អាជ្ញាធរខេត្តកំពត ចាប់ផ្ដើមត្រៀមរៀបចំទទួលធ្វើជាម្ចាស់ផ្ទះ ក្នុងការប្រារព្ធបុណ្យសមុទ្រនៅឆ្នាំ២០១៥ នេះ ដោយរំពឹងថា នឹងទទួលបានភ្ញៀវទេសចរជាតិ និងអន្តរជាតិយ៉ាងហោចណាស់ ៥សែននាក់ទៅកម្សាន្តខេត្តទេសចរណ៍ជាប់សមុទ្រមួយនេះ។
នៅឆ្នាំនេះ ខេត្តកំពត នឹងធ្វើជាម្ចាស់ផ្ទះប្រារព្ធពិធីបុណ្យសមុទ្រ បន្តវេនពីខេត្តកោះកុង ដែលបានធ្វើជាម្ចាស់ផ្ទះនៃពិធីបុណ្យនេះកាលពីឆ្នាំទៅមិញ។
នាយកខុទ្ទកាល័យសាលាខេត្តកំពត លោក ស៊ឹម វុទ្ធា ឲ្យដឹងថា ព្រឹត្តិការណ៍នេះធំធេងណាស់ដែលតម្រូវឲ្យអាជ្ញាធរខេត្ត រួមទាំងមន្ទីរពាក់ព័ន្ធទាំងអស់ ចាប់ផ្ដើមធ្វើការងារនេះចាប់តាំងពីពេលនេះទៅទើបបាន។ លោកថា ការងារចំពោះមុខ គឺអាជ្ញាធរខេត្តត្រូវរៀបចំកែលំអផ្លូវគមនាគមន៍ក្នុងក្រុងខ្លះ និងប្រព័ន្ធភ្លើងអគ្គិសនីតាមសួនច្បារសាធារណៈ ជាដើម។
ចំពោះទីតាំងសម្រាប់ប្រារព្ធពិធីបុណ្យវិញ លោកថានឹងយកទីតាំងតាមបណ្ដោយមាត់ព្រែកក្នុងក្រុង ដែលអាជ្ញាធរគ្រោងនឹងរៀបចំកន្លែងកម្សាន្ត ដែលលោកថានឹងធ្វើឲ្យប្លែកគេ៖ «យើងប្រហែលជារៀបចំមាត់ដៃព្រែក ចាប់ពីស្ពានថ្មីហ្នឹងរហូតដល់ប្រហែលជាផែត្រីឯណោះ ហើយយើងក៏បានឈូសឆាយផ្លូវព័ទ្ធជុំវិញហើយអស់ដែរ ទម្រាំដល់ខែ១២ យើងអាចហើយ ហើយថ្នល់កៅស៊ូហ្នឹងរហូតជិតទៅដល់ហ្នឹង ហើយយើងនឹងអាចរៀបខុសគេ មិនដូចខេត្តផ្សេងទេ យើងអាចនឹងរៀបនៅលើទឹកដោយមានកាណូតដាក់នៅហ្នឹង ដោយមានផែសិប្បនិម្មិតអីឲ្យលេងអីនៅលើហ្នឹងតែម្ដង ហើយភ្ញៀវយើងសន្និដ្ឋានថាយ៉ាងតិចក៏ពីប្រាំម៉ឺនឡើងដែរ»។
កំពត គឺជាខេត្តចំណាស់មួយជាប់សមុទ្រមានសំណង់ និងអគារចាស់ៗ ដូចជាផ្ទះស្ពានសល់ពីជំនាន់អាណានិគមបារាំង មានរមណីយដ្ឋានធម្មជាតិទេសចរណ៍តាមមាត់ព្រែក សម្រាប់ស្រូបខ្យល់អាកាសបរិសុទ្ធ មើលថ្ងៃលិច និងមើលទេសភាពលើកំពូលភ្នំបូកគោ ចម្ការម្រេច ភូមិអ្នកនេសាទ ជាដើម។
ក៏ប៉ុន្តែ មន្ត្រីអង្គការបរិស្ថាន និងមន្ត្រីបក្សប្រឆាំង បានរិះគន់ចំពោះការអភិវឌ្ឍរបស់អាជ្ញាធរខេត្តនេះ ថានៅមានកម្រិត ជាពិសេសការរក្សាអនាម័យក្នុងក្រុង ដូចជាសេវារៀបចំប្រមូលសំរាមក្នុងក្រុងនៅយឺតយ៉ាវ ជួនកាលសំរាមត្រូវគរទុកស្អុយបីបួនថ្ងៃក៏មាន។
មន្ត្រីអង្គការការពារបរិស្ថានប្រចាំខេត្តកំពត ដែលសុំមិនបញ្ចេញឈ្មោះ បានសំណូមពរដល់អាជ្ញាធរខេត្តឲ្យប្រឹងកែលំអបរិស្ថានក្នុងក្រុងបន្ថែមទៀត ទើបសមឈ្មោះថា កំពតជាទីក្រុងរមណីយដ្ឋានធម្មជាតិពិតប្រាកដមែន។
ចំណែកមន្ត្រីក្រុមប្រឹក្សាខេត្តកំពត អ្នកស្រី សម ចរិយា ក៏យល់ឃើញដូចគ្នាដែរ ជាពិសេសអ្នកស្រីសុំឲ្យអាជ្ញាធររៀបចំកែលំអបរិស្ថាននៅកំពង់ផែក្នុងក្រុង និងប្រព័ន្ធលូទឹកស្អុយនៅមាត់ព្រែក ដែលជាទីតាំងសម្រាប់ធ្វើពិធីបុណ្យសមុទ្រនេះតែម្ដង។
ឆ្លើយតបចំពោះសំណូមពរ និងការិះគន់នេះ លោក ស៊ឹម វុទ្ធា អះអាងថា អាជ្ញាធរខេត្តកំពុងរៀបចំកែលំអប្រព័ន្ធលូ និងបរិស្ថាននៅក្នុងក្រុងនេះហើយ។
រដ្ឋាភិបាលកម្ពុជា ដែលមានក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ បានសម្រេចប្រារព្ធធ្វើបុណ្យសមុទ្របីឆ្នាំមកហើយ ដោយកំណត់យកខេត្តជាប់សមុទ្រសម្រាប់ប្រារព្ធពិធីនេះ ប្ដូរវេនគ្នាក្នុងមួយឆ្នាំម្ដង។ ខេត្តជាប់សមុទ្រទាំងនោះមានខេត្តកែប កំពត ព្រះសីហនុ និងខេត្តកោះកុង។ ដោយឡែកខេត្តកំពត ត្រូវទទួលធ្វើជាម្ចាស់ផ្ទះឆ្នាំទី៤ បន្តវេនពីខេត្តកោះកុង នៅខែធ្នូ ឆ្នាំនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។