ក្រសួងការងារ និងបណ្ដុះបណ្ដាលវិជ្ជាជីវៈ បង្ហាញកាលបរិច្ឆេទក្នុងការកំណត់ប្រាក់ឈ្នួលអប្បបរមារបស់កម្មកររោងចក្រផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៧។
សេចក្ដីប្រកាសព័ត៌មានរបស់ក្រសួងការងារ នៅថ្ងៃទី៦ មិថុនា បង្ហាញថា នៅខែកក្កដា នឹងចាប់ផ្ដើមពិភាក្សាជាលក្ខណៈផ្ទៃក្នុងរបស់ភាគីនីមួយៗ ហើយសម្រាប់ខែសីហា និងខែកញ្ញា នឹងមានការពិភាក្សាទ្វេភាគី និងត្រីភាគី។ លុះដល់ដើមខែតុលា គណៈកម្មការប្រឹក្សាការងារ នឹងប្រជុំសម្រេចប្រាក់ឈ្នួល ដើម្បីកំណត់កាលបរិច្ឆេទចូលជាធរមាន ចាប់ថ្ងៃទី១ មករា ២០១៧។
ចំពោះការកំណត់ប្រាក់ឈ្នួលអប្បបរមានេះ ក្រសួងរំលឹកដល់ភាគីពាក់ព័ន្ធ ឲ្យប្រើលក្ខណៈវិនិច្ឆ័យបែបសង្គម សេដ្ឋកិច្ច និងវិទ្យាសាស្ត្រ ដូចជាអតិផរណា ភាពប្រកួតប្រជែងជាដើម ដែលបានព្រមព្រៀងគ្នាកាលពីឆ្នាំ២០១៤។
នៅឆ្នាំ២០១៦ ប្រាក់ឈ្នួលកម្មករបានកើនឡើង១២ដុល្លារ លើសឆ្នាំ២០១៥ ដែលមានត្រឹម១២៨ដុល្លារក្នុង១ខែ ខណៈសហជីព និងកម្មករមួយចំនួនអះអាងថា ចំនួននេះនៅតិចតួចបំផុត និងមិនអាចធានាឲ្យកម្មកររស់នៅដោយសេចក្ដីថ្លៃថ្នូរបានឡើយ។ កាលពីដើមឆ្នាំ២០១៤ មានកម្មករជាច្រើននាក់ បានចេញតវ៉ាទាមទារដំឡើងប្រាក់ឈ្នួល រហូតដល់ប៉ះទង្គិចគ្នាយ៉ាងខ្លាំងជាមួយសមត្ថកិច្ច នៅលើផ្លូវវ៉េងស្រេង និងបណ្ដាលឲ្យកម្មករ៤នាក់ស្លាប់ ម្នាក់បាត់ខ្លួន និង២៣នាក់ត្រូវបានចាប់ខ្លួនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។