នៅថ្ងៃទី១៥ មេសា ត្រូវជាថ្ងៃទី២ នៃពិធីបុណ្យចូលឆ្នាំថ្មី កម្ពុជាបានសម្រេចឯកត្តកម្មពិភពលោកថ្មីមួយទៀត ដើម្បីកត់ត្រាចូលក្នុងកំណត់ត្រាពិភពលោក (Guinness World Record) ដោយការរាំចង្វាក់ម៉ាឌីហ្សូន សម្រាប់ព្រឹត្តិការណ៍អង្គរសង្ក្រាន្តឆ្នាំ២០១៥។
អ្នកនាំពាក្យព្រឹត្តិការណ៍អង្គរសង្ក្រាន្ត របស់សហភាពសហព័ន្ធយុវជនកម្ពុជា លោក សោម រតនា បានឲ្យដឹងថា ការរាំចង្វាក់ម៉ាឌីហ្សូនសម្រាប់បំបែកឯកត្តកម្មពិភពលោកនេះ មានអ្នកចូលរួមរាំចំនួន២ពាន់១៥នាក់ក្នុងរយៈពេល៥នាទី នៅទីលានជល់ដំរី ក្នុងបរិវេណតំបន់អង្គរ។
លោកបន្តថា ការរាំចង្វាក់ម៉ាឌីហ្សូនបំបែកឯកត្តកម្មពិភពលោកនេះ គឺដើម្បីបង្ហាញពីសាមគ្គីភាព និងបង្កភាពសប្បាយរីករាយដល់ពលរដ្ឋពីគ្រប់មជ្ឈដ្ឋាន និងពិភពលោកផងដែរ៖ «ពលរដ្ឋនៃពិភពលោកមួយចំនួនមិនទាន់បានស្គាល់ព្រះរាជាណាចក្រកម្ពុជាយើងនៅឡើយទេ ហើយបើអ្នកស្គាល់ ២០ ឬ៣០ឆ្នាំមុន គឺស្គាល់តាមរយៈសង្គ្រាមបែកបាក់ហែកហួរគ្នា តែនៅពេលនេះគឺគេបានស្គាល់តាមរយៈ ការចងសាមគ្គីគ្នា របស់យុវជនជំនាន់ក្រោយ ក្នុងការបង្កើតឯកត្តកម្មពិភពលោក ដែលអាចប្រៀបប្រដូចការប្រមូលផ្ដុំ នូវចង្កឹះមួយបាច់ដែលកាច់មិនបាក់ នេះជាការបង្ហាញមោទនភាពជាតិ និងបង្កើតឲ្យមានបរិយាកាសសប្បាយរីករាយ ក្នុងឱកាសបុណ្យចូលឆ្នាំថ្មីប្រពៃណីជាតិ»។
កម្មវិធីអង្គរសង្ក្រាន្តឆ្នាំនេះ កម្ពុជាបានបំបែកឯកត្តកម្មពិភពលោកចំនួនពីរ គឺនំអន្សមយក្សទម្ងន់ជាង៤តោន និង ការរាំចង្វាក់ម៉ាឌីហ្សូននេះ។
ក្រៅពីកម្មវិធីបំបែកឯកត្តកម្មពិភពលោក ក្នុងព្រឹត្តិការណ៍អង្គរសង្ក្រាន្តឆ្នាំនេះ សហភាពសហព័ន្ធយុវជនកម្ពុជា ក៏មានរៀបចំអង្រុតយក្ស កន្ត្រងប្រហុកយក្ស មួកយក្ស និងបំពង់ទឹកត្នោតយក្សផងដែរ សម្រាប់បំបែកឯកត្តកម្មថ្នាក់ជាតិ ដែលទទួលស្គាល់ដោយក្រសួងវប្បធម៌ និងវិចិត្រសិល្បៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។