ប្រទេសថៃ ដែលបច្ចុប្បន្នគ្រប់គ្រងដោយកងយោធានោះ ចាប់ផ្ដើមរឹតបន្តឹងសេរីភាពនានារបស់ជនស៊ីវិល នៅក្នុងប្រទេស និងពង្រឹងសន្តិសុខជាតិ។ ក្នុងគោលដៅពង្រឹងសន្តិសុខជាតិនោះ កងយោធាថៃ បានចេញបញ្ជាឲ្យក្រុមហ៊ុន រោងចក្រ សហគ្រាសឯកជនថៃ បញ្ឈប់ការប្រើប្រាស់ពលករបរទេសខុសច្បាប់តទៅទៀត។ ដូច្នេះ ពលករខុសច្បាប់ទាំងនោះ ដែលក្នុងនោះរួមមានពលករខ្មែរផង ត្រូវបង្ខំចិត្តវិលត្រឡប់មកប្រទេសខ្លួនវិញ។ ការបង្ខំឲ្យពលករខ្មែរវិលមកស្រុកខ្លួនវិញនោះ ធ្វើឲ្យមានការព្រួយបារម្ភ និងមានដំណឹងចចាមអារ៉ាមជាច្រើន។
អាជ្ញាធរថៃ ដឹកជញ្ជូនពលករខ្មែរវិលត្រឡប់មកប្រទេសវិញក្នុងចំនួនច្រើន តាមរូបភាពចាប់បង្ខំ និងដាក់ឡានទ្រុងសំណាញ់ដែក ដូចសត្វធាតុ តាមច្រកព្រំដែនអន្តរជាតិនានារវាងកម្ពុជា ថៃ កំពុងតែបង្កើតឲ្យមានការចាប់អារម្មណ៍ និងតវ៉ាពីប្រជាពលរដ្ឋ និងអាជ្ញាធរខ្មែរ។
ប្រជាពលរដ្ឋខ្មែរជាពលករខុសច្បាប់មួយចំនួន បាននិយាយថា កងយោធាថៃ បោសសម្អាតបណ្ដេញពលករបរទេស ក្នុងនោះមានពលករខ្មែរផង ឲ្យចេញពីប្រទេសថៃ នោះ ដោយសារគេខ្លាចពលករខ្មែរចូលរួមធ្វើបាតុកម្មតវ៉ាការកាន់កាប់អំណាចដោយកងយោធាថៃ និងអ្នកខ្លះទៀតបាននិយាយថា ពួកគេមានការភ័យខ្លាចណាស់ចំពោះការបណ្ដេញចេញនោះ ពីព្រោះពួកគេចូលប្រទេសថៃ ខុសច្បាប់ ងាយទទួលការវាយតប់ ចាប់ចង ដាក់ពន្ធនាគារ ជាដើម។
ទាក់ទងករណីអាជ្ញាធរថៃ បញ្ជូនពលករខ្មែរខុសច្បាប់ក្នុងចំនួនច្រើនពាន់នាក់ ឲ្យវិលមកកម្ពុជា វិញ ចាប់ពីថ្ងៃទី១ មិថុនា មក ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១១ មិថុនា បានចេញផ្សាយសេចក្តីប្រកាសព័ត៌មានមួយ បញ្ជាក់ថា អាជ្ញាធរយោធាថៃ បានដាក់កំហិតឲ្យក្រុមហ៊ុន រោងចក្រ សហគ្រាសឯកជនថៃ បញ្ឈប់ការប្រើប្រាស់ពលករខុសច្បាប់តទៅទៀត។ ដូច្នេះ ក្រុមហ៊ុន រោងចក្រ សហគ្រាស ទាំងនោះ សម្រេចឲ្យពលករខុសច្បាប់វិលត្រឡប់ទៅប្រទេសខ្លួនវិញ រួមទាំងពលករខ្មែរខុសច្បាប់ផង។ ករណីអាជ្ញាធរថៃ បញ្ជូនពលករខ្មែរខុសច្បាប់មកកម្ពុជា វិញនោះ មិនមែនជាលើកទី១ទេ។ កន្លងមក ទោះបីជាមុនប្រទេសថៃ គ្រប់គ្រងដោយអាជ្ញាធរយោធាក៏ដោយ ក៏អាជ្ញាធរថៃ បានធ្វើការបញ្ជូនពលករខ្មែរខុសច្បាប់រាប់រយនាក់ មកកម្ពុជា វិញដែរ រៀងរាល់ ២ ទៅ ៣ថ្ងៃម្តង។ ក្នុងរយៈពេល ៩ថ្ងៃ គិតចាប់តាំងពីថ្ងៃទី១ ដល់ទី៩ មិថុនា អាជ្ញាធរថៃ បានបញ្ជូនពលករខ្មែរខុសច្បាប់ចំនួនជាង ៧.០០០នាក់ (៧.៥០៧) មកប្រទេសកម្ពុជា វិញ។ នៅថ្ងៃទី១០ មិថុនា កន្លងទៅនេះ រដ្ឋលេខាធិការក្រសួងការបរទេសកម្ពុជា លោក អ៊ុង ស៊ាន បានជួបជាមួយឯកអគ្គរាជទូតថៃ ប្រចាំកម្ពុជា អំពីស្ថានការណ៍បច្ចុប្បន្ននៅប្រទេសថៃ។ ក្នុងជំនួបនោះ លោក អ៊ុង ស៊ាន បានស្នើឲ្យភាគីថៃ អនុវត្តការបញ្ជូនពលករខ្មែរដែលចូលធ្វើការខុសច្បាប់នៅថៃ មកកម្ពុជា វិញឲ្យមានលក្ខណៈមនុស្សធម៌ដោយមិនត្រូវ ដាក់ឲ្យឈរប្រជ្រៀតគ្នាក្នុងរថយន្តព័ទ្ធដោយសំណាញ់ដែក។
លោក កុយ គួង មន្រ្តីនាំពាក្យក្រសួងការបរទេសបន្ថែមទៀតថា បច្ចុប្បន្ននេះអាជ្ញាធរខ្មែរបានយកចិត្តទុកដាក់ក្នុងការជួយឲ្យពលករខ្មែរ ធ្វើការខុសច្បាប់នៅថៃ នោះ បានវិលមកវិញដោយសុវត្ថិភាព៖ «ឯកអគ្គរាជទូតយើងនៅបាងកក ក៏បានធ្វើការជាមួយអាជ្ញាធរពាក់ព័ន្ធថៃ ដើម្បីឲ្យគេជួយសម្រួលក្នុងការបញ្ជូនពលករខុសច្បាប់ ឲ្យមកស្រុកវិញតាមសម្រួល។ ដោយកុំឲ្យដាក់ទោសគាត់ ហើយជាងនេះទៀត ហើយកាលពីម្សិលមិញ ឯកឧត្តម អ៊ុង ស៊ាន ក៏បានជួបជាមួយឯកអគ្គរាជទូតថៃ ប្រចាំនៅកម្ពុជា ផងដែរ។ យើងបានស្នើទូតថៃ ថាអាជ្ញាធរថៃ ដែលបញ្ជូនពលករខ្មែរ ទៅធ្វើការខុសច្បាប់នៅប្រទេសថៃ នោះ ឲ្យមកវិញមានលក្ខណៈមនុស្សធម៌»។
លោក ពេជ្រ វណ្ណា ប្រធានការិយាល័យទំនាក់ទំនងកម្ពុជាថៃ នៅព្រំដែនប៉ោយប៉ែត ខេត្តបន្ទាយមានជ័យ មានប្រសាសន៍ថា គិតមកទល់ថ្ងៃទី១១ មិថុនា នេះ ទាហានថៃ នៅបន្តដឹកជញ្ជូនពលករខ្មែរខុសច្បាប់ក្នុងចំនួនច្រើន មកប្រគល់ឲ្យអាជ្ញាធរខ្មែរនៅឡើយ៖ «អត់មានឯកសារអីបញ្ជាក់ជាក់លាក់ថា ចប់នៅពេលណាទេ។ ចេះតែដឹកមកទម្លាក់នៅកន្លែងប៉ូលិសអន្តោប្រវេសន៍នេះ»។
ប្រជាពលរដ្ឋខ្មែរជាពលករមួយរូបរស់នៅ និងបំពេញការងារស្របច្បាប់នៅប្រទេសថៃ សុំមិនចេញឈ្មោះ បាននិយាយថា ការរស់នៅ និងធ្វើការនៅប្រទេសថៃ គឺមានការភ័យព្រួយ ពីព្រោះកងយោធាជាអ្នកកាន់អំណាច និងដាក់ឲ្យគោរព និងអនុវត្តច្បាប់អាជ្ញាសឹក។ ដូច្នេះ ការរស់នៅ និងធ្វើការ គឺត្រូវគោរពច្បាប់នោះ ជាពិសេសនៅពេលយប់ គឺមានបម្រាមគោចរមិនឲ្យធ្វើដំណើរទេ។
ទាក់ទងករណីទាហានថៃ បញ្ជូនពលករខ្មែរខុសច្បាប់ក្នុងចំនួនច្រើន វិលត្រឡប់មកប្រទេសវិញនេះ លោក យ៉ា ណាវុធ នាយកអង្គការខារ៉ាមកម្ពុជា (CARAM) មានប្រសាសន៍ថា បច្ចុប្បន្នលោកទទួលការសុំអំពាវនាវឲ្យជួយតាមទូរស័ព្ទជាច្រើនពីសំណាក់ពលករខ្មែរ ដែលខុសច្បាប់នៅប្រទេសថៃ ដើម្បីឲ្យពួកគេបានវិលមកប្រទេសវិញ។ លោកសុំឲ្យអាជ្ញាធរថៃ អនុវត្តការបញ្ជូនពលករខ្មែរមកប្រទេសវិញ ដោយគោរពតាមគោលការណ៍អន្តរជាតិ ដែលប្រទេសថៃ ជាហត្ថលេខី៖ «យើងអត់ទាន់មានរបាយការណ៍ថា ពលរដ្ឋយើងត្រូវគេចង គេវាយ ឬក៏បាញ់សម្លាប់អីនៅឡើយទេ។ យើងគ្រាន់តែបានទទួលរបាយការណ៍ថា គាត់កំពុងលាក់ខ្លួននៅកន្លែងមួយ ហើយស្នើសុំឲ្យជួយសង្គ្រោះគាត់បានវិលត្រឡប់មកប្រទេសកំណើតរបស់ខ្លួនវិញ ពីព្រោះគាត់មិនដឹងទាក់ទងទៅកន្លែងណា ហើយមួយទៀត គឺអត់ថវិកា ហើយឥឡូវអត់ការងារធ្វើ»។
ប្រទេសថៃ ជាកន្លែងដែលប្រជាពលរដ្ឋខ្មែរជាច្រើននិយមធ្វើដំណើរទៅរកការងារធ្វើនៅទីនោះ ដោយសារមានការងារជាច្រើនត្រូវការកម្លាំងពលកម្ម មិនត្រូវការជំនាញ បានទទួលប្រាក់កម្រៃខ្ពស់ និងងាយចូលចេញតាមច្រករបៀងនានាដោយខុសច្បាប់។ ប្រភពអង្គការមិនមែនរដ្ឋាភិបាលកម្ពុជា បានឲ្យដឹងថា សព្វថ្ងៃមានពលករខ្មែរស្របច្បាប់ និងមិនស្របច្បាប់សរុបជាង ៤០ម៉ឺននាក់ ធ្វើការនៅប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។