លោក នាយករដ្ឋមន្ត្រី ហ៊ុន សែន បានជំរុញឲ្យតារាភាពយន្តខ្មែរដ៏ល្បីល្បាញម្នាក់គឺលោក ទេព រិនដារ៉ូ ឆាប់យកប្រពន្ធដើម្បីមានកូន សម្រាប់បន្តពូជទៅថ្ងៃអនាគត៖ «នេះជាតួកុនជើងចាស់តាំងពីទសវត្សទី៨០។ ប៉ុន្តែជាពីលុត(អ្នក)បើកយន្តហោះទេ។ បញ្ជូនទៅរៀនបើក យន្តហោះមកវិញដើរតួកុន។ ដូចជាពីរនាក់ ប៉ុន្តែ លោក ដារ៉ូ ឯងដើរតួយូរជាងគេ។ ដើរស្អីក៏បានដែរឥឡូវនេះ។ ហើយមិនព្រមយកប្រពន្ធ។ គេនៅអ៊ីចឹងដើម្បីគេចវេចអារឿងអស្ចារ្យណាស់ ប្ដីខ្ញុំនោះ។ វាមិនស្រួលនៅម្នាក់ឯងមានអ្នកណាចងជើង»។
ការឈឺឆ្អាលរបស់លោក ហ៊ុន សែន ទៅលើតារាភាពយន្តខ្មែរ ដ៏ចាស់វស្សាម្នាក់នេះធ្វើឡើងនៅក្នុងការបើកកម្មវិធីអង្គរសង្ក្រាន្ត ក្នុងខេត្តសៀមរាបកាលពីថ្ងៃទី១៤ មេសា។
ឆ្លើយតបទៅនឹងប្រសាសន៍របស់លោកនាយករដ្ឋមន្ត្រី ហ៊ុន សែន នេះដែរ លោក ទេព រិនដារ៉ូ បានប្រាប់វិទ្យុអាស៊ីសេរី តាមទូរស័ព្ទកាលពីយប់ថ្ងៃអង្គារថា លោកមានវ័យកាន់តែចាស់ទៅហើយ ហើយម្យ៉ាងទៀត ជីវិតរបស់លោកក៏ធ្លាប់បានឆ្លងកាត់ ការមើលថែរក្សាក្មួយៗគ្រប់គ្រាន់ដែរ ដូច្នេះលោកមិនចាំបាច់យកប្រពន្ធនោះទេ៖ «យើងក៏ធ្លាប់ឆ្លងកាត់ការលំបាកច្រើនមែនទែន មកវាដូចជាអត់ចង់។ វាដូចជានៅម្នាក់ឯងវាស្រួលទៅហើយ ស៊ាំទៅហើយ។ ខ្ញុំក៏មានក្មួយមានអី ចិញ្ចឹមមកពីរបីនាក់ហើយដែរ ហើយគាត់ក៏ជាសាច់ជាឈាមរបស់ខ្ញុំដែរ ពីព្រោះពួកគាត់ជាកូនរបស់ប្អូនស្រីរបស់ខ្ញុំ។ ខ្ញុំគិតថាគាត់ក៏ជាពូជអំបូររបស់ខ្ញុំបន្តទៅទៀតដែរ ខ្ញុំមិនគិតអ៊ីចឹងផងបាទ»។
ទោះបីជាយ៉ាងណាក៏ដោយ លោក ទេព រិនដារ៉ូ បានបង្ហាញសេចក្ដីរីករាយ និងភាពកក់ក្តៅដែលលោកនាយករដ្ឋមន្ត្រី ហ៊ុន សែន ស្គាល់លោកច្បាស់ហើយបាននិយាយឈ្មោះរបស់លោកជាសាធារណៈទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។