ឪពុកម្តាយកម្មការិនីមួយរូប បានសុំឲ្យសមាជិកសភា និងអាជ្ញាធរមានសមត្ថកិច្ច ជួយស្រាវជ្រាវរកកូនស្រីដែលទៅធ្វើការនៅប្រទេសម៉ាឡេស៊ី ហើយបាត់ខ្លួន។ គ្រួសារជនរងគ្រោះដែលរស់នៅខេត្តកំពង់ធំ អះអាងថា កូនស្រីឈ្មោះ កែម ចន្ទី ទៅធ្វើការនៅប្រទេសម៉ាឡេស៊ី តាមរយៈក្រុមហ៊ុន វីស៊ី មេនផាវវើ (VC Manpower)។
ប្រធានរដ្ឋសភាកម្ពុជា បានចារលើលិខិតមួយច្បាប់របស់សមាជិកសភា បញ្ជូនឲ្យក្រសួងការងារ និងបណ្តុះបណ្តាលវិជ្ជាជីវៈ ជួយស្វែងរកកម្មការិនីមួយរូប ដែលបាត់ខ្លួននៅប្រទេសម៉ាឡេស៊ី ហើយគ្មានដំណឹងទាក់ទងជាមួយគ្រួសារតាំងពីឆ្នាំ២០១០។
លោក ម៉ែន សុថាវរិន្ទ្រ អ្នកតំណាងរាស្ត្រខេត្តកំពង់ធំ ជាអ្នកទទួលពាក្យប្ដឹងពីអាណាព្យាបាលកម្មការិនី កែម ចន្ទី ហើយសុំឲ្យអាជ្ញាធរជួយរកជនរងគ្រោះតាមរយៈប្រធានរដ្ឋសភា បានឲ្យដឹងថា លោកបានទទួលពាក្យប្ដឹងពីអាណាព្យាបាលកម្មការិនី កែម ចន្ទី កាលពីថ្ងៃទី២៧ សីហា អំពីការបាត់ដំណឹងកូនស្រីនោះ។
លោក ម៉ែន សុថាវរិន្ទ្រ៖ «ថ្ងៃមុនយើងធ្វើវេទិកាសេរីមួយនៅកំពង់ធំ ពលរដ្ឋនៅខាងប្រាសាទបល្ល័ង្គ នោះ គាត់បានមកប្ដឹង ព្រោះគាត់បាត់កូនគាត់។ នៅម៉ាឡេស៊ី ព្រោះគាត់បាត់កូនគាត់រហូត។ ប៉ុន្តែគាត់មានអត្តលេខមានឈ្មោះក្រុមហ៊ុនអីទាំងអស់។ ធម្មតាគាត់ទៅតាមក្រុមហ៊ុន អ៊ីចឹងមានអត្តលេខ អីបាន គេអាចស្រាវជ្រាវបានហើយ ព្រោះក្រុមហ៊ុននោះនៅសព្វថ្ងៃទេតើ។ គាត់បានទៅទាក់ទងដែរ តែគេអត់មានឆ្លើយ អ៊ីចឹងហើយបានគាត់បានមកជួបតំណាងរាស្ត្រ ប្រាប់ខ្ញុំ ហើយគាត់បានសំបុត្រមួយឲ្យជួយស្រាវជ្រាវ»។
កម្មការិនី កែម ចន្ទី មានអាយុ ១៦ឆ្នាំ មានស្រុកកំណើតនៅភូមិពាមអាទិត្យ ឃុំសាគ្រាម ស្រុកប្រាសាទបល្ល័ង្គ ខេត្តកំពង់ធំ។ នាងបានចេញទៅបម្រើការនៅប្រទេសម៉ាឡេស៊ី តាមរយៈក្រុមហ៊ុន វីស៊ី មេនផាវវើ កាលពីថ្ងៃទី១ ខែសីហា ឆ្នាំ២០១០ ហើយមានលេខកូដសម្គាល់ខ្លួន ២៧៦៧។ ឪពុកម្តាយបានអះអាងថា តាំងពីនាងចេញទៅធ្វើការនៅបរទេសមកទល់បច្ចុប្បន្ន គ្រួសារពុំដែលបានទទួលដំណឹងពីកូនស្រីសោះ។
វិទ្យុអាស៊ីសេរី មិនអាចទាក់ទងមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងតំណាងក្រុមហ៊ុន វីស៊ី មេនផាវវើ បានទេ នៅថ្ងៃទី៨ តុលា ដើម្បីសាកសួរអំពីការបាត់ខ្លួនកម្មការិនីនេះ។
ប៉ុន្តែ ប្រធានសមាគមទីភ្នាក់ងារជ្រើសរើសពលករកម្ពុជា លោក អន ប៊ុនហាក់ មានប្រសាសន៍ថា លោកមានជំនឿថា គេអាចរកកម្មការិនីដែលបាត់ខ្លួននេះឃើញតាមរយៈក្រុមហ៊ុន និងទិន្នន័យទំនាក់ទំនង ដែលរក្សាទុកនៅក្រសួងការងារ និងបណ្តុះបណ្តាលវិជ្ជាជីវៈ៖ «គឺយើងមានប្រព័ន្ធទិន្នន័យដើម្បីរក គឺរកឃើញនិយោជកហើយ យើងអាចទំនាក់ទំនង ពីព្រោះនៅក្នុងប្រព័ន្ធទិន្នន័យនោះ ពេលមាននិយោជក គឺមានលេខទូរស័ព្ទរបស់ថៅកែហ្នឹងហើយ។ អ៊ីចឹងយើងអាចទំនាក់ទំនងបាន មិនបាត់ទៅណាទេ យើងអាចរកឃើញហើយ ឲ្យគាត់ទំនាក់ទំនងឡើងវិញបាន»។
ពលករកម្ពុជាជាច្រើនម៉ឺននាក់ បានទៅបំពេញការងារនៅប្រទេសម៉ាឡេស៊ី ប៉ុន្តែមានរបាយការណ៍ជាច្រើនបានឲ្យដឹងថា ប្រទេសម៉ាឡេស៊ី ជាប្រទេសមួយដែលធ្វើបាបពលករខ្មែរធ្វើការតាមផ្ទះជាច្រើនករណី រហូតដល់រដ្ឋាភិបាលកម្ពុជា បានប្រកាសផ្អាកបញ្ជូនពលករទៅធ្វើការនៅប្រទេសនេះ កាលពីខែតុលា ឆ្នាំ២០១១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។