មន្ត្រីសង្គមស៊ីវិលមួយចំនួនធ្វើការងារពាក់ព័ន្ធពលករចំណាកស្រុក សាទររដ្ឋាភិបាលដែលបានដាក់ឲ្យប្រើប្រាស់លិខិតឆ្លងដែនប្រភេទថ្មី និងមានសុពលភាព ១០ឆ្នាំ ជូនពលរដ្ឋប្រើប្រាស់ពីថ្ងៃទី១៥ ខែកក្កដា តទៅ។ ប៉ុន្តែ មានការរិះគន់ថា តម្លៃធ្វើលិខិតឆ្លងដែនគំរូថ្មីនេះ នៅមានតម្លៃខ្ពស់ហួសហេតុពេក។
មន្ត្រីក្រសួងមហាផ្ទៃ ឲ្យដឹងថា លិខិតឆ្លងដែនគំរូថ្មីនេះ ក៏តម្រូវឲ្យកុមារអាយុក្រោម ៥ឆ្នាំ ធ្វើលិខិតឆ្លងដែនប្រើប្រាស់ដែរ គឺមិនអនុញ្ញាតឲ្យបិតរូបថតភ្ជាប់លិខិតឆ្លងដែនជាមួយឪពុកម្តាយដូចពេលមុនទៀតទេ។
នាយកប្រតិបត្តិនៃអង្គការខារ៉ាមកម្ពុជា លោក យ៉ា ណាវុធ មានប្រសាសន៍ថា ទន្ទឹមនឹងការអបអរសាទរដែលរដ្ឋាភិបាលបានចេញលិខិតឆ្លងដែនគំរូប្រភេទថ្មី មានរយៈពេលប្រើប្រាស់យូរឆ្នាំក៏ដោយ។ ក៏ប៉ុន្តែ លោកបានរិះគន់ថា តម្លៃធ្វើលិខិតឆ្លងដែនប្រភេទថ្មីនេះ នៅមានតម្លៃខ្ពស់បើប្រៀបធៀបប្រទេសជិតខាងដែលមានតម្លៃមិនដល់ ៥០ដុល្លារផង។
លោកស្នើឲ្យរដ្ឋាភិបាលពិចារណាបញ្ចុះតម្លៃធ្វើលិខិតឆ្លងដែនជូនពលរដ្ឋខ្មែរ ឲ្យបានទាបជាងបច្ចុប្បន្ន ដើម្បីបង្កឲ្យប្រជាជនកម្ពុជា ពិសេសពលករចំណាកស្រុកមានលិខិតឆ្លងដែនប្រើប្រាស់ទាំងអស់គ្នា៖ «ខ្ញុំសុំស្វាគមន៍ វិធានការរបស់រដ្ឋាភិបាលដែលបានបញ្ចុះតម្លៃលិខិតឆ្លងដែនមានតម្លៃទាប និងមានរយៈពេលវែងជាងមុន។ ប៉ុន្តែទោះបីយ៉ាងម៉េចក៏ដោយ យើងសុំឲ្យ និងជាពិសេសពលករចំណាកស្រុក ឲ្យគាត់អាចធ្វើលិខិតឆ្លងដែនបានដូចទៅតាមអ្វីដែលបានកំណត់នៅក្នុងអនុក្រឹត្យអ៊ីចឹង គឺ៤ដុល្លារ ពីព្រោះក្នុង១ថ្ងៃៗ យើងទទួលបានទូរស័ព្ទសួរនាំអំពីការធ្វើលិខិតឆ្លងដែនហ្នឹង ហើយពលករគាត់មិនដឹងជាទៅធ្វើតាមរយៈណា ដែលអាចអស់តម្លៃ ៤ដុល្លារហ្នឹង?»។
បន្ថែមលើនេះ លោក យ៉ា ណាវុធ ក៏បានពេបជ្រាយដល់រដ្ឋាភិបាលដែលប្រកាសឲ្យពលករចំណាកស្រុក ធ្វើលិខិតឆ្លងដែនមានតម្លៃ ៤ដុល្លារក្នុងម្នាក់ ថាជាការបោកប្រាស់ និងចង់បានប្រជាប្រិយភាព ប៉ុន្តែធាតុពិត ពលករចំណាកស្រុកទាំងនោះមិនអាចធ្វើលិខិតឆ្លងដែនក្នុងតម្លៃនេះបានទេ។
យ៉ាងណាក៏ដោយ រដ្ឋាភិបាលកម្ពុជា តាមរយៈក្រសួងមហាផ្ទៃ បានដាក់ឲ្យប្រើប្រាស់នូវលិខិតឆ្លងដែនគំរូថ្មីប្រភេទ អ៊ី-ប៉ាសស្ព័រ (E-Passport) មានសុពលភាព ឬអាយុកាលចំនួន ១០ឆ្នាំជូនប្រជាពលរដ្ឋទូទៅប្រើប្រាស់ ចាប់ពីថ្ងៃទី១៥ ខែកក្កដា ឆ្នាំ២០១៤ តទៅ។
លោក កែ សុវ៉ាត អនុប្រធាននាយកដ្ឋានលិខិតឆ្លងដែននៃអគ្គនាយកដ្ឋានអត្តសញ្ញាណកម្មរបស់ក្រសួងមហាផ្ទៃ បានឲ្យដឹងថា លិខិតឆ្លងដែនគំរូថ្មីនេះមានសុពលភាព ១០ឆ្នាំ សម្រាប់មនុស្សមានអាយុចាប់ពី ៦ឆ្នាំឡើងទៅ និងមានតម្លៃ ១០០ដុល្លារសហរដ្ឋអាមេរិក។ លោកបន្តថា សម្រាប់កុមារមានអាយុក្រោម ៥ឆ្នាំ ក៏តម្រូវឲ្យធ្វើលិខិតឆ្លងដែននេះដែរ គឺមិនអនុញ្ញាតឲ្យបិទរូបថតភ្ជាប់លិខិតឆ្លងដែនជាមួយឪពុកម្តាយដូចពេលមុនទៀតទេ និងសុពលភាពប្រើប្រាស់ ៥ឆ្នាំមានតម្លៃ ៨០ដុល្លារ។
លោក កែ សុវ៉ាត បន្ថែមថា តម្លៃធ្វើលិខិតឆ្លងដែនគំរូថ្មីនេះ មិនទាន់បូកបញ្ចូលថ្លៃថតរូប ៤ដុល្លារទេ ហើយពេលវេលាធ្វើលិខិតឆ្លងដែននេះមានរយៈពេលចន្លោះពី ២០ ទៅ ៣០ថ្ងៃ គឺប្រហាក់ប្រហែលគ្នាការធ្វើលិខិតឆ្លងដែនគំរូចាស់ដែរ។
លិខិតឆ្លងដែនគំរូថ្មីសម្រាប់កុមារអាយុក្រោម ៥ឆ្នាំមានកម្រាស់ ៣២ទំព័រ និងមនុស្សចាស់មានកម្រាស់ ៦៤ទំព័រ ហើយពេលផុតកំណត់ គឺមិនអនុញ្ញាតឲ្យពន្យារពេលទេ គឺត្រូវធ្វើថ្មី៖ «ចំពោះលិខិតឆ្លងដែនគំរូថ្មីហ្នឹង សម្រាប់កូនក្មេងដែលមានអាយុចាប់ពី ៥ឆ្នាំចុះនោះ គាត់មានសុពលភាព ៥ឆ្នាំ ហើយសម្រាប់មនុស្សធំដែលមានអាយុចាប់ពី ៦ឆ្នាំឡើងទៅហ្នឹង គឺមានសុពលភាព ១០ឆ្នាំ។ ចំពោះលិខិតឆ្លងដែនគំរូថ្មីនេះ គឺមិនមានបន្តសុពលភាព និងគ្មានបិតរូបកូនដែលទៅរួមដំណើរជាមួយទៀតទេ។ ចំពោះថវិកាដែលគាត់ត្រូវបង់នោះ ចំពោះកូនក្មេងមានអាយុ ៥ឆ្នាំចុះហ្នឹង គាត់បង់តម្លៃ ៨០ដុល្លារ។ រីឯមនុស្សធំមានអាយុចាប់ពី ៦ឆ្នាំឡើងទៅ គឺគាត់ត្រូវបង់ ១០០ដុល្លារ»។
ទោះជាបែបណា សម្រាប់ប្រជាពលរដ្ឋខ្មែរភាគច្រើនបានថ្លែងសាទរចំពោះការដាក់ឲ្យប្រើប្រាស់លិខិតឆ្លងដែនគំរូថ្មី មានសុពលភាពប្រើប្រាស់រហូតដល់ ១០ឆ្នាំ របស់រដ្ឋាភិបាលពេលនេះ។ ប៉ុន្តែបានស្នើបញ្ចុះតម្លៃឲ្យបានទាបជាងនេះ។
លោក កែ សុវ៉ាត អនុប្រធាននាយកដ្ឋានលិខិតឆ្លងដែន បានឲ្យដឹងថា នៅថ្ងៃដំបូងនៃការចាប់ផ្ដើមផ្តល់ជូនលិខិតឆ្លងដែនគំរូថ្មីរបស់ក្រសួងមហាផ្ទៃ នៅថ្ងៃទី១៥ ខែកក្កដា ឆ្នាំ២០១៤ គឺមានប្រជាពលរដ្ឋជាង ៨០០នាក់ហើយ បានមកធ្វើលិខិតឆ្លងដែននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។