ក្រសួងទេសចរណ៍រំពឹងថា កម្ពុជាអាចនឹងទទួលភ្ញៀវទេសចរណ៍បន្ថែមទៀត បើបង្កើនការផ្សព្វផ្សាយលើយុទ្ធនាការទិសដៅមួយព្រះរាជាណាចក្រពីរ។
យុទ្ធនាការទិសដៅមួយព្រះរាជាណាចក្រពីរ ជាមធ្យោបាយទាក់ទាញភ្ញៀវទេសចរអន្តរជាតិ មកទស្សនាប្រទេសកម្ពុជា និងថៃ ដោយទិដ្ឋាការរួមគ្នា (Single Visa)។ យុទ្ធនាការនេះអនុវត្តតាំងពីដើមឆ្នាំ២០១៤មក ដើម្បីជាគំរូសម្រាប់អនុវត្តដល់ប្រទេសក្នុងតំបន់អាស៊ាន។ ក្នុងនោះកម្ពុជាបានទទួលភ្ញៀវទេសចរណ៍តែត្រឹមជាង៣រយនាក់ (៣៦០)ប៉ុណ្ណោះគិតត្រឹមខែមិថុនានេះ។
រដ្ឋមន្ត្រីក្រសួងទេសចរណ៍កម្ពុជា លោក ថោង ខុន បានអះអាងតាមទូរស័ព្ទនៅថ្ងៃទី១២ មិថុនា ថា យុទ្ធនាការនេះនៅមានភ្ញៀវទេសចរណ៍អន្តរជាតិតិចតួចណាស់ ចូលមកកម្ពុជា។
លោក ថោង ខុន បន្តថា លោកនឹងជំរុញឲ្យមានការផ្សព្វផ្សាយឲ្យកាន់តែទូលំទូលាយ ឬក៏ធ្វើការកែសម្រួលចំណុចខ្លះទៀត នៅពេលប្រជុំជាមួយប្រទេសក្នុងតំបន់នៅពេលខាងមុខ៖ «យើងនៅជជែកគ្នាបន្តទៀត និងពិនិត្យមើលស្អីកន្លងមកដែលមានបញ្ហា យើងត្រូវកែសម្រួល ឬធ្វើយ៉ាងម៉េច និយាយរួមការផ្សព្វផ្សាយនៅបានតិច ដែលយើងត្រូវកែសម្រួលឡើងវិញ»។
យ៉ាងណាក៏ដោយលោក ថោង ខុន បញ្ជាក់ថា យុទ្ធនាការទិសដៅមួយព្រះរាជាណាចក្រពីរនេះ នឹងធ្វើឲ្យកម្ពុជាចំណេញស្រូបទាញភ្ញៀវទេសចរណ៍ដែលចង់មកកម្ពុជា ចំពោះប្រទេសដែលគ្មានស្ថានទូត ឬអគ្គកុងស៊ុលខ្មែរប្រចាំការ តែមានស្ថានទូត ឬអគ្គកុងស៊ុលថៃនៅប្រទេសនោះ។
របាយការណ៍របស់ក្រសួងទេសចរណ៍កម្ពុជា បង្ហាញថា ចំនួនភ្ញៀវទេសចរណ៍អន្តរជាតិចូលមកទស្សនាកម្ពុជា មានចំនួនជាង១លាន៦សែននាក់ ក្នុងរយៈពេល៤ខែដើមឆ្នាំ២០១៥ ដោយមានកើនឡើងជាង៤ភាគរយ បើប្រៀបធៀបនឹង៤ខែដូចគ្នា កាលពីឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។