កម្មកររោងចក្រក្បាលកោះ ស្ថិតនៅខណ្ឌច្បារអំពៅ រាជធានីភ្នំពេញ ដែលថៅកែរត់ចោល ហើយខ្វែងគំនិតគ្នាក្នុងរឿងលក់ឡាយឡុងរបស់របរសេសសល់នៅរោងចក្រនោះ ព្រមព្រៀងគ្នារង់ចាំដំណោះស្រាយពីសាលារាជធានីភ្នំពេញ រយៈពេលមួយសប្ដាហ៍ទៀត។
ការព្រមបន្តការរង់ចាំមួយសប្ដាហ៍ទៀតនេះ គឺសម្រេចនៅក្នុងកិច្ចប្រជុំចរចារវាងភាគីកម្មករ ដែលសម្របសម្រួលដោយអាជ្ញាធរខណ្ឌច្បារអំពៅ នៅព្រឹកថ្ងៃទី២៣ កុម្ភៈ។
តំណាងក្រុមកម្មករដែលជំទាស់នឹងការលក់ឡាយឡុង គឺអ្នកស្រី អុល វណ្ណា ថ្លែងថា ការរង់ចាំនេះតាមការពន្យាររបស់អាជ្ញាធរខណ្ឌ៖ «ពន្យារពេលមួយអាទិត្យទៀតដើម្បីដាក់ពាក្យហ្នឹងទៅសាលាក្រុងជួយដោះស្រាយ។ នៅរង់ចាំការសម្រេច ប៉ុន្តែព្រឹកមិញយើងប្រជុំខាងអភិបាលហ្នឹង ខាងភ្ញៀវទិញគេឲ្យថែមបាន ១៣ម៉ឺនដុល្លារ។ ដំបូងគេឲ្យ ១២ម៉ឺន ៥ពាន់ គេថែម ៥ពាន់ទៀត។ គេថា ធ្វើសម្បទានឲ្យកម្មករ អាណិតកម្មករ។ តែក្នុងហ្នឹងក៏ខ្ញុំជំទាស់ដែរ។ ខ្ញុំថាអត់ទទួលយក ដោយសារតែមិនគ្រប់គ្រាន់នឹងប្រាក់ខែចុងក្រោយពួកខ្ញុំផង។ ខ្ញុំជំទាស់រហូតថា ខ្ញុំអត់លក់ទេ»។
កម្មកររោងចក្រនេះ ខ្វែងគំនិតគ្នាក្នុងរឿងលក់ឡាយឡុងរបស់របរសេសសល់នៅរោងចក្រនោះ ដើម្បីយកលុយទូទាត់ប្រាក់ឈ្នួលចុងក្រោយរបស់ពួកគាត់នៅក្នុងខែធ្នូ ឆ្នាំ២០១៦ ដែលថៅកែមិនបានបើកឲ្យ។
ក្រុមកម្មករដែលអះអាងថា មានចំនួន ៨០០ ទៅ ៩០០នាក់ សម្រេចលក់របស់របរសេសសល់នេះ ពួកគាត់កំពុងត្រូវការលុយសម្រាប់បង់ថ្លៃបន្ទប់ជួល និងចំណាយផ្សេងៗ។ ពួកគាត់ថា មិនអាចរង់ចាំដំណោះស្រាយតាមផ្លូវតុលាការការទេ ពីព្រោះស៊ីពេលយូរ។ ប៉ុន្តែកម្មករមួយក្រុមទៀត លើកហេតុផលថា ពួកគាត់ចង់បានដំណោះស្រាយតាមផ្លូវតុលាការ ដើម្បីឲ្យពួកគាត់ទទួលបានការទូទាត់សំណង ៥ចំណុច ដែលមានជាអាទិ ប្រាក់ឈ្នួលចុងក្រោយនៅខែធ្នូ ឆ្នាំ២០១៦ និងប្រាក់អតីតភាពការងារ ដែលគាត់បានធ្វើការនៅរោងចក្រនេះ ១០ឆ្នាំមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។