អតីតអ្នកបុរីកីឡា ដែលត្រូវបានជម្លៀសទៅនៅភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្ដាល សុំឱ្យអនុស្នងការអង្គការសហប្រជាជាតិផ្នែកសិទ្ធិមនុស្ស គឺអ្នកស្រី ហ្វ្លាវា ផាន់សៀរី (Flavia Pansieri) ជួយធ្វើអន្តរាគមន៍ដោះស្រាយបញ្ហាលំបាករបស់ពួកគាត់។
ការស្នើសុំនេះ គឺធ្វើឡើងដោយប្រធានសហគមន៍ភ្នំបាត លោក ទូច ខន ក្នុងអំឡុងពេលដែលអ្នកស្រី ហ្វ្លាវា ផាន់សៀរី ទៅធ្វើទស្សនកិច្ចស្វែងយល់អំពីសហគមន៍នេះ នៅថ្ងៃទី១ ឧសភា ជាពិសេស គឺសុំឱ្យមានប័ណ្ណកម្មសិទ្ធិលើដីកំពុងរស់នៅ៖ «គាត់និយាយជាមួយខ្ញុំច្រើន។ គាត់សួរខ្ញុំតាំងពីបញ្ហាចាស់ជរា ទាំងអ្នកផ្ទុកមេរោគអេដស៍នៅក្នុងសហគមន៍ហ្នឹងមានប៉ុន្មាន អង្គការសង្គមស៊ីវិលហ្នឹងមានប៉ុន្មាន គាត់សួរខ្ញុំទាំងអស់។ គាត់ឆ្លើយតបថា អូខេ ហើយខ្ញុំសំណូមពរគាត់ គាត់ថាគាត់នឹងយករឿងហ្នឹងទៅពិភាក្សា។ ហើយមួយទៀត គាត់នឹងពិភាក្សាគ្នាពីរឿងដីក្រុមហ៊ុនហ្នឹង តើផ្ទេរកម្មសិទ្ធិឱ្យប្រជាពលរដ្ឋដោះដូរពីបុរីកីឡា មកភ្នំបាតនេះ។ ក្រុមហ៊ុនគាត់ភ្នំបាត តែតាមការពិតមិនមែនភ្នំបាត ទេ គឺភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្ដាល។ អ៊ីចឹង ក្រុមហ៊ុនហ្នឹងនិយាយខុស មិនមែនភ្នំបាតទេ។ អ៊ីចឹងគាត់ថា រឿងហ្នឹងគាត់នឹងយកទៅពិភាក្សាគ្នា ហើយគាត់នឹងដោះស្រាយជាមួយរដ្ឋាភិបាល»។
សហគមន៍ភ្នំបាត ជាង ១០០គ្រួសារ គឺជាអតីតពលរដ្ឋដែលរស់នៅបុរីកីឡា រាជធានីភ្នំពេញ ហើយត្រូវក្រុមហ៊ុន ផាន អ៊ីមិច (Phanimex) និងរដ្ឋាភិបាល ជម្លៀសឱ្យទៅនៅទីនោះ ដោយការសន្យាដោះដូរដី និងផ្ដល់ជំនួយឧបត្ថម្ភផ្សេងៗទៀត។ លោក ទូច ខន ថ្លែងថា រហូតមកដល់ពេលនេះ រដ្ឋាភិបាល និងក្រុមហ៊ុនមិនបានជួយអ្វីទេ ហើយដីដែលពួកគាត់កំពុងរស់នៅនោះ មានតែលិខិតកាន់កាប់បណ្ដោះអាសន្ន រីឯប្លង់រួម គឺក្រុមហ៊ុនជាអ្នកកាន់កាប់។
អ្នកស្រី ហ្វ្លាវា ផាន់សៀរី នឹងបញ្ចប់ដំណើរទស្សនកិច្ចនៅកម្ពុជា នៅថ្ងៃទី២ ឧសភា។ តាមគម្រោងមុនចាកចេញពីប្រទេសកម្ពុជា អ្នកស្រីនឹងធ្វើសន្និសីទកាសែតមួយស្ដីអំពីលទ្ធផលនៃដំណើរទស្សនកិច្ចរបស់អ្នកស្រីនៅកម្ពុជា នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។