លោកនាយករដ្ឋមន្ត្រី ហ៊ុន សែន អំពាវឲ្យលោក សុខ ប៊ុន ចូលខ្លួនឆ្លើយបំភ្លឺករណីប្រើហិង្សាលើអតីតពិធីការិនីទូរទស្សន៍ ស៊ី.ធី.អិន (CTN) កញ្ញា ឯក សុជាតា ហៅ សាសា នៅតុលាការជាបន្ទាន់។
ការថ្លែងរបស់លោក ហ៊ុន សែន ក្នុងពិធីចែកសញ្ញាប័ត្រ នៅថ្ងៃទី១៦ ខែកក្កដា នេះ ជាការដាស់តឿនដល់ឧកញ៉ា សុខ ប៊ុន ឲ្យចូលខ្លួនតាមដីកាតុលាការនៅថ្ងៃនេះតែម្ដង ជាជាងកម្រិតទោសកាន់តែធ្ងន់ធ្ងរទៅៗ។
លោកបន្ថែមថា ទោសរបស់លោក សុខ ប៊ុន ជាទោសព្រហ្មទណ្ឌ ដែលមិនអាចចរចាក្រៅផ្លូវច្បាប់ដើម្បីបញ្ចប់រឿងបានទេ ហើយលោកក៏ផ្ដាំដល់មន្ត្រីជាន់ខ្ពស់រូបណា ដែលកំពុងរត់ការក្នុងរឿងនេះ ឲ្យបញ្ឈប់ជាបន្ទាន់ បើមិនចង់ជាប់ខ្នោះ។
ថ្មីៗនេះ លោក សុខ ប៊ុន បានចេញលិខិតតាមរយៈមេធាវី ថាខ្លួននឹងចូលខ្លួនតាមនីតិវិធីច្បាប់នៅពេលឆាប់ៗខាងមុខ ហើយលោកក៏បានលាលែងពីងារជាឧកញ៉ា និងតួនាទីក្នុងក្រុមហ៊ុនផងដែរ។ ប៉ុន្តែលោកបញ្ជាក់ថា លោកកំពុងមានជំងឺដែលត្រូវព្យាបាលនៅក្រៅប្រទេស។
ករណីហិង្សាលើ កញ្ញា សាសា ពីសំណាក់លោក សុខ ប៊ុន និងអង្គរក្ស បានកើតឡើងកាលពីយប់រំលងអធ្រាត្រថ្ងៃទី២ ខែកក្កដា នៅភោជនីយដ្ឋានមួយកន្លែង នាកោះពេជ្រ។ ករណីនេះត្រូវតុលាការទុកមិនចាត់ការភ្លាមៗទេ លុះកញ្ញា សាសា បង្ហោះវីដេអូហេតុការណ៍នោះ ជាសាធារណៈតាមបណ្ដាញសង្គមហ្វេសប៊ុក (Facebook) ទើបរឿងនោះមានការចាប់អារម្មណ៍ពីមជ្ឈដ្ឋានទូទៅ និងឈានដល់ការអំពាវនាវពីតំណាងរាស្ត្របក្សប្រឆាំង អង្គការផ្នែកស្ត្រី និងចំណាត់ការរបស់មន្ត្រីជាន់ខ្ពស់រដ្ឋាភិបាល ទើបតុលាការចេញដីកាចាប់ខ្លួនលោក សុខ ប៊ុន នៅថ្ងៃនេះតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។