សហគមន៍ចំនួន ១១០ក្នុងឃុំចំនួន២០ នៃស្រុកសំរោងទង និងស្រុកភ្នំស្រួច ខេត្តកំពង់ស្ពឺ បានចេញសេចក្ដីថ្លែងការណ៍មួយ ដោយស្នើសុំឱ្យរដ្ឋាភិបាលបើកចំហព័ត៌មានសាធារណៈ និងដោះស្រាយបញ្ហានៅក្នុងសហគមន៍ដែលកំពុងជួបប្រទះ។
ប្រធានសហគមន៍ព្រៃឈើជ្រោះពង្រ នៅឃុំអូរ ស្រុកភ្នំស្រួច គឺលោក ឡេង សារ៉ុម ថ្លែងថា បញ្ហាសំខាន់បំផុតនៅក្នុងសហគមន៍របស់លោកសព្វថ្ងៃ គឺបញ្ហាដាក់ថ្នាំពុលយកសត្វ និងឡដុតកៅស៊ូកង់ឡាន ដែលធ្វើឱ្យប៉ះពាល់សុខភាព៖ «សុំឱ្យអាជ្ញាធរជួយដោះស្រាយបញ្ហាប្រឈមធ្ងន់ៗ ប៉ះពាល់សហគមន៍ហ្នឹង។ សុំឱ្យអាជ្ញាធរដែនដីជួយដោះស្រាយផង។ ឡដុតកៅស៊ូកង់ឡានចាស់ៗ វាហុយដល់ប្រជាពលរដ្ឋ វាជះចំហាយក្លិនគួរឱ្យខ្លាច។ បើនៅជិតវិញក្អួត។ កៅស៊ូកង់ឡានចាស់ៗហ្នឹងចំហុយចេញជាប្រេងវិញ ដុតចេញជាផេះតែម្ដង។ ពីមុនឡតែមួយ ឥឡូវឡដល់ទៅពីរ»។
ក្នុងសេចក្ដីថ្លែងការណ៍រួមរបស់សហគមន៍នៅថ្ងៃទី២៦ មីនា បានសរសេរថា ក្រុមសហគមន៍ទាំង១១០ ដែលធ្វើការលើវិស័យខុសៗគ្នា បានផ្ដល់អនុសាសន៍ និងសេចក្ដីស្នើសុំសកម្មភាពរដ្ឋាភិបាលឱ្យដោះស្រាយបញ្ហាចំនួន ១០ចំណុច មានជាអាទិ គឺការពិគ្រោះយោបល់ជាមួយពលរដ្ឋ មុនអនុវត្តគម្រោងអភិវឌ្ឍន៍ឃុំ សុំឱ្យអនុវត្តច្បាប់ និងមានភាពយុត្តិធម៌។
តំណាងសហគមន៍ថ្លែងថា ពួកគេរង់ចាំមើលបើគ្មានការដោះស្រាយបញ្ហារបស់អាជ្ញាធរទេ ពួកគាត់នឹងតវ៉ាជាថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។