មន្ត្រីអង្គការមិនមែនរដ្ឋាភិបាល សម្ដែងការបារម្ភពីបញ្ហាសុវត្ថិភាពពលករចំណាកស្រុកទៅក្រៅប្រទេស ដែលមិនទាន់អាចកាត់បន្ថយបាន។ ពួកគាត់ស្នើឲ្យរដ្ឋាភិបាល និងប្រទេសជាសមាជិកអាស៊ាន មានវិធានការថ្មីទៀតសម្រាប់ឆ្នាំ២០១៦ នេះ ក្នុងការជួយពលរដ្ឋខ្មែរដែលនៅតែធ្វើចំណាកស្រុក ប្រឈមនឹងការរំលោភសិទ្ធិយ៉ាងធ្ងន់ធ្ងរ។ ចំណែកមន្ត្រីរដ្ឋាភិបាលវិញបង្ហាញថា ខ្លួនបានធ្វើការយ៉ាងសកម្មជាមួយប្រទេសដែលពាក់ព័ន្ធក្នុងការជួយសង្គ្រោះ និងអប់រំពួកគាត់កុំឲ្យធ្វើចំណាកស្រុកដោយប្រថុយប្រថាន។
អង្គការមិនមែនរដ្ឋាភិបាលដែលធ្វើការឃ្លាំមើលបញ្ហាចំណាកស្រុកបានបង្ហាញក្តីបារម្ភជាថ្មីទៀតចំពោះហានិភ័យនៃពលករចំណាកស្រុកដែលនៅមានអត្រាមួយខ្ពស់នៅឡើយ។
នាយកប្រតិបត្តិអង្គការ ខារ៉ាម កម្ពុជា លោក យ៉ា ណាវុធ ចង់ឲ្យរដ្ឋាភិបាលដាក់បញ្ចូលបញ្ហាពលករចំណាកស្រុកចូលទៅក្នុងកម្មវិធីយុទ្ធសាស្ត្រនយោបាយរបស់ខ្លួនក្នុងការកាត់បន្ថយបញ្ហាលំហូរចេញនូវកម្លាំងពលកម្មក្នុងស្រុកប្រកបដោយគ្រោះថ្នាក់ដូចសព្វថ្ងៃនេះ៖ «ក្រសួងសំខាន់ៗរបស់រដ្ឋាភិបាល បើអាចធ្វើទៅបាន គឺត្រូវរៀបចំនយោបាយដោយដាក់បញ្ហាចំណាកស្រុកហ្នឹងចូលទៅផែនការនយោបាយរបស់ខ្លួននីមួយៗ ដោយធ្វើយ៉ាងម៉េចអាចបង្កើតការងារជូនពលរដ្ឋនៅទីជនបទ មានប្រាក់ចំណូលសមរម្យអាចចិញ្ចឹមគ្រួសារបាន»។
លោក យ៉ា ណាវុធ បន្តថា វិធានការអប់រំបង្ហាញពីគ្រោះថ្នាក់នៃការធ្វើចំណាកស្រុកតែមួយមុខរបស់រដ្ឋាភិបាលនោះ មិនអាចធ្វើឲ្យពួកគាត់បំភ្លេចបំណងចេញធ្វើការក្រៅប្រទេសប្រឈមនឹងគ្រោះថ្នាក់ក្នុងដំណាក់កាលពួកគាត់រស់នៅនឹងភូមិកំណើតដោយគ្មានការងារធ្វើ គ្មានប្រាក់ចំណូលនោះទេ៖ «ចំណាកស្រុកជាជម្រើសចុងក្រោយសម្រាប់ជីវិតចុងក្រោយរបស់គាត់ ព្រោះបញ្ហាជីវភាពគឺជាបញ្ហាសំខាន់ណាស់ គាត់មិនអាចសុខចិត្តស្លាប់ដោយអត់អាហារនោះទេ គឺគាត់ត្រូវតែធ្វើចំណាកស្រុក»។
ក្តីបារម្ភរបស់អង្គការ ខារ៉ាម នៅពេលនេះ បន្ទាប់ពីប៉ុន្មានខែចុងក្រោយនៃឆ្នាំ២០១៥ និងដើមឆ្នាំ២០១៦ នេះ ស្ថានឯកអគ្គរាជទូតកម្ពុជា ប្រចាំប្រទេសម៉ាឡេស៊ី ជួយពលករខ្មែររងគ្រោះ ដែលជួបការលំបាក និងរងការរំលោភបំពាននៅពេលធ្វើការនៅប្រទេសនេះ ឲ្យបានវិលមកកម្ពុជា វិញជាបន្តបន្ទាប់។
ក្រសួងការបរទេសបានប្រកាសកាលពីថ្ងៃទី៦ ខែមករា ថា ក្នុងរយៈពេល ២ខែចុងក្រោយក្នុងឆ្នាំ២០១៥ ពលការិនី ៤នាក់បន្ថែមទៀត ក្នុងនោះ ២នាក់ នៅទីក្រុងភ្នំពេញ និង ២នាក់ទៀតនៅខេត្តសៀមរាប និងខេត្តកំពង់ធំ ដែលទៅធ្វើការនៅប្រទេសម៉ាឡេស៊ី ទាំងស្របច្បាប់ និងខុសច្បាប់ ត្រូវបានជួយអន្តរាគមន៍ដោយស្ថានទូតកម្ពុជា និងបញ្ជូនតាមជើងយន្តហោះមកកម្ពុជាវិញ។
របាយការណ៍ពីអង្គការមិនមែនរដ្ឋាភិបាលបង្ហាញថា ទន្ទឹមនឹងការកើតឡើងនូវការរំលោភបំពាន កម្ពុជានៅតែមានការបញ្ជូនពលករជាបន្តបន្ទាប់ទៅក្រៅប្រទេស ដូចជាម៉ាឡេស៊ី កូរ៉េខាងត្បូង និងថៃ ជាដើម។
មន្ត្រីអង្គការសិទ្ធិមនុស្សក្នុងស្រុកបានឲ្យដឹងថា ពួកគេនៅមិនទាន់មានចំនួនពលករដែលរងគ្រោះច្បាស់លាស់នោះទេ ប៉ុន្តែគេអាចសន្និដ្ឋានបានថា អ្នកដែលរងគ្រោះហើយសមត្ថកិច្ចរកមិនទាន់ឃើញនោះ អាចនៅមានចំនួនច្រើនទៀត។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ពីមួយឆ្នាំទៅមួយឆ្នាំ ចំនួនពលករចំណាកស្រុកចេះតែកើនឡើងជានិច្ច ទោះបីពលករមួយចំនួនត្រូវគេរកឃើញថា រងគ្រោះដោយថៅកែធ្វើទារុណកម្មស្ទើរស្លាប់ស្ទើររស់ទម្រាំបានសមត្ថកិច្ចរកឃើញហើយជួយសង្គ្រោះបញ្ជូនមកផ្ទះវិញយ៉ាងណាក្តី។
លោកបានបញ្ជាក់ហេតុផលដែលធ្វើឲ្យពួកគាត់មិនរួញរានឹងគ្រោះនេះ គឺដោយបញ្ហាក្រពះ ដោយសារចំណូលដែលបានពីការងារក្នុងស្រុកមិនអាចឆ្លើយតបនឹងចំណាយប្រចាំថ្ងៃក្នុងគ្រួសារបាន៖ «បញ្ហាចម្បងផលកសិកម្មរបស់ពួកគាត់ធ្វើបានពុំមានទៅផ្សារ ប្រាក់កម្រៃដែលទទួលបានពីទីផ្សារការងារបានទាប ដូច្នេះទើបពួកគាត់ត្រូវតែធ្វើចំណាកស្រុកដោយប្រថុយប្រថាន»។
ទាំងលោក អំ សំអាត និងលោក យ៉ា ណាវុធ មានប្រសាសន៍ប្រហាក់ប្រហែលគ្នាថា ដំណោះស្រាយជុំវិញបញ្ហានេះ សង្គមស៊ីវិលបានផ្ដល់អនុសាសន៍ជាច្រើនដល់រដ្ឋាភិបាល ប៉ុន្តែការអនុវត្តហាក់មានការយឺតយ៉ាវ ចំណែកផែនការអភិវឌ្ឍរបស់រដ្ឋាភិបាល ហាក់ដើរមិនទាន់នឹងតម្រូវការចាំបាច់របស់ពលរដ្ឋ។
លោក យ៉ា ណាវុធ បង្ហាញថា ចំណុចសំខាន់មួយដែលអាចទប់ស្កាត់លំហូរពលករចំណាកស្រុកដែលគ្រោះថ្នាក់បាន គឺរដ្ឋាភិបាលនៃប្រទេសជាសមាជិកអាស៊ានទាំងអស់ត្រូវអនុម័តឲ្យបានឆាប់លើអនុសញ្ញានៃកិច្ចការពារពលករចំណាកស្រុក ដែលរដ្ឋជាសមាជិកបានធ្វើសេចក្ដីព្រាងនោះរួចហើយ៖ «យើងចង់ឲ្យអនុម័តឲ្យបានឆាប់ដើម្បីពង្រឹងការពារពលករ បន្ទាប់មកប្រទេសទាំងនោះរួមគ្នាធ្វើច្បាប់ កតិកាសញ្ញារួមគ្នាការពារកុំឲ្យមានការរំលោភបំពានសិទ្ធិពលករចំណាកស្រុក»។
ឆ្លើយតបនឹងបញ្ហានេះ រដ្ឋលេខាធិការក្រសួងមហាផ្ទៃ អ្នកស្រី ជូ ប៊ុនអេង មានប្រសាសន៍ថា អ្វីដែលអង្គការសង្គមស៊ីវិលបានលើកឡើង គឺរដ្ឋាភិបាលកំពុងអនុវត្តយ៉ាងសកម្ម មុនមានអនុសាសន៍របស់សង្គមស៊ីវិលលើកឡើងនោះទៅទៀត។ ប៉ុន្តែអ្នកស្រីបញ្ជាក់ថា អ្វីៗគ្រប់យ៉ាងមិនអាចសម្រេចបានភ្លាមនោះទេ៖ «តាមពិតទៅយើងមានគោលនយោបាយគ្រប់គ្រងលំហូរនាំពលករចេញ ដោយយើងកំពុងរៀបចំឲ្យមានតុល្យភាពរវាងកម្លាំងពលកម្មក្នុងស្រុក និងក្រៅស្រុក ប៉ុន្តែយើងអត់ចង់លើកទឹកចិត្តឲ្យមានពលករចំណាកស្រុកទេ យុទ្ធសាស្ត្ររបស់យើងវាមានអាយូរអង្វែង និងការដោះស្រាយបញ្ហាចំពោះមុខ»។
អ្នកស្រីទទួលស្គាល់ថា ការទប់ស្កាត់ពលករចំណាកស្រុកបានលុះត្រាតែមានកិច្ចសហការពីប្រទេសពាក់ព័ន្ធ ប៉ុន្តែបើគ្មានកិច្ចសហការគ្នានេះទេ ទោះបីមានយុទ្ធសាស្ត្រប៉ុណ្ណាក៏ធ្វើទៅអត់រួចដែរ។
កន្លងមកថ្មីៗនេះ ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញលិខិតបញ្ជាក់ថា រដ្ឋាភិបាលបានយកចិត្តទុកចំពោះពលករខ្មែរក្នុងការតាមដានជួយអន្តរាគមន៍ដោះស្រាយបញ្ហានានា នៅពេលដែលពលករជួបបញ្ហារំលោភសិទ្ធិការងារ និងការបិទសិទ្ធិសេរីភាពនៃការរស់នៅពីថៅកែនៅបរទេស។
របាយការណ៍របស់ស្ថាប័នដដែលនេះក៏បានឲ្យដឹងដែរថា បច្ចុប្បន្នមានពលករខ្មែរជាច្រើនពាន់នាក់ទៅធ្វើការនៅប្រទេសកូរ៉េខាងត្បូង ហើយប្រមាណ ៧០ម៉ឺននាក់ផ្សេងទៀត កំពុងធ្វើពលករនៅក្នុងប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។