គុណភាពសញ្ញាបត្រអប់រំក្នុងស្រុក នៅតែជាប្រធានបទមួយដែលមេដឹកនាំរដ្ឋាភិបាល និងមេបក្សប្រឆាំងលើកយកមកវាយប្រហារគ្នាទៅវិញទៅមក។ ចំណែកមន្ត្រីសង្គមស៊ីវិល ដែលធ្វើការខាងផ្នែកអប់រំយល់ឃើញថា មេដឹកនាំទាំងពីរនេះ គួរតែបញ្ឈប់បន្ទោសដាក់គ្នាទៅវិញទៅមក និងត្រូវរួមគ្នាទទួលស្គាល់ការពិត ហើយរួមគ្នាដោះស្រាយធ្វើយ៉ាងណា ដើម្បីឲ្យសញ្ញាបត្រនេះមានតម្លៃជាសកល។
លោកនាយករដ្ឋមន្ត្រី ហ៊ុន សែន ចាត់ទុកសម្ដីរបស់មេបក្សប្រឆាំង លោក សម រង្ស៊ី ដែលថាសញ្ញាបត្រអប់រំក្នុងស្រុកអត់តម្លៃនោះ ថាជាការប្រមាថមួយដល់ស្ថាប័នអប់រំរបស់ជាតិ និងអ្នកដែលកំពុងធ្វើការក្នុងស្ថាប័នផ្សេងៗ រាប់ទាំងអ្នកដែលកំពុងធ្វើការបម្រើឲ្យបក្សប្រឆាំងផង។ លោកថា អ្នកទាំងនោះមួយចំនួនធំ សុទ្ធតែរៀន និងទទួលបានសញ្ញាបត្រនៅក្នុងស្រុក៖ «ត្រង់កន្លែងនេះសូមប្រជាពលរដ្ឋនៅទូទាំងប្រទេស និងអ្នកដែលកំពុងនៅក្នុងបក្សប្រឆាំង តើគួរនៅបម្រើគេតទៅទៀត ក្នុងពេលដែលគេកំពុងមើលងាយថា យើងជាមនុស្សអត់តម្លៃ ឬត្រូវបន្តបោះឆ្នោតឲ្យគេតទៅទៀត?»។
ប្រតិកម្មតបរបស់ លោក ហ៊ុន សែន នៅពេលនេះ ធ្វើឡើងក្នុងពិធីចែកសញ្ញាបត្រជូនដល់និស្សិតនៅវិទ្យាស្ថានជាតិគ្រប់គ្រង នៅថ្ងៃទី១៩ ខែតុលា និងបន្ទាប់ពី លោក សម រង្ស៊ី ប្រធានគណបក្សសង្គ្រោះជាតិ មានប្រសាសន៍រិះគន់ប្រព័ន្ធអប់រំនៅប្រទេសកម្ពុជា ថាខ្សោយ ហើយសញ្ញាបត្រនៅប្រទេសកម្ពុជា ភាគច្រើនគ្មានតម្លៃ។ លោក សម រង្ស៊ី ថ្លែងបែបនេះ ក្នុងពិធីប្រគល់វិញ្ញាបនបត្រជូនដល់អ្នកដែលបានបញ្ចប់វគ្គសិក្សាជំនាញកុំព្យូទ័រ និងភាសាអង់គ្លេស នៅទីស្នាក់ការកណ្ដាលគណបក្សសង្គ្រោះជាតិ កាលពីថ្ងៃទី៤ ខែតុលា។ លោកថ្លែងទៀតថា ប្រសិនបើគណបក្សសង្គ្រោះជាតិ ឈ្នះឆ្នោតនៅពេលខាងមុខនោះ គណបក្សនេះនឹងរៀបចំប្រព័ន្ធអប់រំឡើងវិញ។
ប្រសាសន៍របស់ លោក សម រង្ស៊ី នេះដែរ ក៏ត្រូវរដ្ឋមន្ត្រីក្រសួងអប់រំ ប្រតិកម្ម និងរិះគន់តបវិញភ្លាមៗថា លោក សម រង្ស៊ី មិនឲ្យតម្លៃលើការអប់រំនៅកម្ពុជា ព្រោះគ្រួសាររបស់លោក និងលោក សម រង្ស៊ី ផ្ទាល់ មិនដែលរៀននៅកម្ពុជា ទេ ទើបមានការរិះគន់បែបនេះ។
ឆ្លើយតបបញ្ហានេះ មន្ត្រីជាន់ខ្ពស់គណបក្សសង្គ្រោះជាតិ បញ្ជាក់ថា ការថ្លែងរបស់ លោក សម រង្ស៊ី គឺក្នុងន័យចង់បង្ហាញចំណុចខ្សោយប្រព័ន្ធអប់រំនៅកម្ពុជា ហើយជាទូទៅ អ្នកគ្រប់គ្នាយល់ច្បាស់ណាស់ពីប្រព័ន្ធអប់រំនៅកម្ពុជា។
មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍នៅថ្ងៃទី១៩ តុលា ថា ប្រសាសន៍របស់ លោក សម រង្ស៊ី មិនមែនជាការប្រមាថទៅលើអ្នកណាម្នាក់នោះទេ។ ផ្ទុយទៅវិញ គឺលោកបានបង្ហាញដោយសុចរិតភាពពីទិដ្ឋភាពជាក់ស្តែងពីវិស័យអប់រំនៅកម្ពុជា ដែលក្រុមយុវជន និងមាតាបិតាសិស្ស តែងតែរអ៊ូរទាំពីភាពអសកម្មមួយចំនួនក្នុងវិស័យនេះ ដែលធ្វើឲ្យគុណភាពសិក្សារបស់សិស្សនៅមានកម្រិត៖ «សំខាន់នៅពេលដែលទទួលស្គាល់ថា វិស័យអប់រំនៅមានបញ្ហា ហើយឯកឧត្ដមប្រធាន លោកបានមានប្រសាសន៍អំពីសញ្ញាប័ត្រមួយចំនួនមិនទាន់មានគុណភាព។ ចំណុចទាំងអស់នេះដែលឯកឧត្ដម សម រង្ស៊ី គាត់លើកឡើង ហើយអ្វីដែលបានបញ្ជាក់នោះថា តើប្រទេសណាខ្លះដែលបានទទួលស្គាល់សញ្ញាប័ត្រស្រុកយើងហើយ ឬនៅ? ចំណុចទាំងអស់នេះដែលលោកតែងតែគិតគូរដើម្បីធ្វើកំណែទម្រង់លើវិស័យ អប់រំ»។
ក្នុងរឿងនេះដែរ ប្រធានគ្រប់គ្រងផ្នែកអប់រំនៃអង្គការសង្គ្រោះកុមារនៅកម្ពុជា លោក កែវ សារ៉ាត់ មានប្រសាសន៍ថា ជម្រើសល្អក្នុងការអភិវឌ្ឍវិស័យអប់រំនោះ មេដឹកនាំទាំងពីរមិនគួរលើកយកតែពីប្រធានបទនិយាយពីមានគុណភាព ឬគ្មានគុណភាព ជាសារឆ្លើយឆ្លងគ្នានោះទេ។ លោកថា អ្នកទាំងពីរគួរតែពិភាក្សាគ្នាកំណត់ស្តង់ដារអប់រំមួយ ដែលសមស្របសម្រាប់ប្រទេសកម្ពុជា ហើយនាំគ្នារកយុទ្ធសាស្ត្រដើម្បីអនុវត្ត ឬដើរឲ្យដល់គោលដៅនោះ និងធ្វើបច្ចុប្បន្នភាពជាបន្តបន្ទាប់ទៀតទៅតាមសម័យទំនើប នោះទើបជាការប្រសើរ៖ «សំខាន់ថា តើយើងបបួលគ្នាធ្វើអី? បើសិនសាលាមួយនៅជនបទដាច់ស្រយាល មិនសូវមានគុណភាពដោយសារកត្តាផ្សេងៗ តើអ្នកនយោបាយ ឬក៏អ្នកពាក់ព័ន្ធផ្សេងត្រូវគិតគូរជួយពួកគាត់យ៉ាងដូចម្ដេច? នេះទើបប្រសើរជាងការនាំគ្នានិយាយតែពីរឿងពីគុណភាព ឬមិនគុណភាព»។
ទាក់ទងនឹងវិស័យអប់រំនេះដែរ មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ និងជាប្រធានគណៈកម្មការទី៧ នៃរដ្ឋសភា គ្រោងនឹងជួបពិភាក្សាជាមួយរដ្ឋមន្ត្រីក្រសួងអប់រំ នៅថ្ងៃទី១៨ ខែវិច្ឆិកា ខាងមុខ ដើម្បីសាកសួរ ពិនិត្យតាមដានអំពីការកែទម្រង់វិស័យអប់រំនៅកម្ពុជា ជាពិសេសនៅថ្នាក់ជាតិ និងថ្នាក់ក្រោមជាតិ ឬនៅទីជនបទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។