ក្រសួងកសិកម្ម រុក្ខាប្រមាញ់ និងនេសាទ បានបង្កើតក្រុមការងារផ្សព្វផ្សាយព័ត៌មានតាមបណ្ដាញសង្គមហ្វេសប៊ុក (Facebook) ដែលមានសមាសភាពចំនួន ១៤រូប។ ក្រសួងកសិកម្ម ថាក្រុមការងារនេះ នឹងផ្សព្វផ្សាយព័ត៌មានអំពីគោលនយោបាយ គោលការណ៍ និងសកម្មភាពសំខាន់ៗពាក់ព័ន្ធវិស័យកសិកម្ម ជូនដល់សាធារណជនឲ្យបានទូលំទូលាយជាងមុន។
ក៏ប៉ុន្តែ អ្នកជំនាញខាងកសិកម្មលើកឡើងថា វិធានការរបស់ក្រសួងធ្វើបែបនេះ នឹងមិនមានប្រសិទ្ធភាពខ្លាំងទេសម្រាប់អភិវឌ្ឍវិស័យកសិកម្មឲ្យរីកចម្រើននោះ។
អ្នកជំនាញកសិកម្ម ឲ្យដឹងនៅថ្ងៃទី១៩ មិថុនា ថា ដើម្បីឲ្យវិស័យកសិកម្មនៅកម្ពុជា មានការរីកចម្រើននោះ លុះត្រាណាក្រសួងបណ្ដុះបណ្ដាលបន្ថែមមន្ត្រីជំនាញកសិកម្ម និងបញ្ជូនមន្ត្រីជំនាញទាំងនោះទៅបង្រៀនកសិករដល់មូលដ្ឋានផ្ទាល់ ទើបមានប្រសិទ្ធភាព។
អ្នកជំនាញកសិកម្ម លោកបណ្ឌិត យ៉ង សាំងកុមារ យល់ថា ក្រសួងបង្កើតក្រុមការងារផ្សព្វផ្សាយតាមហ្វេសប៊ុកនេះ ពុំសូវមានប្រសិទ្ធភាពទេ ដើម្បីជំរុញការអភិវឌ្ឍវិស័យកសិកម្មនោះ។ លោកស្នើឲ្យក្រសួងកសិកម្ម គួរតែបញ្ជូនមន្ត្រីជំនាញទៅបង្រៀនកសិករដល់មូលដ្ឋានផ្ទាល់ ឲ្យប្រជាពលរដ្ឋទទួលបានបច្ចេកទេសកសិកម្មត្រឹមត្រូវ ទើបមានប្រសិទ្ធភាពជាង៖ « ខ្ញុំយល់ថា អ្វីដែលសំខាន់បំផុតសម្រាប់ការងារកសិកម្ម ការអភិវឌ្ឍវិស័យកសិកម្ម ការងារអភិវឌ្ឍ និងជួយកសិករហ្នឹង យើងចង់ឃើញក្រសួងបញ្ជូនមន្ត្រីជំនាញ អ្នកបច្ចេកទេសកសិកម្ម ទៅដល់មូលដ្ឋានភូមិ-ឃុំផ្ទាល់ និងផ្តល់ប្រាក់បៀវត្សសមរម្យជូនមន្ត្រីជំនាញទាំងនោះ ឲ្យពួកគាត់ចេះផលិតចេះចិញ្ចឹម ចេះធ្វើតាមបច្ចេកទេសកសិកម្មច្បាស់លាស់ត្រឹមត្រូវ។ ខ្ញុំជឿថា កសិករនឹងមានជីវភាពសមរម្យ ហើយវិស័យកសិកម្មនឹងរីកចម្រើន » ។
ការលើកឡើងរបស់មន្ត្រីជំនាញកសិកម្មនេះ ធ្វើឡើងបន្ទាប់ពីក្រសួងកសិកម្ម បានបង្កើតក្រុមការងារផ្សព្វផ្សាយព័ត៌មានកសិកម្មតាមបណ្ដាញសង្គមហ្វេសប៊ុក។
រដ្ឋមន្ត្រីថ្មីនៃក្រសួងកសិកម្ម រុក្ខាប្រមាញ់ និងនេសាទ លោក វេង សាខុន អះអាងថា ក្រុមការងារផ្សព្វផ្សាយព័ត៌មានតាមបណ្ដាញសង្គមហ្វេសប៊ុកដែលមានសមាសភាពចំនួន ១៤រូប ដែលសុទ្ធតែជាថ្នាក់ដឹកនាំគ្រប់អង្គភាពក្រោមឱវាទរបស់ក្រសួងកសិកម្ម មិនត្រឹមតែផ្សព្វផ្សាយព័ត៌មានពីគោលនយោបាយសំខាន់ៗរបស់ក្រសួងប៉ុណ្ណោះទេ ក្រុមការងារនេះក៏នឹងជួយឆ្លើយតប ព្រមទាំងដោះស្រាយរាល់សំណូមពររបស់ប្រជាពលរដ្ឋតាមបណ្ដាញសង្គមហ្វេសប៊ុកដែរ។
ការលើកឡើងរបស់រដ្ឋមន្ត្រីថ្មីនៃក្រសួងកសិកម្ម រុក្ខាប្រមាញ់ និងនេសាទ នៅពេលនេះ បានធ្វើឡើងនៅក្នុងសេចក្តីសម្រេចមួយស្ដីពីការបង្កើតក្រុមការងារផ្សព្វផ្សាយព័ត៌មានតាមបណ្ដាញសង្គមហ្វេសប៊ុក ដែលបានផ្សព្វផ្សាយនៅថ្ងៃទី១៧ ខែមិថុនា។
នៅក្នុងសេចក្តីសម្រេចដដែលនោះ រដ្ឋមន្ត្រីថ្មីនៃក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានណែនាំឲ្យថ្នាក់ដឹកនាំគ្រប់អង្គភាពក្រោមឱវាទរបស់ខ្លួន ត្រូវបកស្រាយបំភ្លឺជូនសាធារណជនទូទៅពាក់ព័ន្ធសភាពការណ៍វិវឌ្ឍន៍វិស័យកសិកម្ម និងការងារជំនាញរបស់អង្គភាព ព្រមទាំងបានបន្ថែមភារកិច្ចឲ្យតាមដាន និងស្រង់ព័ត៌មានបណ្ដាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន ដើម្បីឆ្លើយតប និងដោះស្រាយជូនប្រជាពលរដ្ឋទាន់ពេលវេលា។
រដ្ឋមន្ត្រីថ្មីនៃក្រសួងកសិកម្ម រូបនេះអះអាងថា ដើម្បីឲ្យក្រុមការងារផ្សព្វផ្សាយព័ត៌មានតាមបណ្ដាញសង្គមហ្វេសប៊ុក អនុវត្តការងារទៅរលូន និងមានប្រសិទ្ធភាព ក្រសួងក៏បានបង្គាប់ឲ្យប្រធាន អនុប្រធាន និងសមាជិកក្រុមការងារ ត្រូវធ្វើការទំនាក់ទំនងគ្នាជាប់ជាប្រចាំ និងត្រូវប្រជុំប្រចាំខែ ត្រួតពិនិត្យសកម្មភាពការងារ និងកំណត់ទិសដៅការងារដែលត្រូវអនុវត្តបន្ត ដើម្បីជំរុញឲ្យវិស័យកសិកម្មកម្ពុជា រីកចម្រើន។ ជាងនេះទៀត លោក វេង សាខុន បញ្ជាក់ថា ក្រុមការងារនេះ នឹងត្រូវអនុវត្តតាមសេចក្តីសម្រេចនេះចាប់ពីការជូនដំណឹងនេះតទៅ។
ការសម្រេចបង្កើតក្រុមការងាររបស់ក្រសួងកសិកម្ម ត្រូវបានគេមើលឃើញថា ធ្វើឡើងក្រោយពេលលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ បានចេញសេចក្ដីណែនាំទៅឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូ រដ្ឋមន្ត្រីគ្រប់ក្រសួង ប្រធានគ្រប់ស្ថាប័ន និងអភិបាលនៃគណៈអភិបាលរាជធានី-ខេត្ត ឲ្យយកចិត្តទុកដាក់ដោះស្រាយលើបញ្ហានានា ដែលសព្វថ្ងៃលោកទទួលបានព័ត៌មានចម្រុះ រួមទាំងពាក្យបណ្ដឹង និងសំណូមពរពីប្រជាពលរដ្ឋទូទាំងប្រទេសឲ្យមានតម្លាភាព និងមានប្រសិទ្ធភាពខ្ពស់។
លោកនាយករដ្ឋមន្ត្រី ហ៊ុន សែន ក៏ចេញសេចក្ដីណែនាំមួយបង្គាប់ឲ្យមន្ត្រីជាន់ខ្ពស់រដ្ឋាភិបាល ចាត់តាំងឲ្យមានក្រុមតាមដានស្រង់ព័ត៌មានប្រចាំថ្ងៃពីពលរដ្ឋដែលបានប្ដឹង និងសំណូមពរបញ្ហាផ្សេងៗតាមរយៈបណ្ដាញសង្គមហ្វេសប៊ុករបស់លោក ដើម្បីយកមកត្រួតពិនិត្យ និងដោះស្រាយ។
បើទោះជាយ៉ាងណា សង្គមស៊ីវិល និងអ្នកធ្វើការពាក់ព័ន្ធនឹងវិស័យកសិកម្ម នៅតែយល់ថា ការណែនាំរបស់លោក ហ៊ុន សែន ឲ្យមន្ត្រីថ្នាក់ក្រោមតាមដានសំណូមពររបស់ពលរដ្ឋលើទំព័រហ្វេសប៊ុក គឺធ្វើឡើងគ្រាន់តែដើម្បីចំណេញនយោបាយប៉ុណ្ណោះ។ ពួកគេថា វិធានការនេះមិនអាចដោះស្រាយបញ្ហាជាតិធំៗប្រកបដោយប្រសិទ្ធភាពនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។