃទី១១ ខែឧសភា ឆ្នាំ២០១១ រហូតដល់ថ្ងៃទី១១ ខែឧសភា ឆ្នាំ២០២១ ហើយតូប និងស្តង់សរុបនៅក្នុងផ្សារមានចំនួន ៨២៥។ អាជីវករម្នាក់ៗ ត្រូវបង់ប្រាក់អាណត្តិ ១០ឆ្នាំចាប់ពី ៦៥ម៉ឺនរៀល ដល់ជាង ៣លានរៀល ទៅតាមទំហំតូប ឬស្តង់នីមួយៗ។
ក្រុមអាជីវករ បានអះអាងថា ចេតនាណាមួយក្នុងការរុះរើផ្សារមុនអាណត្តិ មានន័យស្មើនឹងការបំផ្លាញឆ្នាំងបាយរបស់ពួកគាត់៖ «ខ្ញុំមកចង់ឲ្យសម្ដេចជួយពីរឿងឆ្នាំងបាយរបស់ខ្ញុំ ព្រោះអាណត្តិខ្ញុំវាដល់ឆ្នាំ២០២១ ហើយទៅផ្សារហ្នឹងគេចង់រុះរើមុនអាណត្តិ ហើយប្រធានផ្សារគាត់មានការវាស់វែងធ្វើឲ្យពួកអាជីវកម្មយើងខ្ញុំព្រួយបារម្ភ។ គាត់លឹបលៗ ពេលសួរគាត់ គាត់មានប្រសាសន៍ថាអត់ដឹង។ ពួកខ្ញុំជាជនក្រីក្រលក់ដូរមួយថ្ងៃគ្រាន់ចិញ្ចឹមជីវិតមួយថ្ងៃ ហើយបើរុះរើទៅ ពួកខ្ញុំអត់ដឹងថាទៅលក់នៅឯណាទេ? ចា៎! អត់មានមុខរបររកស៊ីអីផ្សេងក្រៅពីផ្សារដើមគ ទេ»។
ការទាមទាររបស់ក្រុមអាជីវករ ត្រូវបាន លោក ប៉ាល់ ចន្ទតារា ប្រធានគណៈកម្មការចម្រុះ ទទួល និងដោះស្រាយពាក្យបណ្ដឹង នៃខុទ្ទកាល័យលោកនាយករដ្ឋមន្ត្រី ហ៊ុន សែន ចេញមកទទួលយកញត្តិ ហើយលោកសន្យាជាឱឡារិកថា នឹងដោះស្រាយបញ្ហានេះឲ្យបានឆាប់រហ័ស។ លោកបញ្ជាក់បន្ថែមថា អភិបាលរងសាលារាជធានីភ្នំពេញ លោក ឃួង ស្រេង បាននិយាយជាមួយលោកថា នឹងមិនមានការរុះរើផ្សារដើមគ នេះឡើយ៖ «និយាយជាមួយបងប្អូន ទទួលយកញត្តិបងប្អូនភ្លាម ធ្វើការជូនបងប្អូនភ្លាម។ ទាក់ទងទៅគាត់ (លោក ឃួង ស្រេង) គាត់ថាអត់មានទេ។ ខ្ញុំថាចុះពីណាគេទៅវាស់អីនៅផ្សារហ្នឹង? គាត់ថាគោលការណ៍សាលាក្រុងគ្មានការវាស់វែងអ្វីនោះទេ។ បើគ្មានការឯកភាពពីអាជីវករទេ ផ្សារហ្នឹង គឺគ្មានការសាងសង់ទេ»។
ក្រៅពីការចង់បានតាមកិច្ចសន្យា ក្រុមអាជីវករក៏បានទាមទារឲ្យដក លោក សេង សារ៉ន ប្រធានផ្សារដើមគ ដែរ ដោយលើកឡើងថា លោក សេង សារ៉ន មិនយកចិត្តទុកដាក់លើបញ្ហាអនាម័យរបស់ផ្សារ៖ «ដកប្រធានផ្សារចេញ ហើយដូរប្រធានផ្សារថ្មី ព្រោះប្រធានផ្សារតាំងពីគាត់មក អត់មានធ្វើអ្វីទាំងអស់។ រឿងអនាម័យជុំវិញផ្សារ សួរអ្វីក៏មិនដឹង ហើយមិនចេះបាញ់ទឹកបាញ់អីទេ។ បើប្រធានផ្សារមុន មួយអាទិត្យបាញ់ម្តង។ សណ្ដាប់ធ្នាប់អនាម័យហ្នឹងជារឿងរបស់ប្រធានផ្សារអសមត្ថភាព គាត់មិនព្រមធ្វើ។ ពេល (មន្ត្រី) សាលាក្រុងចុះមក គាត់ឲ្យសាលាក្រុងហ្នឹងដើរកាត់ភក់ជ្រាំអ៊ីចឹងទៅ។ គាត់អត់មានសម្អាតទេ។ តាមពិតរៀបសណ្ដាប់ធ្នាប់តែជុំវិញទៅ វាល្អហើយផ្សារហ្នឹង។ ពេលបន្លែមកដល់ផ្លូវមុន្នីរ៉េត ចាក់ហៀរដូចទីផ្សារសំរាមអ៊ីចឹង រួចចេះតែចោទគ្នានៅក្នុងប៉ុន្មានតូបហ្នឹង។ គ្នាមានទៅប៉ះពាល់អី មានតែព័ទ្ធធ្វើបាបគ្នាវិញ លក់អត់ដាច់ស្ងាត់ឈឹង។ គណៈកម្មការផ្សារបណ្តោយឲ្យលក់យ៉ាងអនាធិបតេយ្យ»។
ឆ្លើយតបនឹងការចោទប្រកាន់របស់ក្រុមអាជីវករ លោក សេង សារ៉ន ប្រធានផ្សារដើមគ បានអះអាងដោយខ្លីថា បញ្ហាអនាម័យជាបន្ទុករបស់សាលារាជធានីភ្នំពេញ៖ «អាហ្នឹងខ្ញុំមិនអាចបកស្រាយបានទេ ព្រោះពាក់ព័ន្ធនឹងក្រុមហ៊ុនវិនិយោគ ទាល់តែសាលារាជធានីទើបអាចឆ្លើយបាន។ ចំពោះខ្ញុំ ខ្ញុំអត់ហ៊ានជម្រាបជូនទេបាទ»។
នេះជាលើកទីពីរហើយដែលអាជីវករផ្សារដើមគ បានប្រមូលផ្តុំគ្នាតវ៉ាប្រឆាំងនឹងគម្រោងរុះរើផ្សារ។ ការតវ៉ាលើកដំបូង ផ្ទុះឡើងនៅថ្ងៃទី២២ ខែកក្កដា ឆ្នាំ២០១៥ ហើយដោយសារមិនមានការឆ្លើយតបជាក់លាក់ពីអាជ្ញាធរផ្សារ និងសាលាក្រុងភ្នំពេញ ទើបក្រុមអាជីវករលើកគ្នាមកតវ៉ាដល់គេហដ្ឋានលោកនាយករដ្ឋមន្ត្រី ហ៊ុន សែន ដើម្បីស្នើសុំអន្តរាគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។