តំណាងភាគីពាក់ព័ន្ធដែលមានក្រសួងការងារ កម្មករ និយោជក សហជីព តំណាងគណៈកម្មការប្រាក់ឈ្នួល និងតំណាងគណៈកម្មការប្រឹក្សាការងាររបស់រដ្ឋាភិបាល រួមទាំងសង្គមស៊ីវិល គឺអង្គការអន្តរជាតិខាងការងារ អាយឡូ (ILO) បានជួបប្រជុំគ្នារិះរកវិធីសាស្ត្រដំឡើងប្រាក់ឈ្នួលឲ្យកម្មករនៅពេលខាងមុខ។
តំណាងភាគីពាក់ព័ន្ធក្នុងវិស័យការងារ បានបើកកិច្ចពិគ្រោះយោបល់មួយ ដើម្បីស្វែងរកមតិយោបល់ពីត្រីភាគី ដើម្បីកំណត់ប្រាក់ឈ្នួលជូនកម្មករកាត់ដេរឲ្យមានលក្ខណៈរឹងមាំ ដោយប្រើប្រាស់ទិន្នន័យដែលបានពីការសិក្សាតាមលក្ខណៈវិទ្យាសាស្ត្រ។
អ្នកសម្របសម្រួលថ្នាក់ជាតិនៃអង្គការអន្តរជាតិខាងការងារ ប្រចាំប្រទេសកម្ពុជា ហៅកាត់ថា អាយឡូ លោក ទុន សុភ័ណ បានថ្លែងនៅថ្ងៃទី២៤ មេសា ថា ក្រសួងការងារ ដែលមានការឧបត្ថម្ភពីអង្គការអាយឡូ បានរៀបចំសិក្ខាសាលាពិគ្រោះយោបល់ត្រីភាគីថ្នាក់ជាតិមួយជាលើកដំបូង ស្ដីពីការពង្រឹងដំណើរការនៃការកំណត់ប្រាក់ឈ្នួលអប្បបរមានៅកម្ពុជា រយៈពេល២ថ្ងៃ ដើម្បីប្រមូលមតិយោបល់ពីតំណាងភាគីពាក់ព័ន្ធ ដែលមានក្រសួងការងារ តំណាងកម្មករ និយោជក សហជីព តំណាងគណៈកម្មការប្រាក់ឈ្នួល ដាក់ជូនគណៈកម្មការប្រឹក្សាការងារ ដើម្បីកសាងនូវប្រព័ន្ធកំណត់ប្រាក់ឈ្នួលមួយដែលមានលក្ខណៈសមស្របរឹងមាំ និងតាមលក្ខណៈវិទ្យាសាស្ត្រ ឲ្យកម្មករក្នុងវិស័យកាត់ដេរនៅថ្ងៃអនាគត។ ប៉ុន្តែ លោកអះអាងថា គួរឲ្យសោកស្ដាយដែលតំណាងខាងនិយោជកអវត្តមាន។
«សំឡេង»
ទាក់ទងករណីនេះ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ថា នៅពេលទទួលបានយោបល់នៃការដំឡើងប្រាក់ឈ្នួលដែលមានទាំងបទពិសោធន៍ពីបរទេសផងនោះ នឹងដាក់ជូនគណៈកម្មការប្រឹក្សាការងារ ដែលគណៈកម្មការនេះនឹងជ្រើសយកអ្វីដែលត្រូវនឹងបរិបទនៃប្រទេសកម្ពុជា។ ក្នុងជំនួបនេះ អាចនឹងជួយដល់បរិយាកាសនៃការចរចាក្នុងពេលខាងមុខ និងធ្វើឲ្យភាគីពាក់ព័ន្ធយល់ដឹងពីចំណេះដឹងទូទៅ អំពីគោលការណ៍នៃការដំឡើងប្រាក់ឈ្នួល។
«សំឡេង»
ទាក់ទងនឹងកិច្ចពិគ្រោះយោបល់នេះ ខាងសហជីពបានសម្ដែងការគាំទ្រ ប៉ុន្តែសុំឲ្យដោះស្រាយបញ្ហាបន្ទាន់ៗមួយចំនួនសិន។
ប្រធានសម្ព័ន្ធសហជីពកម្មករកាត់ដេរកម្ពុជា ហៅកាត់ថា ស៊ីខាវឌូ លោក អាត់ ធន់ ដែលបានចូលរួមក្នុងកិច្ចពិគ្រោះយោបល់នោះ មានប្រសាសន៍ថា បើសិនជាអនុវត្តក្នុងការដំឡើងប្រាក់ឈ្នួលឲ្យកម្មករ ដោយផ្អែកលើមូលហេតុសេដ្ឋកិច្ច និងសង្គមដូច្នេះនោះ រាល់ការសម្រេចដំឡើងប្រាក់ឈ្នួលលើកក្រោយៗ នឹងមិនមានការតវ៉ាទៀតទេ។ ប៉ុន្តែក្នុងពេលបច្ចុប្បន្ននេះ អ្វីដែលជាបញ្ហាចម្បង គឺស្នើឲ្យរដ្ឋាភិបាល តុលាការពិនិត្យពិចារណាដោះស្រាយចំពោះអ្នកជាប់ពន្ធនាគារទាំង ២៣នាក់ ដោយសារតែការតវ៉ាដំឡើងប្រាក់ឈ្នួល ១៦០ដុល្លារកាលពីដើមឆ្នាំនេះ។
«សំឡេង»
កាលដើមឆ្នាំ២០១៤ រដ្ឋាភិបាលបានសម្រេចដំឡើងប្រាក់ឈ្នួលគោលឲ្យកម្មករចំនួន ១០០ដុល្លារក្នុងមួយខែ ដែលបានអនុវត្តផ្ដល់ឲ្យចាប់ពីខែកុម្ភៈ។ ប៉ុន្តែក្រោយការសម្រេចភ្លាមៗ កម្មករបានផ្ទុះកូដកម្មតវ៉ាស្ទើរគ្រប់ខេត្តក្រុង ទាមទារ ១៦០ដុល្លារក្នុងមួយខែ ដែលបានក្លាយជាការតវ៉ាទ្រង់ទ្រាយធំ និងមានការបង្ក្រាបពីកងកម្លាំងរដ្ឋាភិបាល ធ្វើឲ្យស្លាប់ ៥នាក់ របួសជិត ៤០នាក់ និងចាប់ខ្លួន ២៣នាក់ ហើយដោះលែងអោយនៅក្រៅឃុំ ២នាក់។ កន្លងមកនេះ សហជីពបានទាមទារឲ្យរដ្ឋាភិបាល និងនិយោជក ដំឡើងប្រាក់ឈ្នួលអប្បបរមាជូនកម្មករឲ្យដល់ ១៦០ដុល្លារក្នុងមួយខែ នៅខែមិថុនា ឆ្នាំ២០១៤ នេះ ប៉ុន្តែពុំមានការឆ្លើយតបពីរដ្ឋាភិបាល និងនិយោជកនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។