ប្រជាពលរដ្ឋជាអ្នកនេសាទនៅភូមិសល្ងាច ឃុំកំពង់ចិនខាងជើង ស្រុកស្ទោង ខេត្តកំពង់ធំ បានតវ៉ាថា មានមន្ត្រីរដ្ឋបាលជលផលចុះទៅចាប់អ្នកនេសាទទារលុយ ជាថ្នូរការដោះលែង និងប្រព្រឹត្តអំពើពុករលួយ។ ប្រជាពលរដ្ឋបានដាក់ពាក្យប្ដឹងទៅអង្គភាពប្រឆាំងអំពើពុករលួយ និងទាមទារឲ្យអាជ្ញាធរមានសមត្ថកិច្ច ជួយអ្នកស្រុកផង។
ប្រជាពលរដ្ឋជាអ្នកនេសាទ ១៤៣គ្រួសារ រស់នៅភូមិសល្ងាច បានទាមទារឲ្យអាជ្ញាធរមានសមត្ថកិច្ចដក លោក ជុល ថាច នាយរងខណ្ឌរដ្ឋបាលជលផលខេត្តកំពង់ធំ ចេញពីមុខតំណែង ដោយសារលោកប្រព្រឹត្តអំពើពុករលួយគាបសង្កត់ទារលុយអ្នកនេសាទ។
នៅក្នុងពាក្យប្ដឹងទាមទារសុំជួយអន្តរាគមន៍របស់អ្នកភូមិសល្ងាច ដោយមានស្នាមផ្ដិតមេដៃមនុស្ស ១៤៣គ្រួសារផងនោះ ប្រជាពលរដ្ឋបានចោទថា លោក ជុល ថាច បានដឹកនាំកម្លាំងចុះចាប់អ្នកនេសាទ និងជំរិតទារប្រាក់បានរាប់រយលានរៀល។
លោក ទោ អេល ជាតំណាងប្រជាពលរដ្ឋអ្នកនេសាទ ១៤៣គ្រួសារ ដែលបានដាក់ពាក្យប្ដឹងទៅអង្គភាពប្រឆាំងអំពើពុករលួយអំពីករណី លោក ជុល ថាច បានឲ្យដឹងនៅថ្ងៃទី១២ វិច្ឆិកា ថា ប្រជាពលរដ្ឋអ្នកនេសាទមិនអាចរកត្រីលក់ចិញ្ចឹមជីវិតបានទេ បើសិនជាមន្ត្រីជលផលដូច លោក ជុល ថាច នេះនៅតែធ្វើបាបរាល់ថ្ងៃ៖ «ជលផលនៅខេត្តកំពង់ធំ នេះ គាត់តែងមកដេកចាំក្នុងព្រៃនេះឯង ដើរយកលុយយកកាក់ប្រជាពលរដ្ឋ។ នៅភូមិខ្ញុំ ១ក្រុម ៤ ទៅ ៥នាក់ ទារសុទ្ធតែ ១លាន ២លានជាង។ អ្នកដើររកស៊ីដាក់លបដាក់អីនេះ។ គេមិនឲ្យលុយចាប់ ហើយឲ្យលោះទៀត។ ចង់ឲ្យគាត់ឈប់ធ្វើបាបប្រជាពលរដ្ឋទៅ បើចឹងមានតែធ្លាក់ពីតំណែងទៅ បើធ្វើបាបប្រជាពលរដ្ឋយ៉ាងនេះ។ ប្រជាជននៅទន្លេនេះរកស៊ីវេទនាណាស់»។
ប្រជាពលរដ្ឋមួយរូបទៀតដែលអះអាងថា ជាតំណាងប្រជាពលរដ្ឋចូលរួមដាក់ពាក្យប្ដឹងដែរនោះ មានប្រសាសន៍ថា ប្រជាពលរដ្ឋចាប់ត្រីបានតិចតួច ត្រូវក្រុម លោក ជុល ថាច ចាប់ឧបករណ៍នេសាទ ហើយចាប់មនុស្សទៀត និងទាមទារប្រាក់៖ «គាត់អត់មានវាយតប់អីទេ ប៉ុន្តែយ៉ាប់អារឿងគាត់ទារលុយ ប្រជាពលរដ្ឋរកស៊ីតិចតួចមានលុយឯណាឲ្យ។ ធ្វើបាបប្រជាជននោះ បើនិយាយអារឿងនយោបាយនោះ វាឆ្អែតឆ្អន់ហើយ។ ចេះតែអ៊ីចឹង ដោយសារអ៊ីចេះឯងបានជាសន្លឹកឆ្នោតវាកាន់តែទៅណា»។
នៅក្នុងពាក្យប្ដឹងទៅកាន់អង្គភាពប្រឆាំងអំពើពុករលួយ ប្រជាពលរដ្ឋភូមិសល្ងាច រៀបរាប់ថា លោក ជុល ថាច តាំងពីបានឡើងតំណែងជានាយរងខណ្ឌរដ្ឋបាលជលផលមក គាត់បានធ្វើបាបអ្នកស្រុកជាខ្លាំង។ គាត់បានគំរាមកំហែងទារលុយទាំងក្នុងរដូវបិទនេសាទ និងបើកនេសាទ។ ប្រជាពលរដ្ឋចោទថា លោក ជុល ថាច បានធ្វើបាបប្រជាពលរដ្ឋក្នុងឃុំទាំង៥ ក្នុងស្រុកស្ទោង ហើយក្នុងមួយឆ្នាំគាត់អាចរកលុយបានពី ១៥០ ទៅ ២០០លានរៀល។ អ្នកស្រុកចោទថា លោក ជុល ថាច មានក្រុមរួមគំនិត ដើម្បីធ្វើបាបអ្នកស្រុក ដោយពួកគេមានកាណូតមួយគ្រឿងមានគ្នា ២នាក់ មានអាវុធខ្លី និងវែង ហើយដេកក្នុងព្រៃចាំស្ទាក់ចាប់អ្នកស្រុកស្ទើររាល់ថ្ងៃ។ ប្រជាពលរដ្ឋចោទថា ក្រុម លោក ជុល ថាច ចាប់លបអ្នកស្រុក ហើយតែងបង្ខំឲ្យអ្នកស្រុកទៅរកលុយមកលោះ ជាថ្នូរក្នុងមួយករណីទឹកប្រាក់ពី ៥០ម៉ឺនរៀល ទៅ ១លានរៀល។
វិទ្យុអាស៊ីសេរី ទូរស័ព្ទទាក់ទង លោក ជុល ថាច ដើម្បីសុំការអត្ថាធិប្បាយពីការចោទប្រកាន់របស់អ្នកនេសាទ ១៤៣គ្រួសារ នៅភូមិសល្ងាច ស្រុកស្ទោង លោកចុចទូរស័ព្ទទទួល ប៉ុន្តែមិននិយាយទេ។
ទាក់ទងករណី លោក ជុល ថាច នេះ លោក ប៉ែន វណ្ណរិន ប្រធានរដ្ឋបាលជលផលខេត្តកំពង់ធំ បញ្ជាក់ថា លោក ជុល ថាច ជាអ្នកទទួលខុសត្រូវក្នុងដែននេសាទស្រុកស្ទោង មែន តែរឿងជំរិតទារលុយអ្នកនេសាទ ហើយត្រូវអ្នកនេសាទប្ដឹងនោះ លោកមិនដឹងទេ ព្រោះការងារបែងចែកដាច់ស្រឡះពីគ្នា។
អ្នកសម្របសម្រួលសមាគមអាដហុក (adhoc) ខេត្តកំពង់ធំ អ្នកស្រី គុណ ស៊ីថា មានប្រសាសន៍នៅថ្ងៃទី១២ វិច្ឆិកា ថា អ្នកស្រីមិនបានទទួលពាក្យប្ដឹងរបស់ប្រជាពលរដ្ឋរឿងមន្ត្រីជលផលធ្វើបាបទារលុយអ្នកនេសាទនោះទេ ប៉ុន្តែអ្នកស្រីត្រៀមផ្តល់ការជួយពិភាក្សា បើសិនជាអ្នកនេសាទទាក់ទងសុំ។
វិទ្យុអាស៊ីសេរី បានទទួលពាក្យបណ្ដឹងប្ដឹង លោក ជុល ថាច នាយរងរដ្ឋបាលជលផលខេត្តកំពង់ធំ ទៅអង្គភាពប្រឆាំងអំពើពុករលួយមាន ២ករណី។ ពាក្យប្ដឹងទី១ ធ្វើឡើងកាលពីថ្ងៃទី៨ ខែមេសា ឆ្នាំ២០១៤ ប្ដឹងដោយអ្នកស្រុក ១៧១គ្រួសារ រស់នៅ ៣ភូមិ គឺភូមិពៅវើយ ភូមិដូនស្តើង និងភូមិបាឡត ឃុំពាមបាង ស្រុកស្ទោង ខេត្តកំពង់ធំ។ ពាក្យប្ដឹងទី២ ធ្វើឡើងកាលពីថ្ងៃទី៣០ ខែតុលា ឆ្នាំ២០១៤ ប្តឹងដោយប្រជាពលរដ្ឋ ១៤៣គ្រួសារ រស់នៅភូមិសល្ងាច ឃុំកំពង់ចិនខាងជើង ស្រុកស្ទោង ខេត្តកំពង់ធំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។