កម្មកររោងចក្រសម្លៀកបំពាក់ អាយសោន ខេប៊ល (I Sound Cable) ស្ថិតនៅផ្លូវជាតិលេខ៤ ក្នុងសួនឧស្សាហកម្មវ៉ាយសេវែន ស្រុកសំរោងទង ខេត្តកំពង់ស្ពឺ ប្រមាណជាង ១០០នាក់ នៅថ្ងៃទី១៩ កក្កដា នេះ បាននាំគ្នាដាក់ញត្តិទៅក្រសួងការងារ ដើម្បីទាមទារឲ្យថៅកែរោងចក្រផ្ដល់អត្ថប្រយោជន៍ចំនួន ២១ចំណុច និងទាមទារឲ្យថៅកែយកតំណាងពួកគេម្នាក់ចូលធ្វើការវិញ។
កម្មកររោងចក្រសម្លៀកបំពាក់ អាយសោន ខេប៊ល ភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ អះអាងថា ថៅកែរោងចក្រដែលជាជនជាតិកូរ៉េ បានបញ្ឈប់តំណាងពួកគេដោយខុសច្បាប់ និងរំលោភច្បាប់ការងាររបស់កម្មករ។
តំណាងកម្មកររោងចក្រ អាយសោន ខេប៊ល លោកស្រី ខាត់ ម៉ូលីន ថ្លែងនៅថ្ងៃទី២០ កក្កដា ថា មូលហេតុដែលថៅកែបញ្ឈប់តំណាងកម្មករ ១នាក់ គឺដោយសារថៅកែក្រុមហ៊ុននេះរើសអើងសហជីព។ លោកស្រីថា ក្រៅអំពីការតវ៉ាឲ្យយកតំណាងពួកគេ ១រូបឈ្មោះ តាត់ គឹមឆេង ដែលថៅកែបញ្ឈប់គ្មានមូលហេតុនោះ ត្រូវអនុញ្ញាតឲ្យលោកបានចូលធ្វើការវិញ។ ក្រៅពីនេះ កម្មករក៏ទាមទារឲ្យថៅកែគោរពលក្ខខណ្ឌការងារមួយចំនួនទៀតដែរ។
តំណាងកម្មកររូបនេះ ស្នើឲ្យលោក អ៊ិត សំហេង រដ្ឋមន្ត្រីក្រសួងការងារ អន្តរាគមន៍ និងដាក់សម្ពាធឲ្យថៅកែរោងចក្រផ្ដល់សំណងអតីតភាពការងារ និងចេញមកដោះស្រាយចំពោះការបញ្ឈប់តំណាងកម្មករជាបន្ទាន់៖ « បើរោងចក្រចង់បញ្ឈប់តំណាងកម្មករ ត្រូវមានការជូនដំណឹង ព្រោះច្បាប់ការងារបានចែងច្បាស់ មិនអាចបញ្ឈប់គាត់ផ្ដេសផ្ដាសបានទេ អត់មានជូនដំណឹងទៅអធិការកិច្ចការងារអី គាត់បញ្ឈប់ឆៅតែម្ដង »។
តំណាងកម្មករដែលត្រូវបានថៅកែរោងចក្រនេះបញ្ឈប់ កាលពីថ្ងៃទី២០ មិថុនា មកនោះ លោក តាត់ គឹមឆេង ឲ្យដឹងថា ថៅកែរោងចក្រនេះបានបញ្ឈប់លោកដោយគ្មានហេតុផលច្បាស់លាស់ទាំងលោកគ្មានកំហុស និងមិនបានជូនដំណឹងបានត្រឹមត្រូវ ថែមទាំងបានចោទលោកថា បានជ្រៀតជ្រែកការងារក្នុងរោងចក្រ។ លោកអះអាងដែរថា កន្លងមកថៅកែរោងចក្រនេះតែងរំលោភច្បាប់ការងារកម្មករ ដូចជា កាត់ប្រាក់ខែកម្មករមិនឲ្យកម្មករឈប់សម្រាកពេលឈឺ មិនបានផ្តល់ប្រាក់អតីតភាពការងារកម្មករ ព្រមទាំងបានគំរាមកម្មករមិនឲ្យធ្វើបាតុកម្ម ជាដើម៖ « គាត់ថាខ្ញុំហ្នឹងធ្វើឲ្យក្រុមហ៊ុនគាត់មានបញ្ហា។ ចឹងគាត់បញ្ឈប់ខ្ញុំតែម្តង។ គាត់មិនជូនដំណឹង ហើយបើខាងមន្ទីរការងារខេត្ត គាត់អត់បានអន្តរាគមន៍ជូនពួកខ្ញុំនោះទេ។ ចឹងហើយបានជាពួកកម្មករមកតវ៉ានៅក្រសួងការងារ »។
ការតវ៉ារបស់ក្រុមកម្មករដែលតវ៉ាដោយលើកបដា និងដាក់ញត្តិទៅកាន់ក្រសួងការងារ មិនមានការរារាំងណាមួយឡើយ។
ក្រោយការតវ៉ារបស់កម្មករអស់រយៈពេលជាង ១ម៉ោងមក មន្ត្រីក្រសួងការងារ បានអញ្ជើញតំណាងកម្មករចូលជួបពិភាក្សា។
អនុប្រធានសហជីពសេរីកម្មករនៃព្រះរាជាណាចក្រកម្ពុជា ដែលឃ្លាំមើលការងារតវ៉ានេះ និងបានចូលជួបជាមួយមន្ត្រីក្រសួងការងារ លោក ម៉ាន់ សេងហាក់ ឲ្យដឹងថា គណៈកម្មការដោះស្រាយវិវាទ និងកូដកម្មគ្រប់មុខសញ្ញារបស់ក្រសួងការងារ សន្យាយកសំណើដាក់ជូនរដ្ឋមន្ត្រីក្រសួងការងារ ដើម្បីអន្តរាគមន៍ជូនកម្មករនាពេលឆាប់ៗ៖ « គាត់ថាពួកគាត់នឹងយកសំណើរបស់កម្មករទាំងប៉ុន្មានចំណុចនេះ ទៅដាក់ជូនរដ្ឋមន្ត្រីឲ្យពិនិត្យ និងធ្វើលិខិតស្នាម ហើយពួកគាត់នឹងចុះទៅសម្របសម្រួលដល់ខេត្តកំពង់ស្ពឺ តែម្តង »។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងការងារ លោក ហេង សួរ និងតំណាងរោងចក្រ អាយសោន ខេប៊ល ដើម្បីបញ្ជាក់បន្ថែម និងសុំការឆ្លើយតបជុំវិញបញ្ហានេះបាននៅឡើយ នៅថ្ងៃទី២០ ខែកក្កដា។
ខ្លឹមសារក្នុងញត្តិ និងបដារបស់កម្មកររោងចក្រដែលតវ៉ា ដែលបានដាក់ជូនរដ្ឋមន្ត្រីក្រសួងការងារ លោក អ៊ិត សំហេង សុំជួយអន្តរាគមន៍ទៅថៅកែរោងចក្រសុំឲ្យដោះស្រាយអត្ថប្រយោជន៍ការងារចំនួន ២១ចំណុចរួមមាន ស្នើឲ្យទទួលខុសត្រូវចំពោះកម្មការិនីម្នាក់ឈ្មោះ ទន សុភ័ណ ដែលគ្រោះថ្នាក់ការងាររហូតដល់ស្លាប់ ផ្តល់ប្រាក់ខែ ៣ខែមុនពេលកម្មការិនីសម្រាកមាតុភាព ស្នើឲ្យបើកប្រាក់ ៥% ចំពោះកម្មករដែលចប់កិច្ចសន្យា និងរៀបចំបរិស្ថាននៅក្នុងរោងចក្រ ជាដើម។
ភាគីកម្មករនៅតែអះអាងថា ពួកគេនឹងដង្ហែក្បួនបន្តតវ៉ាទៅកាន់ផ្ទះលោកនាយករដ្ឋមន្ត្រី ហ៊ុន សែន ព្រមទាំងស្ថានទូតកូរ៉េ ដើម្បីឲ្យជួយដោះស្រាយ បើសិននៅតែគ្មានដំណោះស្រាយពីភាគីក្រុមហ៊ុន និងគ្មានការអន្តរាគមន៍ពីភាគីពាក់ព័ន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។