សិក្ខាសាលាថ្នាក់ជាតិស្ដីអំពីគោលនយោបាយចំពោះការបើកបរក្រោមឥទ្ធិពលគ្រឿងស្រវឹង ដែលអង្គការ៣រួមគ្នារៀបចំធ្វើឡើង នៅព្រឹកថ្ងៃទី៦ ខែវិច្ឆិកា នោះ បានសិក្សាស្រាវជ្រាវរកឃើញថា ខេត្តក្រុងសំខាន់ៗចំនួន៥ មានករណីគ្រោះថ្នាក់ចរាចរណ៍ច្រើនជាងគេ។
នាយកវិទ្យាស្ថានតស៊ូមតិ និងគោលនយោបាយ លោក ណែប ស៊ីនថៃ មានប្រសាសន៍ថា ខេត្តទាំង៥ នោះ រួមមាន ខេត្តកំពង់ស្ពឺ កំពង់ចាម តាកែវ កណ្ដាល និងខេត្តបាត់ដំបង។ លោកថា ឥរិយាបថអ្នកបើកបរយានយន្តនៅតែមិនមានការថយចុះ ក្របខ័ណ្ឌច្បាប់ចរាចរណ៍កម្ពុជា នៅខ្វះចន្លោះ ការផ្សព្វផ្សាយអំពីសុវត្ថិភាពចរាចរណ៍នៅមានកម្រិតទាបជាងការផ្សព្វផ្សាយពាណិជ្ជកម្មគ្រឿងស្រវឹង ដែលរដ្ឋាភិបាលគួរពិចារណាបន្ថែមទៀត។
សេចក្ដីប្រកាសព័ត៌មានរបស់អង្គការស្ថាប័នទាំងនេះ បានបង្ហាញថា ការផ្សព្វផ្សាយគ្រឿងស្រវឹង ហេដ្ឋារចនាសម្ព័ន្ធផ្លូវថ្នល់មិនល្អ ការមិនយល់ដឹងអំពីច្បាប់ និងមិនគោរពច្បាប់ចរាចរណ៍ ដោយអ្នកប្រើប្រាស់ផ្លូវថ្នល់ គឺជាមូលហេតុនាំមុខមួយនៃការស្លាប់នៅប្រទេសកម្ពុជា ក្នុងចំណោមមនុស្សពេញវ័យដែលមានអាយុ ២០ ទៅ ២៩ឆ្នាំ។ គិតត្រឹមឆ្នាំ២០១២ តួលេខគ្រោះថ្នាក់ចរាចរណ៍មានចំនួនជាង ៤.២៥០ករណី ដែលក្នុងចំនួននេះធ្វើឱ្យមនុស្សស្លាប់ប្រមាណ ២ពាន់ (១.៩៦៦នាក់) និងរបួសធ្ងន់ជាង ៥ពាន់នាក់ (៥.៣៤៩នាក់)។ ក្នុងចំណោមតួលេខទាំងនេះ មាន ១៣% បង្កគ្រោះថ្នាក់ចរាចរណ៍ដោយសារតែការបើកបរនៅពេលស្រវឹង។
អគ្គនាយករងផ្នែកដឹកជញ្ជូន និងជាអគ្គលេខាធិការគណៈកម្មការជាតិសុវត្ថិភាពចរាចរណ៍ គឺលោក ពៅ ម៉ាលី មានប្រសាសន៍ថា ករណីគ្រោះថ្នាក់ចរាចរណ៍ ៩៦% គឺបណ្ដាលមកពីកត្តាមនុស្សដែលជាអ្នកបើកបរ។ តាមការប៉ាន់ស្មាន គ្រោះថ្នាក់ចរាចរណ៍ដោយការបើកបរក្រោមឥទ្ធិពលគ្រឿងស្រវឹង អាចមានចំនួនច្រើនជាង ១៣% នៃករណីគ្រោះថ្នាក់ចរាចរណ៍ទូទាំងប្រទេស។
តំណាងម្ចាស់ជំនួយ និងអង្គការសុវត្ថិភាពចរាចរណ៍ផ្លូវគោកជាសកល (GRSP=Global Road Safety Partnership) លោក រ៉េអូល ផាវលូវស្គី (Raoul Powlowski) ដែលធ្វើការនៅប្រទេសកម្ពុជា ថ្លែងថា នៅលើពិភពលោក មានមនុស្សជាង ១លាន ២សែននាក់ស្លាប់ និងចំនួន ២០ ទៅ ៥០លាននាក់ទៀត រងរបួសបណ្ដាលមកពីគ្រោះថ្នាក់ចរាចរណ៍ជារៀងរាល់ឆ្នាំ។ លោកថា ប្រសិនបើមិនមានវិធានការណាមួយ គ្រោះថ្នាក់ចរាចរណ៍នឹងក្លាយជាមូលហេតុទី៥ ដែលធ្វើឱ្យមនុស្សស្លាប់ទូទាំងពិភពលោក។
បន្ទាប់ពីការរកឃើញកត្តាគ្រោះថ្នាក់ចរាចរណ៍នៅកម្ពុជា អ្នកចូលរួមសិក្ខាសាលាផ្ដល់អនុសាសន៍ចំនួន ១០ ដែលមានជាអាទិ៍ គឺតម្រូវមានច្បាប់ចរាចរណ៍ និងគោលនយោបាយ ឬអនុក្រឹត្យស្ដីពីការបើកបរក្រោមឥទ្ធិពលគ្រឿងស្រវឹង គួរតែបានអនុម័តនៅក្នុងអាណត្តិរដ្ឋាភិបាលទី៥ ដែលជាច្បាប់ ឬបទបញ្ញត្តិត្រូវការចាំបាច់សម្រាប់កាត់បន្ថយគ្រោះថ្នាក់ចរាចរណ៍ ដែលបណ្ដាលមកពីគ្រឿងស្រវឹង។
ទាក់ទងនឹងបញ្ហានេះ តំណាងនាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ លោក ថី វិសាល ថ្លែងថា រដ្ឋាភិបាលកំពុងធ្វើសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មី ដែលពេលនេះ ទីស្ដីការគណៈរដ្ឋមន្ត្រីកំពុងពិនិត្យ។ លោកបញ្ជាក់ថា មាត្រា ៧៧ នៃច្បាប់ចរាចរណ៍ថ្មីនេះ នឹងបង្កើនការផាកពិន័យ ៥ដង និងផ្ដន្ទាទោសធ្ងន់ធ្ងរចំពោះករណីគ្រោះថ្នាក់ចរាចរណ៍បើកបរក្រោមឥទ្ធិពលគ្រឿងស្រវឹង។
ទោះជាដូច្នេះក្ដី លោកថ្លែងថា ការផ្ដន្ទាទោសនេះនៅមិនទាន់ប្រាកដប្រជានៅឡើយទេ រហូតទាល់តែរដ្ឋសភាអនុម័ត និងប្រកាសឱ្យប្រើប្រាស់ជាផ្លូវការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។