បណ្ដាញព្រះសង្ឃឯករាជ្យ ប្រកាសគម្រោងធ្វើបាតុកម្មទាមទារអោយរដ្ឋមន្ត្រីក្រសួងធម្មការ និងសាសនា បញ្ឈប់ផែនការដែលធ្វើអោយប៉ះពាល់ដល់សំណង់អគារពុទ្ធសាសនបណ្ឌិត្យ នៅរាជធានីភ្នំពេញ។ គម្រោងរបស់ព្រះសង្ឃឯករាជ្យនេះ កើតឡើងបន្ទាប់ពីខ្លោងទ្វារអគារពុទ្ធសាសនបណ្ឌិត្យត្រូវវាយកម្ទេចរុះរើចោល និងលេចឮព័ត៌មានថា ដីមួយផ្នែកនៅក្នុងបរិវេណអគារនេះ ក៏ត្រូវជួលអោយក្រុមហ៊ុនកាស៊ីណូណាហ្គាវើល (Naga World)។
បណ្ដាញព្រះសង្ឃឯករាជ្យដឹកនាំដោយព្រះតេជព្រះគុណ ប៊ុត ប៊ុនតិញ នឹងធ្វើបាតុកម្មនៅខាងមុខក្រសួងធម្មការ និងសាសនា នៅថ្ងៃទី២៩ ខែឧសភា ដើម្បីអោយក្រសួងនេះសន្យាជាសាធារណៈថា នឹងមិនធ្វើអោយប៉ះពាល់ ឬបាត់បង់អគារពុទ្ធសាសនបណ្ឌិត្យ។
ព្រះតេជព្រះគុណ ប៊ុត ប៊ុនតិញ មានថេរដីកាថា ព្រះសង្ឃជាច្រើនអង្គ ពុទ្ធសាសនិក និងអ្នកសហគមន៍មួយចំនួនទៀត នឹងចូលរួមការតវ៉ានោះ ក្នុងគោលបំណងចូលរួមរក្សាសម្បត្តិរដ្ឋ ដែលមិនគួរលក់ដូរតទៅទៀត៖ «សូមអោយក្រសួងធម្មការ បញ្ឈប់ការជួលដី ឬការកម្ទេចបំផ្លិចបំផ្លាញពុទ្ធសាសនបណ្ឌិត្យ ដែលឃ្លាំងផ្ទុកនូវគម្ពីរព្រះពុទ្ធសាសនា ក៏ដូចជាប្រពៃណីវប្បធម៌ខ្មែរ។ ទី២ អោយធ្វើលិខិតជាលាយលក្ខណ៍អក្សរឆ្លើយប្រាប់ដល់មតិសាធារណជន ក៏ដូចជាសាធារណជនថា ខ្លួនអាចមានលទ្ធភាពការពារពុទ្ធសាសនបណ្ឌិត្យ ដោយមិនធ្វើអោយបាត់បង់អោយទៅណាហ្គាវើល»។
ខ្លោងទ្វារ និងរបងខាងជើងនៃពុទ្ធសាសនបណ្ឌិត្យ ត្រូវកម្មករវាយកម្ទេចចោល កាលពីថ្ងៃច័ន្ទ ទី២៦ ខែឧសភា ចំណែកដីមួយផ្នែកមានទទឹងប្រមាណ ៣០ម៉ែត្រ និងបណ្ដោយជាង ១០០ម៉ែត្រ ឋិតនៅបរិវេណខាងជើង ក៏ត្រូវហ៊ុមព័ទ្ធរបងផ្ដាច់ចេញពីបរិវេណចាស់ ហើយកំពុងសាងសង់សំណង់ថ្មីមួយទៀត។ សារព័ត៌មានក្នុងស្រុកបានផ្សព្វផ្សាយថា ការរុះរើខ្លោងទ្វារនោះ ដើម្បីបើកផ្លូវអោយក្រុមហ៊ុនណាហ្គាវើល សង់ផ្លូវដើរ និងផ្សារក្រោមដី។ ចំណែកដីមួយផ្នែកនោះ គឺត្រូវជួលទៅអោយក្រុមហ៊ុនដដែលនេះ សាងសង់អនុស្ថានីយចែកចាយអគ្គិសនី។
ឆ្លើយតបនឹងបញ្ហានេះ អនុរដ្ឋលេខាធិការក្រសួងធម្មការ និងសាសនា លោក សេង សុមុនី មានប្រសាសន៍ថា ការរុះរើខ្លោងទ្វារពុទ្ធសាសនបណ្ឌិត្យ ជាគម្រោងរបស់ក្រសួងដែនដី នគរូបនីយកម្ម និងសំណង់ ដែលរកឃើញថា គ្រឹះសំណង់របស់ខ្លោងទ្វារនោះចាំបាច់ត្រូវកែសម្រួល ដើម្បីធានាសុវត្ថិភាពនៅពេលមានសំណង់ក្រោមដីនៅក្បែរនោះ។ លោក សុមុនី បញ្ជាក់ថា ក្រុមហ៊ុនណាហ្គាវើល នឹងសាងសង់ខ្លោងទ្វារដដែលនោះឡើងវិញ រក្សារចនាបថដដែលនៅក្រោយពេលកែសម្រួលគ្រឹះសំណង់រួច។ ចំណែកដីម្ដុំក្នុងបរិវេណនោះ គឺជាសំណើគម្រោងរបស់ក្រសួងរ៉ែ និងថាមពល ដែលត្រូវការបង្កើតអនុស្ថានីយចែកចាយអគ្គិសនីថ្មីមួយ។ លោកបញ្ជាក់ថា ក្រសួងពុំបានជួលដីអោយក្រុមហ៊ុនឯកជនឡើយ ប៉ុន្តែជាការចូលរួមគម្រោងអភិវឌ្ឍន៍ក្រុង។
បើទោះជាមានការពន្យល់យ៉ាងនេះក្ដី ក៏ព្រះតេជព្រះគុណ ប៊ុត ប៊ុនតិញ នៅតែប្រកាន់ជំហរជួបជុំតវ៉ានោះដដែល ដោយសំអាងថា កន្លងមកការលក់ដូរសម្បត្តិរដ្ឋតែងតែមានលេសមកបិទបាំងជានិច្ច៖ «អាត្មាបានដឹងថា រឿងវាយវត្តខ្ទរក៏ដោយ រឿងដេញអ្នកស្រុកក៏ដោយ វាជារូបមន្តតែមួយ ដែលយើងមិនអាចអនុញ្ញាតអោយរដ្ឋមន្ត្រី ជាពិសេសនៅក្នុងក្រសួងធម្មការ និងសាសនា យកទ្រព្យសម្បត្តិសាសនាទៅជួលទៅដោះដូរអ៊ីចឹងទេ»។
ក្រុមព្រះសង្ឃឯករាជ្យលើកឡើងដែរថា នេះជាករណីថ្មីមួយទៀត បន្ទាប់ពីករណីលក់ទីប៉ាឆាក្នុងវត្តខ្ទរ នៅសង្កាត់ព្រែកលៀប ដែលធ្វើអោយពុទ្ធសាសនិកផ្ទុះការតវ៉ាប្រឆាំងទាស់ កាលពីចុងឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។