អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) នៅថ្ងៃទី១២ ខែមីនា បញ្ចេញរបាយការណ៍ស្ដីពីការរំលោភសិទ្ធិការងារក្នុងវិស័យឧស្សាហកម្មកាត់ដេរនៅកម្ពុជា។
យូមែន រ៉ៃត៍ វ៉ច្ឆ មើលឃើញថា ការរំលោភសិទ្ធិកម្មករដោយថៅកែរោងចក្រ នៅមានលក្ខណៈធ្ងន់ធ្ងរ។ ចំណែករដ្ឋាភិបាលវិញ ក៏មិនទាន់បានចាត់វិធានការពេញលេញ ដើម្បីការពារសិទ្ធិ និងផលប្រយោជន៍កម្មករនៅឡើយ។
របាយការណ៍ដែល យូមែន រ៉ៃត៍ វ៉ច្ឆ បញ្ចេញឲ្យដឹងជាសាធារណៈនៅពេលនេះ មានចំណងជើងថា ធ្វើការកាន់តែលឿន ឬដើរចេញ។ របាយការណ៍ជាភាសាអង់គ្លេសកម្រាស់ប្រមាណ ១៤០ទំព័រនេះ ត្រូវបាននាយករងប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ហ្វីល រ៉ូបឺតសុន (Phil Robertson) និងមន្ត្រីស្រាវជ្រាវជាន់ខ្ពស់សិទ្ធិនារីនៃអង្គការ យូមែន រ៉ៃត៍ វ៉ច្ឆ អ្នកស្រី អារូណា ខាសយ៉ាប (Aruna Kashyab) ជាអ្នកធ្វើសន្និសីទកាសែតប្រកាសផ្សព្វផ្សាយ។
របាយការណ៍សិក្សាធ្វើឡើងចន្លោះពីខែតុលា ឆ្នាំ២០១៣ ដល់ខែកុម្ភៈ ឆ្នាំ២០១៥ និងបានធ្វើការសម្ភាសទៅលើមនុស្សប្រមាណ ៣៤០នាក់ ដែលក្នុងនោះភាគច្រើនជាកម្មកររោងចក្រកាត់ដេរ បង្ហាញថា ការរំលោភសិទ្ធិការងារនៅក្នុងវិស័យឧស្សាហកម្មកាត់ដេរនៅកម្ពុជា បានកើតឡើងទាំងក្នុងរោងចក្រមានទិសដៅនាំចេញ និងក្នុងរោងចក្រម៉ៅការ។
ការរំលោភសិទ្ធិការងារទាំងនោះរួមមាន ការធ្វើការបន្ថែមម៉ោងដោយបង្ខំ ការសងសឹកប្រឆាំងអ្នកមិនព្រមធ្វើការបន្ថែមម៉ោង កង្វះពេលវេលាសម្រាកចន្លោះម៉ោងធ្វើការ ការបដិសេធមិនឲ្យឈប់សម្រាកពេលឈឺ ការប្រើប្រាស់មនុស្សមិនគ្រប់អាយុឲ្យធ្វើការ ការប្រើប្រាស់យុទ្ធសាស្ត្របំបែកសហជីព ដើម្បីទប់ទល់ជាមួយសហជីពឯករាជ្យ ការរើសអើងចំពោះកម្មការិនីមានផ្ទៃពោះ ការធ្វើទុក្ខបុកម្នេញផ្លូវភេទ និងការបដិសេធអត្ថប្រយោជន៍ក្នុងពេលមាតុភាព ជាដើម។
ចំពោះការរំលោភសិទ្ធិការងារកម្មករនេះ របាយការណ៍សិក្សាដែលបានសម្ភាសកម្មករមកពីរោងចក្រជាង ៧០ នៅក្នុងទីក្រុងភ្នំពេញ ខេត្តកណ្តាល កំពង់ស្ពឺ កំពង់ចាម និងខេត្តព្រៃវែង លើកឡើងថា រដ្ឋាភិបាលកម្ពុជា មានកាតព្វកិច្ចក្នុងការធានាការគោរពសិទ្ធិរបស់កម្មករ និងធានាថា នៅពេលដែលមានការរំលោភបំពានកើតឡើង បញ្ហារបស់ពួកគេត្រូវទទួលបានការដោះស្រាយ។
យូមែន រ៉ៃត៍ វ៉ច្ឆ លើកឡើងបន្តថា ក្នុងឆ្នាំ២០១៤ ក្រសួងការងារ បានបង្កើតក្រុមអធិការកិច្ចការងារចម្រុះ ដើម្បីធ្វើអធិការកិច្ច ឬត្រួតពិនិត្យទៅលើដំណើរការនៅតាមបណ្ដារោងចក្រនានា។ តែទោះជាយ៉ាងណាក៏ដោយ អង្គការមួយនេះកត់សម្គាល់ថា អធិការដ្ឋានការងារកម្ពុជា នៅតែគ្មានប្រសិទ្ធភាព និងត្រូវបានចោទប្រកាន់ថា បានប្រព្រឹត្តអំពើពុករលួយជាច្រើន។
ទាក់ទងបញ្ហាពុករលួយនេះ ថ្លែងនៅក្នុងសន្និសីទកាសែតនាមជ្ឈមណ្ឌលវប្បធម៌កម្ពុជា-អាល្លឺម៉ង់ ក្នុងទីក្រុងភ្នំពេញ នាយករងប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ហ្វីល រ៉ូបឺតសុន មានប្រសាសន៍ថា បញ្ហា គឺនៅត្រង់ក្រសួងការងារ មិនបានបំពេញការងាររបស់ខ្លួន ក្នុងការជំរុញឲ្យរោងចក្រអនុវត្តច្បាប់ការងារកម្ពុជា ឲ្យបានពេញលេញ។ លោកថា ការខកខាននេះ គឺដោយសារមានការប្រតិបត្តិប្រព័ន្ធស្រោមសំបុត្រ៖ «យើងមានអ្នកអធិការកិច្ចរាប់ពាន់ចន្លោះពីឆ្នាំ២០១១ ដល់២០១៣ ប៉ុន្តែមានរោងចក្រចំនួន១០ ប៉ុណ្ណោះ ដែលត្រូវគេរកឃើញថាមានកំហុស ហើយផាកពិន័យ វាមើលទៅមិនគ្រប់គ្រាន់ឡើយ ដែលធ្វើឲ្យយើងចោទសួរខ្លួនឯងអំពីការងាររបស់ក្រសួងការងារ ដើម្បីជំរុញការអនុវត្តច្បាប់ការងារកម្ពុជា។ ពួកគេបន្តយកលេសអំពីកង្វះសមត្ថភាព ឬថាគ្មានអ្នកត្រួតពិនិត្យគ្រប់គ្រាន់។ ខ្ញុំគិតថា វាជាបញ្ហាមួយហើយ ប៉ុន្តែបញ្ហាសំខាន់នោះ គឺរដ្ឋាភិបាលខ្វះការប្ដេជ្ញាចិត្តក្នុងការចាត់វិធានការប្រឆាំងនឹងរោងចក្រដែលរំលោភសិទ្ធិកម្មករ វាងាយស្រួលសម្រាប់ក្រសួងការងារ ក្នុងការយកលុយជាងការជំរុញការអនុវត្តច្បាប់ការងារ»។
លោក ហ្វីល រ៉ូបឺតសុន ក៏សង្ឃឹមដែរថា របាយការណ៍របស់ យូមែន រ៉ៃត៍ វ៉ច្ឆ នេះ នឹងដាស់រដ្ឋាភិបាលឲ្យភ្ញាក់ឡើងដើម្បីដោះស្រាយបញ្ហារំលោភសិទ្ធិកម្មករ។
ចំណែកប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ដែលចូលរួមស្តាប់សន្និសីទកាសែតដែរនោះ មានប្រសាសន៍ថា របាយការណ៍របស់ យូមែន រ៉ៃត៍ វ៉ច្ឆ ជារបាយការណ៍ច្បាស់លាស់ ហើយថា បញ្ហាដែលលើកឡើងក្នុងរបាយការណ៍ គឺដូចទៅនឹងអ្វីដែលសហជីពកំពុងជួបប្រទះ។ ស្រដៀងទៅនឹង លោក ហ្វីល រ៉ូបឺតសុន លោក ប៉ាវ ស៊ីណា យល់ថា អំពើពុករលួយ គឺជាកត្តាដែលបង្អាក់ដល់ការជំរុញការអនុវត្តច្បាប់ការងារនៅកម្ពុជា។
យ៉ាងណាក៏ដោយ យូមែន រ៉ៃត៍ វ៉ច្ឆ បញ្ជាក់ថា ការទទួលខុសត្រូវចម្បងដើម្បីកែលំអលក្ខខណ្ឌការងារនៅក្នុងរោងចក្រកាត់ដេរកម្ពុជា គឺនៅតែជាការងាររបស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។