កម្មករកម្មការិនីរោងចក្រ អ៊ឹម វ៉េ (M.V) ខេត្តកំពង់ឆ្នាំង បារម្ភខ្លាចប្លង់សេ ឬពិតានរបស់អគាររោងចក្របាក់ធ្លាក់សង្កត់លើ ក្រោយហេតុការណ៍ពិតាននៅអគារអេ (A) និងអគារអេច្ឆ (H) ផ្នែកស្វ័យប្រវត្តិនៃរោងចក្រនេះ បានបាក់សង្កត់លើកម្មករបណ្ដាលឲ្យកម្មការិនីបីនាក់របួសធ្ងន់ និងស្រាល។ តំណាងក្រុមហ៊ុនអះអាងថា អគារនៅមានគុណភាពល្អ មិនគួរឲ្យបារម្ភទេ។
ក្រោយហេតុការណ៍បាក់ពិតានពីរលើកនៅក្នុងរោងចក្រ អ៊ឹម វ៉េ គឺលើកទីមួយនៅព្រឹកថ្ងៃទី១២ ខែកក្កដា បណ្ដាលឲ្យកម្មការិនីបីនាក់របួស និងលើកទីពីរនៅព្រឹកថ្ងៃទី១៥ ខែកក្កដា មិនបណ្ដាលឲ្យកម្មករណាម្នាក់របួសនោះទេ ប៉ុន្តែកម្មករកម្មការិនីមានអារម្មណ៍ភ័យខ្លាចចំពោះហេតុការណ៍ទាំងនេះ។
ប្រធានសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រ អ៊ឹម វ៉េ គឺអ្នកស្រី នួន សំអុល ឲ្យដឹងនៅថ្ងៃទី១៦ ខែកក្កដា ថា កម្មការិនីពីរនាក់ក្នុងចំណោមបីនាក់ដែលរបួស មិនទាន់អាចចូលធ្វើការវិញបាននៅឡើយទេ ដោយកំពុងសម្រាកព្យាបាលនៅផ្ទះ។ អ្នកស្រីថា កម្មករប្រមាណ ១.៣០០នាក់ កំពុងបំពេញការងារតាមជំនាញនៅអគារ អិល (L) កម្ពស់បីជាន់ ដែលជាន់ទីបីមានផ្ទុកដោយអីវ៉ាន់ចាស់ៗ និងគ្រឿងម៉ាស៊ីនធ្ងន់ៗ ហើយមានស្នាមប្រេះជាច្រើនកន្លែងនោះ ក៏ព្រួយបារម្ភពីសុវត្ថិភាពរបស់ពួកគេដែរ៖ « អ្វីដែលជាបញ្ហា គាត់ព្រួយបារម្ភបំផុត គឺនៅអគារបីជាន់មានប្រេះតាមជញ្ជាំង តាមជណ្ដើរ និងតាមផ្លូវដែលត្រូវឡើងទៅធ្វើការ ហើយមួយទៀតដោយសារផ្ទុកទម្ងន់ធ្ងន់។ នៅជាន់ទី២ កម្មករផ្នែកស្វ័យប្រវត្តិធ្វើការ ហើយជាន់ទី១ ផ្ទាល់ដី គឺកម្មករផ្នែកផុង។ អ៊ីចឹងរាល់ថ្ងៃនេះ ពួកគាត់បារម្ភខ្លាំងណាស់ខ្លាចបាក់សង្កត់លើគាត់ »។
ឆ្លើយតបបញ្ហានេះ ប្រធានរដ្ឋបាលរោងចក្រ អ៊ឹម វ៉េ លោក អ៊ុន ឆន្ទៈ បញ្ជាក់យ៉ាងខ្លីថា មន្ត្រីជំនាញបានត្រួតពិនិត្យគុណភាពអគាររួចហើយឃើញថា នៅមានគុណភាពល្អ ដែលមិនអាចស្រុត ឬបាក់ធ្លាក់លើកម្មករនោះទេ។ ចំពោះការបាក់ធ្លាក់ពិតានលើកម្មករនៅអគារផ្សេងនៃរោងចក្រនេះ លោក អ៊ុន ឆន្ទៈ មិនបានអត្ថាធិប្បាយអ្វីឡើយ ដោយលោកប្រាប់ថារវល់ប្រជុំ រួចក៏ចុចផ្ដាច់ទូរស័ព្ទ៖ « គេធ្វើសុទ្ធតែវិស្វករធ្វើ ! អាហ្នឹងបងអាចចុះមកមើលផ្ទាល់បានអគារថ្មី។ លោក ជិន ជេដ្ឋា៖ មានស្នាមប្រេះអ៊ីចឹងមែន ឬអត់ទេ ? អត់ទេអត់មានទេ ! ស្នាមបៀកស៊ីម៉ងត៍ ឧទាហរណ៍តាមផ្ទះយើងមានគេបូកមួយសារួចតែម្ដង តែសំណង់ឥឡូវគេបូកហើយ គេសីម្ដងទៀតបានវាអត់ប្រេះ »។
វិទ្យុអាស៊ីសេរី មិនអាចទាក់ទងប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ឆ្នាំង លោក ពៅ ស៊ីថា ដើម្បីសាកសួរបន្ថែមលើវិធានការបង្ការ ឬសុវត្ថិភាពការងារនៅក្នុងរោងចក្រនេះបានទេ នៅថ្ងៃទី១៦ ខែកក្កដា។
ប៉ុន្តែតំណាងសហជីព ថាបន្ទាប់ពីកម្មករមានគ្រោះថ្នាក់ ភាគីក្រុមហ៊ុនស្នើឲ្យកម្មកររក្សាភាពស្ងៀមស្ងាត់ ដោយគេនឹងជួសជុល ឬបង្ការមិនឲ្យកម្មករមានគ្រោះថ្នាក់ទៀតឡើយ។
អ៊ឹម វ៉េ គឺជាក្រុមហ៊ុនកាត់ដេរសម្លៀកបំពាក់នាំចេញទៅក្រៅប្រទេស ឋិតនៅក្រុងកំពង់ឆ្នាំង ខេត្តកំពង់ឆ្នាំង ដែលក្រុមហ៊ុនមួយនេះមានកម្មករបម្រើការងារប្រមាណ ៣ពាន់នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។