សភាពាណិជ្ជកម្មកម្ពុជា និងសម្ព័ន្ធសមាគមសហគ្រាសធុនតូច និងមធ្យម បានបើកពិព័រណ៍ឧស្សាហកម្ម និងសិប្បកម្ម អែស.អិម.អ៊ី (SME) លើកទី៤ រយៈពេល ៣ថ្ងៃ ពីថ្ងៃទី២៨ ដល់ថ្ងៃទី៣០ នៅមជ្ឈមណ្ឌលកោះពេជ្រ។ ការរៀបចំពិព័រណ៍នេះ គឺដើម្បីលើកស្ទួយផ្នែកឧស្សាហកម្ម សិប្បកម្ម សេវាកម្ម និងផលិតផលស្នាដៃខ្មែរ ឆ្ពោះទៅប្រកួតប្រជែងទីផ្សារជាតិ និងអន្តរជាតិ។
សភាពាណិជ្ជកម្មកម្ពុជា និងសម្ព័ន្ធសមាគមសហគ្រាសធុនតូច និងមធ្យម បានបើកពិព័រណ៍ឧស្សាហកម្ម និងសិប្បកម្ម ដែលជាស្នាដៃកូនខ្មែរ មកដាក់តាំងបង្ហាញជាង ១០០ស្តង់ ក្នុងបំណងលើកកម្ពស់ផលិតផលខ្មែរ និងផ្សព្វផ្សាយទៅទីផ្សារអន្តរជាតិ។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងនៅសាលពិព័រណ៍កោះពេជ្រ នៅថ្ងៃទី២៨ មីនា ថា នេះជាឱកាសដ៏កម្រដើម្បីផ្សព្វផ្សាយផលិតផលខ្មែរដល់ពលរដ្ឋក្នុងប្រទេស និងក្រៅប្រទេស ស្របពេលដែលផលិតផលរបស់ខ្មែរ ដូចជា អង្ករ នំស្រួយ នំកញ្ចប់ និងស្រាបៀ កំពុងនាំចេញទៅទីផ្សារបរទេសជាបន្តបន្ទាប់ ដូចជាប្រទេសជប៉ុន និងកាណាដា ជាដើមនោះ។ លោកថា ស្ថាប័នពាក់ព័ន្ធកំពុងទាក់ទងពីអង្គការផ្សេងៗ ឲ្យជួយបណ្ដុះបណ្ដាលវិជ្ជាជីវៈបន្ថែមទៀតដល់សិប្បករខ្មែរ ដើម្បីទទួលបានបច្ចេកទេសថ្មីៗ ឲ្យស្របនឹងការចង់បានពីទីផ្សារក្រៅស្រុក។
លោក ចម ប្រសិទ្ធ៖ «ការតាំងពិព័រណ៍នេះជាកិច្ចការមួយដែលយើងត្រូវធ្វើ ដើម្បីឲ្យគេស្គាល់ អែស.អិម.អ៊ី របស់យើង ពីផលិតផលរបស់យើង បើកាលណាយើងអត់តាំងពិព័រណ៍ទេ គ្មាននរណាគេស្គាល់ផលិតផលរបស់យើងទេ ទោះជាផលិតផលរបស់យើងល្អប៉ុណ្ណាក៏ដោយ។ អ៊ីចឹងហើយការតាំងពិព័រណ៍នេះ គឺជាឱកាសដើម្បីឲ្យអ្នកដែលផលិតផលិតផលផ្សេងៗ អាចដាក់តាំងផលិតផលរបស់ខ្លួនឯងផង រកដៃគូដើម្បីផលិតបន្តទៅទៀតផង។ ហើយនឹងជាឱកាសឲ្យសាធារណជនយើងបានស្គាល់ផលិតផលក្នុងប្រទេស និងអាចយកជៀវផង»។
លោក សួស សារ៉ន ជាសិប្បករធ្វើក្ដារបន្ទះពីថ្នាំងឫស្សី មកពីខេត្តព្រៃវែង ដែលបានចូលរួមតាំងពិព័រណ៍ស្នាដៃរបស់គាត់ដែរនោះ មានប្រសាសន៍ថា លោកបានទទួលការលើកទឹកចិត្តខ្លះដែរពីស្ថាប័នពាក់ព័ន្ធរដ្ឋាភិបាល ក្នុងការជ្រោមជ្រែងលើកកម្ពស់ស្នាដៃដែលផុសចេញពីការច្នៃប្រឌិតរបស់កូនខ្មែរ គ្មានការលួចចម្លង។ លោកថា ផលិតផលរបស់លោកមានលក្ខណៈពិសេសក្នុងគោលដៅការពារបរិស្ថាន ជៀសវាងការកាប់បំផ្លាញឈើប្រណីត ព្រោះលោកអាចកែច្នៃឫស្សីមកផលិតជា តុ ទូ កៅអី ទ្វារ ដែលមានតួនាទីជំនួសឈើប្រណីតបាន។
លោក សួស សារ៉ន៖ «បោះរង្វាន់មិនបានឃើញទេណា តែបានឃើញថារដ្ឋាភិបាលគាត់ណែនាំបណ្ដាអង្គការអន្តរជាតិនោះ គាត់ចុះមកស្រាវជ្រាវមើលឫស្សីមានស្អីខ្លះ គាត់ចុះទៅហៅឈ្មោះអ៊ំចូលមក។ ជាពិសេស អង្គការមានស្នាក់ការធំនៅហូល្លង់ដ៍ អន្តរជាតិសម្រាប់សិប្បកម្មហ្នឹង គាត់ចុះមកជួយគ្នាមាន ៣ប្រទេស មានខ្មែរ មានវៀតណាម មានឡាវ ស្នាក់ការធំរបស់សិប្បកម្មនេះ គឺនៅវៀតណាម ដល់ហើយគាត់ចុះមកមើល ហើយគាត់បើកសិក្ខាសាលាអីញឹកញាប់ណាស់ ហើយគេចុះមកសម្ភាសយើង គេថតយករបស់យើងបញ្ចូលក្នុងកម្មវិធីរបស់យើងហ្នឹង យើងមានទឹកចិត្តហើយ»។
ពិព័រណ៍ឧស្សាហកម្ម និងសិប្បកម្ម អែស.អិម.អ៊ី លើកទី៤ នាឆ្នាំ២០១៤ នេះ គឺបានកំណត់យកផលិតផល និងសេវាកម្មដែលមានមូលដ្ឋានផលិត ដំឡើង និងវេចខ្ចប់ និងកែច្នៃបន្តនៅក្នុងប្រទេស មកតាំងបង្ហាញចំនួន ១៨០ស្តង់ ដែលក្នុងនោះមានស្តង់ផលិតផល និងសេវាកម្មខ្មែរមាន ១៣០ស្តង់។ ផលិតផលដែលគេដាក់លក់ និងតាំងបង្ហាញលើកនេះ មានដូចជា ចំណីអាហារ ផ្លែឈើ ភេសជ្ជៈ គ្រឿងសង្ហារិម និងសម្លៀកបំពាក់ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។