កម្មករកម្មការិនីរោងចក្រផលិតស្បែកជើងឈ្មោះ អ៊ែរ៉ូសហ្វ សាំមីត ហ្វូតវែរ (Aerosoft Summit FootWear) នៅស្រុកសំពៅលូន ខេត្តបាត់ដំបង ជាប់ព្រំដែនកម្ពុជា-ថៃ ប្រមាណ ១០០នាក់នៅព្រឹកថ្ងៃទី២៨ កក្កដា បន្តធ្វើបាតុកម្មតវ៉ានៅមុខរោងចក្រ ដើម្បីដាក់សម្ពាធឲ្យថៅកែចេញមុខដោះស្រាយលក្ខខណ្ឌការងារចំនួន ១០ចំណុច។
ក្រុមកម្មករផលិតស្បែកជើង អ៊ែរ៉ូសហ្វ សាំមីត ហ្វូតវែរ នៅស្រុកសំពៅលូន បានទាមទារឲ្យថៅកែរោងចក្រនេះគោរពលក្ខខណ្ឌការងារល្អជូនដល់ពួកគេជិតមួយខែហើយ តែពុំទទួលបានលទ្ធផលនៅឡើយ។
តំណាងកម្មការិនីម្នាក់ កញ្ញា ហង្ស រស្មី ថ្លែងនៅថ្ងៃទី២៨ កក្កដា ថា ពួកគេខំប្រឹងធ្វើការងាររាល់ថ្ងៃមិនហ៊ានសម្រាកនោះទេ ហើយទទួលបានប្រាក់ខែតិចតួចមិនគ្រប់សម្រាប់ដោះស្រាយជីវភាពប្រចាំថ្ងៃឡើយ។ កញ្ញាអះអាងថា ពួកគេជួបការលំបាក មានដូចជា ធ្វើការច្រើនម៉ោងទទួលបានប្រាក់តិចតួច គ្មានប្រាក់រង្វាន់លើកទឹកចិត្ត និងគ្មានប្រាក់សម្រាប់ថ្លៃធ្វើដំណើរ ជាដើម។ កញ្ញាបញ្ជាក់ទៀតថា បើទោះបីជាពួកគាត់បានតវ៉ាជិតមួយខែហើយក៏ដោយ ក៏ប៉ុន្តែថៅកែរោងចក្រនេះរឹងរូសមិនព្រមដោះស្រាយពីទុក្ខកង្វល់របស់ក្រុមកម្មករឡើយ៖ « បុគ្គលិករដ្ឋបាលក្នុងរោងចក្របាននិយាយថា ថៅកែរោងចក្រមិនទទួលពួកខ្ញុំចូលធ្វើការទេ ដោយសុខចិត្តយកលុយទៅបង់ឲ្យមន្ត្រីថ្នាក់លើជំនួសវិញ គឺមិនឲ្យកម្មករចូលធ្វើការជាដាច់ខាត »។
លក្ខខណ្ឌការងារសំខាន់ដែលក្រុមកម្មករទាមទារ មានដូចជា ប្រាក់ថ្លៃធ្វើដំណើរ ៧ដុល្លារអាមេរិកក្នុងមួយខែ ប្រាក់បន្ថែមធ្វើការងារទៀងទាត់មួយខែ ១០ដុល្លារ ប្រាក់បន្ថែមធ្វើការងារឈប់សម្រាកថ្ងៃបុណ្យ។ កម្មករស្នើឲ្យក្រុមហ៊ុនផ្ដល់សិទ្ធិសុំច្បាប់ឈប់សម្រាកនៅពេលមានធុរៈ និងស្នើឲ្យក្រុមហ៊ុនបញ្ចូលកម្មករពេញសិទ្ធិ បន្ទាប់ពីពួកគេធ្វើការងារបាន ២ខែ ជាដើម។
អាស៊ីសេរី ពុំអាចទាក់ទងតំណាងរោងចក្រផលិតស្បែកជើង អ៊ែរ៉ូសហ្វ សាំមីត ហ្វូតវែរ ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី២៨ កក្កដា។
ប៉ុន្តែប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តបាត់ដំបង លោក ហុង សុគន្ធ មានប្រសាសន៍ថា នៅរសៀលថ្ងៃទី២៨ ដដែល មន្ត្រីពាក់ព័ន្ធនៃក្រសួងការងារ និងអាជ្ញាធរខេត្តបាត់ដំបង បានប្រជុំដោះស្រាយជាមួយភាគីក្រុមហ៊ុននៅក្នុងរោងចក្រមួយនេះ ដោយឈរលើគោលការណ៍ច្បាប់ និងមិនលម្អៀង ប៉ុន្តែលោកពុំបានបញ្ជាក់ថានឹងទទួលបានផ្លែផ្កាយ៉ាងណានៅឡើយ៖ « រាល់តែដងដែលដោះស្រាយបញ្ហានេះមិនចេញមូលហេតុ ដោយសារភាគីរោងចក្រឲ្យតំណាងចូលរួម។ អ៊ីចឹងការចូលដោយគ្មានសិទ្ធិសម្រេច យើងណែនាំផ្លូវច្បាប់យ៉ាងម៉េចគាត់ទូរស័ព្ទថៅកែវិញទៅ។ អ៊ីចឹងហើយបានជាយើងអញ្ជើញថៅកែមកដោះស្រាយនោះ »។
ទោះបីជាយ៉ាងនេះក្ដី មន្ត្រីសហព័ន្ធសហជីពក្ដីសង្ឃឹមកម្មករ លោក សេង សំអើន ដែលបានចុះឃ្លាំមើលផ្ទាល់ អះអាងថា ក្រុមកម្មករតវ៉ាដោយការស្រេកឃ្លាននេះ ធ្វើឡើងត្រឹមត្រូវតាមច្បាប់ ដោយពុំមានអ្វីខុសឡើយ។ លោកថា ខាងភាគីរោងចក្រទៅវិញទេដែលមិនគោរពច្បាប់លក្ខខណ្ឌការងារនោះ៖ « ខ្ញុំសុំឲ្យកម្មករចូលធ្វើការងារវិញ ហើយប្រសិនបើក្រុមហ៊ុនដាច់ខាតមិនយកកម្មករធ្វើការទេ គឺត្រូវទូទាត់អត្ថប្រយោជន៍ជូនកម្មករទៅតាមច្បាប់លក្ខខណ្ឌការងារ ព្រោះកន្លងមក ខាងក្រុមហ៊ុននិយាយថាមិនទទួលយកកម្មករធ្វើការនោះ ដោយមិនផ្ដល់ប្រាក់អត្ថប្រយោជន៍ការងារឲ្យពួកគេឡើយ »។
ក្រុមកម្មករផ្ដើមតវ៉ាចាប់តាំងពីថ្ងៃទី១ កក្កដា។ ក្រុមកម្មករធ្លាប់ដាក់លិខិតទៅអាជ្ញាធរខេត្តបាត់ដំបង ឲ្យជួយដោះស្រាយដែរ ក៏ប៉ុន្តែពុំទាន់ទទួលបានលទ្ធផលនៅឡើយ។ ក្រុមកម្មករបញ្ជាក់ថា ពួកគេនឹងតវ៉ាបន្តទៀត ប្រសិនបើភាគីក្រុមហ៊ុនពុំបានដោះស្រាយសមស្របតាមការទាមទារនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។