ជនជាតិដើមភាគតិចនៅក្នុងខេត្តចំនួន៥ នឹងប្រារព្ធទិវាអន្តរជាតិជនជាតិដើមភាគតិចពិភពលោក ដោយចាប់ផ្ដើមពីថ្ងៃទី៩ ខែសីហា។
នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា លោក តឹក វណ្ណារ៉ា ឲ្យដឹងថា អង្គការនេះនឹងសម្របសម្រួលការប្រារព្ធខួបទី១០ នៃទិវាអន្តរជាតិជនជាតិដើមភាគតិចពិភពលោកនៅខេត្តក្រចេះ នៅថ្ងៃទី៩ សីហា និងនៅខេត្តកោះកុង ព្រះវិហារ រតនគិរី និងខេត្តមណ្ឌលគិរី នៅថ្ងៃទី១៣ ខែសីហា។ លោកបន្តថា ពួកគេប្រារព្ធពិធីនេះ ដើម្បីឲ្យមហាជនជួយអនុវត្តសិទ្ធិរបស់ជនជាតិដើមភាគតិច ឲ្យយល់ដឹងពីប្រពៃណី វប្បធម៌ ជំនឿរបស់ពួកគេ ជាដើម។
លោក តឹក វណ្ណារ៉ា៖ «ជំរុញការទទួលស្គាល់ និងការគោរពសិទ្ធិរបស់ជនជាតិដើមភាគតិចនៅកម្ពុជា ឲ្យបានប្រសើរឡើង ជាពិសេសការទទួលស្គាល់សិទ្ធិដោយឡែករបស់ជនជាតិដើមភាគតិច ទៅលើការគ្រប់គ្រងដី និងធនធានធម្មជាតិ ស្របតាមច្បាប់ជាតិ និងអន្តរជាតិ ទាក់ទងនឹងសិទ្ធិរបស់ជនជាតិដើមភាគតិច សុំការជួយគាំទ្រទាំងថ្នាក់ជាតិ ឲ្យអន្តរជាតិ ដើម្បីជំរុញការយល់ដឹងអំពីស្ថានភាពទូទៅរបស់ជនជាតិដើមភាគតិច ជាពិសេសការយល់ដឹងអំពីការគ្រប់គ្រងដីធ្លី ព្រៃ និងការចុះបញ្ជីដី ជួយឲ្យជនជាតិដើមភាគតិចហ្នឹង មានឱកាសអភិវឌ្ឍទន្ទឹមគ្នានឹងការថែរក្សាអត្តសញ្ញាណ និងវប្បធម៌របស់ពួកគាត់ ប្រកបដោយនិរន្តរភាព ស្របតាមច្បាប់ជាតិ និងច្បាប់អន្តរជាតិ ស្ដីពីសិទ្ធិជនជាតិដើមភាគតិច»។
លោកបន្តថា ទិវាអន្តរជាតិជនជាតិដើមភាគតិចពិភពលោកនៅខេត្តក្រចេះ នឹងមានការចូលរួមពីរដ្ឋមន្ត្រីក្រសួងអភិវឌ្ឍន៍ជនបទ អាជ្ញាធរមូលដ្ឋាន ជនជាតិដើមភាគតិច រួមគ្នាដើរហែជាក្បួន ដោយមានអ្នកចូលរួមហែជាង ១.០០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។