ក្រុមគ្រូបង្រៀននៅសាលាបឋមសិក្សាមួយនៅក្រុងស្ទឹងសែន ខេត្តកំពង់ធំ បានសម្ដែងភាពមិនពេញចិត្តនឹងថ្នាក់ដឹកនាំសាលា ដែលគ្រប់គ្រងបុគ្គលិកមិនមានភាពយុត្តិធម៌ចំពោះការវាយតម្លៃទៅលើសកម្មភាពការងារប្រចាំថ្ងៃរបស់គ្រូបង្រៀន ប្រកាន់បក្ខពួក ហើយកំណត់ឡើងលុយទឹកចិត្ត ឬហៅថាដំឡើងកាំប្រាក់ឲ្យតែបក្ខពួករបស់ខ្លួននោះ។ ប៉ុន្តែការចោទប្រកាន់នេះ ត្រូវបានគណៈគ្រប់គ្រងសាលាច្រានចោលទៅវិញ។
ក្រុមគ្រូបង្រៀននៅសាលាបឋមសិក្សាអនុវត្ត ហ៊ុន សែន អាចារ្យលាក់ នៅសង្កាត់អាចារ្យលាក់ ក្រុងស្ទឹងសែន បានត្អូញត្អែរថា ពួកគាត់ខិតខំប្រឹងធ្វើការអស់ពីលទ្ធភាព ប៉ុន្តែបែរជាពួកគាត់មិនទទួលបានការដំឡើងប្រាក់ដែលក្រសួងផ្ដល់ឲ្យនោះទៅវិញ។
គ្រូបង្រៀនមួយរូបសុំមិនបញ្ចេញឈ្មោះ បានរៀបរាប់ឲ្យដឹងនៅថ្ងៃទី៣០ មេសា ដោយចោទប្រកាន់នាយកគ្រប់គ្រងសាលាបឋមសិក្សាអនុវត្ត ហ៊ុន សែន អាចារ្យលាក់ គឺអ្នកស្រី ហៃ ម៉ូលី ថាជាអ្នកគ្រប់គ្រងមិនផ្ដល់ភាពយុត្តិធម៌ដល់បុគ្គលិក ពីព្រោះថា ប្រសិនបើគ្រូណាពូកែអែបអបយកចិត្ត ទើបគ្រូនាយកវាយតម្លៃប្រចាំឆ្នាំថាល្អ ហើយសរសេររបាយការណ៍ទៅមន្ទីរអប់រំ ដើម្បីដំឡើងកាំប្រាក់ ឬប្រាក់លើកទឹកចិត្តឲ្យក្នុងរយៈពេល ២ឆ្នាំម្ដង តែបើគ្រូណាមិនចេះអែបអប ទោះបីខំធ្វើការល្អយ៉ាងណាក៏ដោយ ក៏មិនទទួលបានការដំឡើងកាំប្រាក់ក្នុងរយៈពេល ២ឆ្នាំម្ដងតាមគោលការណ៍របស់ក្រសួងនោះទេ។
គ្រូបង្រៀននៅសាលាបឋមសិក្សាអនុវត្ត ហ៊ុន សែន អាចារ្យលាក់ មានជាង ៣០នាក់ ទាំងបង្រៀនថ្នាក់មត្តេយ្យ និងថ្នាក់បឋមសិក្សា។
ឆ្លើយតបទៅនឹងការចោទប្រកាន់នេះ នាយកសាលាបឋមសិក្សាអនុវត្ត ហ៊ុន សែន អាចារ្យលាក់ អ្នកស្រី ហៃ ម៉ូលី បានបដិសេធថា ការគ្រប់គ្រងសាលារបស់អ្នកស្រី មិនបង្កើតបក្ខពួកអ្វីទេ។ អ្នកស្រីបញ្ជាក់ថា ការវាយតម្លៃប្រចាំឆ្នាំនោះ គឺសាលាបានបង្កើតក្រុមប្រឹក្សាវិន័យច្បាស់លាស់ក្នុងការវាយតម្លៃគ្រូទាំងអស់ ក្នុងការដំឡើងកាំប្រាក់។
ទោះបីជាយ៉ាងនេះក្ដី គ្រូបង្រៀនមួយរូបទៀតបានលើកឡើងថា ក្រុមប្រឹក្សាវិន័យវាយតម្លៃនោះជាក្រុមបក្ខពួករបស់នាយកសាលា។ ដូច្នេះ បើសិនជាអ្នកណាមិនសូវជិតស្និទ្ធជាមួយគ្រូនាយកនោះ ពួកគាត់ម្នាក់ប្រមាណ ៣ឆ្នាំ ទើបទទួលបានការដំឡើងកាំប្រាក់។ អ្នកគ្រូដដែលអះអាងថា កាំប្រាក់ដែលខាងក្រសួងដំឡើងជូននោះ ក្នុងមួយខែពី ២.៥០០រៀល ទៅ ៣ពាន់រៀល។
បន្ថែមពីលើបញ្ហានេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានបញ្ជាក់ថា ភាពអយុត្តិធម៌នេះបានកើតមាននៅតាមសាលាមួយចំនួនទៀតដែរ ដែលបញ្ហាបង្កើតបក្ខពួកនិយមនេះ មិនអាចលុបបំបាត់អស់នោះទេ។ លោកបញ្ជាក់ថា ថ្នាក់ដឹកនាំស្រឡាញ់បុគ្គលិករបស់ខ្លួនដែលជាអ្នកពូកែអែបអបនេះ ជារឿងមួយដែលធ្វើឲ្យការគ្រប់គ្រងនោះមិនមានប្រសិទ្ធភាព ហើយបញ្ហាធ្ងន់ធ្ងរនឹងកើតមាន ពិសេសបញ្ហាបាក់ទឹកចិត្តរបស់គ្រូបង្រៀនដទៃទៀតដែលមិនចេះអែបអបនោះ។
របាយការណ៍ពីសមាគមគ្រូបង្រៀនកម្ពុជាឯករាជ្យ បានឲ្យដឹងថា គ្រូបង្រៀនសាលាបឋមសិក្សាទាំងអស់នៅទូទាំងប្រទេសមានជាង ៦សែននាក់។
លោក រ៉ុង ឈុន បានអះអាងថា ក្នុងចំណោមគ្រូបង្រៀនទាំងនោះ មានគ្រូមួយចំនួនដែលហ៊ានតវ៉ា ឬបញ្ចេញមតិទាក់ទងនឹងការដឹកនាំមិនល្អរបស់គណៈគ្រប់គ្រងសាលានោះ ត្រូវបានគណៈគ្រប់គ្រងសាលាចោទប្រកាន់ថា មាននិន្នាការទៅគណបក្សប្រឆាំង ហើយគ្រូបង្រៀនទាំងនោះទទួលរងនូវការគាបសង្កត់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។