សង្គមស៊ីវិលដែលធ្វើការពាក់ព័ន្ធនឹងការអប់រំនៅកម្ពុជា ចាត់ទុកថា ការរឹតបន្តឹង និងការយកចិត្តទុកដាក់លើការប្រឡង នៅតែជារឿងសំខាន់ដើម្បីលើកកម្ពស់គុណភាពវិស័យអប់រំនៅកម្ពុជា។ សង្គមស៊ីវិលទាំងនោះ នឹងចូលរួមសង្កេតការណ៍ប្រឡងសញ្ញាបត្រមធ្យមសិក្សាទុតិយភូមិ ហៅកាត់ថា បាក់ឌុប ឆ្នាំ២០១៦ ដែលនឹងប្រព្រឹត្តទៅនៅថ្ងៃទី២២ ខែសីហា ខាងមុខនេះ។
ការប្រឡងសញ្ញាបត្រមធ្យមសិក្សាទុតិយភូមិ ហៅកាត់ថា បាក់ឌុប នៅឆ្នាំនេះ ក្រសួងអប់រំ បានបង្ហាញជំហរបន្តរឹតបន្តឹងដូចឆ្នាំមុនដដែល។ ទន្ទឹមគ្នានេះ សង្គមស៊ីវិលដែលធ្វើការពាក់ព័ន្ធនឹងវិស័យអប់រំ បានសាទរលើការបន្តចំណាត់ការនេះ ហើយសង្គមស៊ីវិលទាំងនោះ នឹងចូលរួមសង្កេតការណ៍ប្រឡងសញ្ញាបត្រមធ្យមសិក្សាទុតិយភូមិ ដើម្បីពង្រឹងគុណភាពអប់រំនៅកម្ពុជា ឲ្យកាន់តែប្រសើរឡើង។
ការលើកឡើងរបស់សង្គមស៊ីវិលនៅពេលនេះ ធ្វើឡើងក្រោយអង្គភាពប្រឆាំងអំពើពុករលួយ បានចេញសេចក្តីជូនដំណឹងដល់សង្គមស៊ីវិល បុគ្គលឯកជន ចូលរួមសង្កេតការណ៍ការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៥-២០១៦។
នាយកអង្គការសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក ហៅកាត់ថា អានសា (ANSA) លោក សន ជ័យ មានប្រសាសន៍ថា ស្ថាប័នលោកនឹងចុះឈ្មោះសង្កេតការណ៍ជាមួយអង្គភាពប្រឆាំងអំពើពុករលួយ ដើម្បីត្រៀមដាក់អ្នកសង្កេតការណ៍ប្រឡងបាក់ឌុប តាមមណ្ឌលប្រឡងនៅភ្នំពេញ និងខេត្តកំពង់ចាម ប្រមាណជិត ១០០នាក់។ លោក សន ជ័យ បន្តថា លោកសាទររាល់វិធានការរឹតបន្តឹងរបស់ក្រសួងអប់រំ។ ដូច្នេះលោកសង្ឃឹមថា ការចូលរួមសង្កេតការណ៍ជាចំណែកមួយលើកកម្ពស់គុណភាពប្រឡង។
លោក សន ជ័យ បានឲ្យដឹងទៀតថា តាមរយៈការងារដែលពាក់ព័ន្ធលើការអប់រំ និងការចូលរួមសង្កេតការណ៍ប្រឡងកន្លងមកឃើញថា មានគ្រូ និងសិស្សមួយចំនួននៅតែមិនទាន់យល់ច្បាស់ពីនីតិវិធីប្រឡង បង្កឲ្យមានភាពមិនប្រក្រតីមួយចំនួន។ លោកថា ជាងនេះទៀត មានសិស្សនៅតាមបណ្ដាខេត្ត ពិសេសនៅដំបន់ដាច់ស្រយាល នៅតែខ្វះឯកសារ ការផ្សព្វផ្សាយមិនទាន់ទូលាយជុំវិញដំណើរការប្រឡងនៅឡើយ៖ « យើងមើលទៅឥរិយាបថរបស់បេក្ខជន នៅតែមានដាក់សំណៅឯកសារ។ ខ្ញុំចង់ឃើញក្រសួងរឹតបន្តឹងកុំឲ្យមានភាពរអាក់រអួលដូចមុន ធ្វើយ៉ាងណាឲ្យប្រសើរជាងមុន »។
ចំណែកឯប្រធានអង្គការតម្លាភាពកម្ពុជា លោក ព្រាប កុល ឲ្យដឹងថា ការប្រឡងកន្លងមក នៅតែមានអំពើពុករលួយមួយចំនួនជុំវិញការសូកលុយពីសំណាក់សិស្ស ដូចជាការប្រមូលលុយពីសិស្សជាដើម។ ដូច្នេះ លោកអាចនឹងទៅចូលរួមសង្កេតការណ៍ប្រឡងនេះជាលក្ខណៈឯកជន។ លោកសង្ឃឹមថា ការប្រឡងឆ្នាំនេះនឹងអាចកាត់បន្ថយអំពើពុករលួយប្រកបដោយតម្លាភាព និងសុចរិតភាព៖ « ក្រសួងគួរតែរឹតបន្តឹងការប្រឡងនេះជារៀងរហូត កុំឲ្យមានអំពើពុករលួយ មានភាពសុក្រឹត ដើម្បីឲ្យការសិក្សាអប់រំទូទៅកាន់តែប្រសើរឡើង។ នេះជាអ្វីដែលក្រសួងត្រូវតែបន្តធ្វើ »។
វិទ្យុអាស៊ីសេរី មិនអាចទាក់ទងលោក ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ ដើម្បីដឹងវិធានការរឹតបន្តឹង និងដាក់ចំនួនអ្នកសង្កេតការណ៍ប៉ុន្មាននាក់សម្រាប់ការប្រឡងបាក់ឌុប ឆ្នាំ២០១៦ នេះ បាននៅឡើយនៅថ្ងៃទី១១ ខែមិថុនា។
សេចក្ដីជូនដំណឹងរបស់អង្គភាពប្រឆាំងអំពើពុករលួយ ស្ដីពីការងារសង្កេតការណ៍ប្រឡងបាក់ឌុបនេះ ដែលបានចេញផ្សាយនៅថ្ងៃទី១០ ខែមិថុនា ឆ្នាំ២០១៦ បានអំពាវនាវឲ្យអ្នកស្ម័គ្រចិត្តជាសង្គមស៊ីវិល និងបុគ្គលឯកជននានា ឲ្យចុះឈ្មោះធ្វើជាអ្នកសង្កេតការណ៍ប្រឡងបាក់ឌុប ចាប់ពីថ្ងៃទី១ ដល់ថ្ងៃទី៣១ ខែកក្កដា ឆ្នាំ២០១៦ ដើម្បីបង្កភាពងាយស្រួលដល់ក្រសួងអប់រំ និងរឹតបន្តឹងគុណភាពអប់រំនៅកម្ពុជា កាន់តែប្រសើរឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។