ក្លឹបកីឡាមកពីប្រទេសអឺរ៉ុប កំពុងសម្លឹងឃើញថា តំបន់ព្រៃរបស់ប្រាសាទបុរាណ និងទេសភាពផ្ទះបណ្ដែតទឹកនៅបឹងទន្លេសាប នៃខេត្តសៀមរាប គឺជាកន្លែងដែលពិភពលោកមិនធ្លាប់មានទាល់តែសោះ។
ការសម្លឹងឃើញទេសភាពដ៏កម្រ ជាមួយនិងទឹកចិត្តរបស់ប្រជាពលរដ្ឋកម្ពុជា រួសរាយរាក់ទាក់ផងនោះ ធ្វើឱ្យក្លឹបកីឡានៃប្រទេសអឺរ៉ុប ជ្រើសយកធ្វើជាកន្លែងប្រកួតប្រជែងកីឡាផ្សងព្រេងដែលពុំធ្លាប់មានសោះនៅកម្ពុជា។
ព្រឹត្តិការណ៍កីឡាផ្សងព្រេងមួយដែលភាសាអង់គ្លេសហៅថា រ៉េដអាម៉ាហ្សូន (Raid Amazon) និងភាសាបារាំងហៅថា ឡាបវែរ (L´arbe Vert) នឹងរៀបចំការប្រកួតប្រជែងនៅខេត្តសៀមរាប រយៈពេល ៥ថ្ងៃ នៅចុងខែវិច្ឆិកា នេះ។
ក្រុមកីឡាករស្ត្រីមកពីសហរដ្ឋអាមេរិក ប្រទេសបារាំង កាណាដា និងអូស្ត្រាលី ចំនួនជាង ២៦០នាក់ នឹងមកចូលរួមប្រកួតលើវិញ្ញាសាជាច្រើនទាំងនៅលើដី ក្នុងព្រៃ និងនៅលើផ្ទៃទឹកបឹងទន្លេសាប។
ប្រធានគណៈកម្មាធិការកីឡាអូឡាំពិកជាតិកម្ពុជា និងជារដ្ឋមន្ត្រីក្រសួងទេសចរណ៍ គឺលោក ថោង ខុន។ លោកមានប្រសាសន៍កាលពីព្រឹកថ្ងៃអង្គារ ទី១១ ខែវិច្ឆិកា ថា ក្លឹបកីឡានៃប្រទេសអឺរ៉ុប នឹងរៀបចំប្រកួតកីឡាផ្សងព្រេងដែលពុំធ្លាប់មានទាល់តែសោះនៅកម្ពុជា នៅក្នុងបរិវេណប្រាសាទបុរាណ និងផ្ទៃទឹកទន្លេសាបរបស់ខេត្តសៀមរាប ចាប់ពីថ្ងៃទី១៩ ដល់ថ្ងៃទី២៤ ខែវិច្ឆិកា។
លោក ថោង ខុន ឱ្យដឹងថា កីឡាផ្សងព្រេងដែលមានអ្នកចូលរួមប្រកួតសុទ្ធតែស្ត្រីនោះ គឺមានវិញ្ញាសាច្រើនប្រភេទ ដូចជា ការអុំទូកកាត់ឧបសគ្គនៅបឹងទន្លេសាប ឃុំកំពង់ឃ្លាំង ស្រុកសូទ្រនិគម ដើម្បីស្វែងរករបស់លាក់ទុក មានការជិះកង់ប្រណាំង និងរត់នៅតំបន់ជុំវិញអង្គរ ព្រមទាំងមានសំណួរចម្លើយផ្សេងៗ ជាដើម។
លោក ថោង ខុន បញ្ជាក់ទៀតថា មូលហេតុដែលក្លឹបបរទេសជ្រើសយកប្រទេសកម្ពុជា ធ្វើជាកន្លែងប្រារព្ធព្រឹត្តិការណ៍ ដោយសារតែគេមើលឃើញប្រាសាទអង្គរ គឺជាបេតិកភណ្ឌដ៏ល្បីល្បាញ ថែមទាំងប្រជាពលរដ្ឋខ្មែរមានភាពរួសរាយរាក់ទាក់។ បន្ថែមពីលើនេះទៀត ផ្ទះបណ្ដែតទឹកបឹងទន្លេសាប នៅឃុំកំពង់ឃ្លាំង ស្រុកសូទ្រនិគម គឺជាទេសភាពល្អបំផុតដែលពិភពលោកពុំធ្លាប់មាន៖ «លើកទី១ហើយនៅស្រុកខ្មែរ។ មោទនភាពទី១ គឺថាគេបានជ្រើសរើសយកប្រទេសយើងធ្វើជាកន្លែងប្រារព្ធពិធីហ្នឹង។ ទី២ យើងគិតថា ឆ្លងកាត់ព្រឹត្តិការណ៍កីឡាហ្នឹង អាចនឹងជួយផ្សព្វផ្សាយកាន់តែច្រើនថែមទៀតពីទេសចរណ៍កម្ពុជា ព្រោះថាកីឡាអ៊ីចឹង គឺផលិតផលទេសចរណ៍មួយដ៏ល្អ ជួយផ្សព្វផ្សាយពីកម្ពុជា កាន់តែខ្លាំងថែមទៀត ពិសេសផ្សព្វផ្សាយពីតំបន់អង្គរ តំបន់ទន្លេសាបយើងហ្នឹងឱ្យទាក់ទាញទេសចរអឺរ៉ុប កាន់តែច្រើន ព្រោះកម្មវិធីហ្នឹងគេផ្សព្វផ្សាយនៅទូរទស្សន៍បារាំង និងទូរទស្សន៍អឺរ៉ុប ច្រើនណាស់»។
អ្នករៀបចំព្រឹត្តិការណ៍ប្រកួតប្រជែងមកពីអឺរ៉ុប ឱ្យដឹងថា កីឡាផ្សងព្រេងនេះមិនត្រឹមតែជាការឈ្នះចាញ់ប៉ុណ្ណោះទេ ក៏ប៉ុន្តែក៏ជាការជួយផ្សព្វផ្សាយឱ្យអ្នកទេសចរបរទេសបានយល់ដឹងពីទេសភាពស្រស់បំព្រង និងវប្បធម៌យូរអង្វែងរបស់កម្ពុជា ផងដែរ។
ប្រធានក្រុមហ៊ុន ស៊ី.ប៊ី.អូ (CBO) និងជាអ្នកផលិតកម្មវិធីទូរទស្សន៍បារាំង លោក អាឡិចហ្សង់ (Alexan) មានប្រសាសន៍ថា មូលហេតុដែលអ្នកចូលរួមប្រកួតកីឡាផ្សងព្រេងសុទ្ធតែស្រី ពីព្រោះតែយើងមិនសូវគិតពីរឿងឈ្នះចាញ់ប៉ុន្មានទេ៖ «ព្រឹត្តិការណ៍នេះវាមិនមែនត្រឹមតែកីឡាប៉ុណ្ណោះទេ វាក៏ជាស្វែងយល់ពីប្រទេសថ្មី និងវប្បធម៌ថ្មី ដែលកីឡាករពុំធ្លាប់ស្គាល់ដែរ។ ប្រសិនបើក្រុមបុរសចូលរួមប្រកួតព្រឹត្តិការណ៍នេះ គឺពួកគេអាចគិតតែការយកឈ្នះចាញ់ ហើយមិនចាប់អារម្មណ៍ចំពោះអ្វីដែលគេឃើញនៅជុំវិញខ្លួនទេ»។
កាលពីឆ្នាំមុន ព្រឹត្តិការណ៍កីឡានេះធ្លាប់បានធ្វើនៅប្រទេសម៉ាឡេស៊ី (Malaysia) ម្ដងមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។