យ៉ាងណា មន្ត្រីជំនាញជលផលខេត្តកំពង់ឆ្នាំង អះអាងថា គេនៅមិនទាន់ដឹងច្បាស់អំពីទិន្នផលត្រីឆ្នាំនេះថាមានការថយចុះ ឬកើនឡើងកម្រិតណានៅឡើយទេ ពីព្រោះត្រីប្រហុកអាចនឹងបន្តត្រូវរហូតដល់ថ្ងៃទី១២ ខែមករា ឆ្នាំ២០១៤ ខាងមុខ។
ក្រុមអាជីវកម្មធ្វើប្រហុកផ្អក នៅខេត្តកំពង់ឆ្នាំង បញ្ជាក់ថា ការស្វែងរកទិញត្រីប្រហុកឆ្នាំនេះ ពិបាកជាងឆ្នាំមុន ហើយគុណភាពក៏មិនសូវល្អដែរ។
ក្រុមអាជីវករទាំងខ្មែរ និងវៀតណាម ដែលកំពុងឈរចាំទទួលទិញ និងលក់ត្រីបន្តទៅឲ្យប្រជាពលរដ្ឋ សុទ្ធតែបានអះអាងស្រដៀងគ្នាថា ឆ្នាំនេះទិន្នផលត្រីដែលប្រជានេសាទចាប់បាន គឺជាប្រភេទត្រីល្អិតៗ ហើយរយៈពេលត្រីត្រូវនៅឆ្នាំនេះមិនបានច្រើនថ្ងៃជាប់ៗគ្នាដូចឆ្នាំមុនឡើយ៖ «ម្សិលម្ង៉ៃម្សិលមិញ ថ្ងៃហ្នឹងអត់ ម្សិលមិញឃើញមនុស្សមកច្រើន។ ត្រីឃើញឆ្នាំទៅវាត្រូវល្មមៗ វាមានច្រើនថ្ងៃណាស់ ហើយឥឡូវឆ្នាំហ្នឹងត្រូវតែ ២ថ្ងៃ អត់ទេតិចជាងឆ្នាំមុន។ អត់! បងមានត្រីឯណា បងឯងទៅមើលលើផែស្អាតចែស អស់ហើយហ្នឹង។ ខ្ញុំលក់ឲ្យគាត់តែ ១៥ (១.៥០០រៀល) វិញទេហ្នឹងនោះ ព្រោះខ្ញុំអត់ម៉ូតូដឹក»។
ប្រជាពលរដ្ឋម្នាក់មកពីស្រុកគងពិសី ខេត្តកំពង់ស្ពឺ លោក ឆាយ អ៊ិត បានប្រាប់វិទ្យុអាស៊ីសេរី នៅថ្ងៃទី៨ ខែមករា ថា លោកត្រូវការត្រីប្រហុកជាង ៤០០គីឡូក្រាម ក៏ប៉ុន្តែរយៈពេលពីរបីថ្ងៃមកនេះ លោកទើបតែទិញត្រីបានចំនួន ៦០គីឡូក្រាមប៉ុណ្ណោះ៖ «ពេលមុនពូរកនៅឯណា? នៅព្រែកព្នៅ ទៅព្រែកព្នៅ ១គីឡូ ១.២០០ ទៅ ១.៣០០ ទើបលើកនេះឮតែគេថាគេមកនេះគ្រាន់ធូរថ្លៃ ដល់ពេលមកដល់នេះតម្លៃវា ២ពាន់រៀល ទៅ ១.៥០០រៀលក្នុង១គីឡូក្រាម»។
ចំណែកប្រជាពលរដ្ឋម្នាក់ទៀតមកពីស្រុកចម្ការលើ ខេត្តកំពង់ចាម អ្នកស្រី ណយ ចាន់ថុល បានឲ្យដឹងបន្ថែមថា អ្នកស្រី និងគ្រួសារ បានមករកទិញត្រីប្រហុកនៅកំពង់ផែផ្សារក្រោមនេះអស់រយៈពេល ៤ថ្ងៃមកហើយ។ អ្នកស្រីបន្តថា ត្រីប្រហុកបានចាប់ផ្ដើមត្រូវនៅថ្ងៃទី៥ ទី៦ និងទី៧ ក៏ប៉ុន្តែនៅថ្ងៃទី៨ ខែមករា ត្រូវនឹងថ្ងៃ៨កើត ខែបុស្ស ដែលគេតែចំណាំថានឹងមានត្រីត្រូវច្រើននោះ បែរជាអត់មានត្រីទៅវិញ។
ទាក់ទងនឹងបញ្ហានេះ ប្រធានរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន មានប្រសាសន៍បញ្ជាក់ថា លោកមិនដឹងថាប្រជាពលរដ្ឋសំអាងទៅលើមូលដ្ឋានអ្វីខ្លះ ដែលអះអាងថាផលនេសាទឆ្នាំនេះមានការថយចុះនោះទេ ក៏ប៉ុន្តែខាងលោកមានមូលដ្ឋានច្បាស់លាស់មួយចំនួន ដូចជា ឆ្នាំនេះមានទឹកជំនន់ធំ ហើយកំណើននៃការហូរចូលកូនត្រីនៅក្នុងរដូវវស្សាមានជាង ៤០០ក្បាលក្នុងផ្ទៃទឹក ១ម៉ែត្រគូប។ ម្យ៉ាងវិញទៀត កិច្ចការពារប្រភពធនធានជលផលកាន់តែមានភាពល្អប្រសើរជាងមុន៖ «ចំពោះពីរខ្នើតពីដើមរដូវនេសាទមក ឃើញមានផលនេសាទហ្នឹងកើនឡើង ប៉ុន្តែខ្នើតនេះយើងមិនទាន់ធ្វើការបូកសរុបនៅឡើយទេ។ យើងអាចប្រៀបធៀបបាននៅពេលចប់ខ្នើត ហើយនៅថ្ងៃទី៨ ម៉ោងនេះខ្ញុំទទួលព័ត៌មានថាថយចុះប្រហែលជា ២០% នៅម៉ោង៩»។
លោកបញ្ជាក់ថា ត្រីចាប់ផ្ដើមត្រូវតាំងពីថ្ងៃទី២ ខែមករា ហើយអាចនឹងបន្តត្រូវរហូតដល់ថ្ងៃទី១២ ខែមករា ត្រូវនឹងថ្ងៃទី១២កើត ខែបុស្ស។ សម្រាប់ខេត្តកំពង់ឆ្នាំង គេអាចទៅរកទិញត្រីសម្រាប់ធ្វើប្រហុក ឬផ្អកបាននៅតាមទីតាំងសំខាន់ៗមួយចំនួន ដូចជា នៅកំពង់ផែផ្សារក្រោម ស្ថិតនៅទីរួមខេត្តកំពង់ឆ្នាំង នៅកំពង់ផែកំពង់ប្រាសាទ ស្ថិតនៅស្រុកកំពង់ត្រឡាច និងកំពង់ផែឆ្នុកទ្រូ ស្រុកកំពង់លែង ខេត្តកំពង់ឆ្នាំង ជាដើម។ ក្រុមប្រជាពលរដ្ឋដែលបានទៅដល់កំពង់ផែ និងទិញត្រីធ្វើប្រហុកភាគច្រើនបានត្អូញត្អែរថា ប្រភេទត្រីល្អិតៗ និងមានត្រីខ្លះអន់សាច់ទៅហើយ នៅតែមានតម្លៃថ្លៃចាប់ ១ពាន់ ២រយរៀល ដល់ ២ពាន់រៀលទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។