សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក នឹងចាប់ផ្ដើមធ្វើយុទ្ធនាការថ្មីមួយឈ្មោះថា "ផ្លូវឆ្ពោះទៅមាតុភូមិ" មានន័យថា សហព័ន្ធខ្មែរកម្ពុជាក្រោម នឹងអំពាវនាវពលរដ្ឋនៅកម្ពុជា និងតាមបណ្ដាប្រទេសជាច្រើនទៀតនៅលើពិភពលោក ឲ្យធ្វើដំណើរទៅទឹកដីកម្ពុជាក្រោម ដែលបច្ចុប្បន្នកំពុងគ្រប់គ្រងដោយវៀតណាម ដើម្បីជាការលើកទឹកចិត្តខ្មែរក្រោម និងផ្សារភ្ជាប់ទំនាក់ទំនងខ្មែរក្រោម និងពលរដ្ឋខ្មែរឡើងវិញ។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម អះអាងថា សម្រាប់ខួបបាត់បង់ទឹកដីខ្មែរកម្ពុជាក្រោម លើកទី៦៥ឆ្នាំនេះ សហព័ន្ធខ្មែរកម្ពុជាក្រោម បានសម្រេចធ្វើយុទ្ធនាការជំហានទី១ ធ្វើឲ្យពលរដ្ឋទូទាំងពិភពលោក បានយល់ដឹងពីខ្មែរកម្ពុជាក្រោម។ ហើយសម្រាប់ជំហានទី២ នឹងធ្វើឲ្យខ្មែរកម្ពុជាក្រោម កំពុងរស់នៅប្រទេសវៀតណាម មានភាពស្និទ្ធស្នាលនឹងពលរដ្ឋខ្មែរទូទៅ៖ «ទៅកាន់មាតុភូមិបានន័យយ៉ាងម៉េច គឺខ្មែរក្រោម ទាំងខ្មែរ ត្រូវបំផុសបំផុលចលនានេះ។ ឧទាហរណ៍ ព្រះសង្ឃនិមន្តទៅកម្ពុជាក្រោម ទៅវត្តនៅកម្ពុជាក្រោម។ យួន មកខ្មែរបាន ខ្មែរទៅកម្ពុជាក្រោមឲ្យបានរាប់លាននាក់»។
សហព័ន្ធខ្មែរកម្ពុជាក្រោម ក៏នឹងផ្ដោតលើយុទ្ធនាការផ្សព្វផ្សាយព័ត៌មានស្ដីពីខ្មែរកម្ពុជាក្រោម ទៅប្រទេសសមាជិកអាស៊ាន ឲ្យស្វែងយល់កាន់តែច្បាស់ថែមទៀត ចំពោះពលរដ្ឋខ្មែរកម្ពុជាក្រោម។ លោកបន្តថា យុទ្ធនាការទាំងប៉ុន្មាន នឹងធ្វើឡើងដោយអហិង្សា និងមិនបណ្ដាលឲ្យអាជ្ញាធរកម្ពុជា និងវៀតណាម គាបសង្កត់បន្ថែមទៀតលើពលរដ្ឋខ្មែរកម្ពុជាក្រោម ទាំងរស់នៅវៀតណាម និងកម្ពុជា។
សម្រាប់ខួបលើកទី៦៥ឆ្នាំនេះ ពលរដ្ឋខ្មែរកម្ពុជាក្រោមរស់នៅសហរដ្ឋអាមេរិក កាណាដា និងប្រទេសមួយចំនួនទៀតនៅអឺរ៉ុប ក៏នឹងចូលរួមទិវារំឭកខួប៦៥ឆ្នាំនេះ។ ដោយឡែកសហគមន៍ខ្មែរកម្ពុជាក្រោមនៅកម្ពុជា វិញ បានប្រារព្ធខួប៦៥ឆ្នាំ កាលពីថ្ងៃទី៤ មិថុនា ក្រោយការគាបសង្កត់របស់អាជ្ញាធរកម្ពុជា ដោយមិនអនុញ្ញាតឲ្យសមាគមទាំងនោះ ធ្វើពិធីនៅទីធ្លាសាធារណៈឡើយ។ ទោះបីជាយ៉ាងណាក៏ដោយ យុវជនខ្មែរកម្ពុជាក្រោម ដែលរស់នៅកម្ពុជា សម្ដែងការកាន់ទុក្ខថ្ងៃបាត់បង់ទឹកដីកម្ពុជាក្រោម តាមបណ្ដាញសង្គមហ្វេសប៊ុក (facebook) និងសកម្មភាពផ្សេងៗទៀតនៅកន្លែងសាធារណៈ។
លោក ថាច់ ង៉ុកថាច់ អះអាងថា ភាពផុសផុលឡើងរបស់យុវជនខ្មែរកម្ពុជាក្រោម កើតឡើងបន្ទាប់ពីសហព័ន្ធខ្មែរកម្ពុជាក្រោម ប្រើប្រាស់រយៈពេលជាច្រើនឆ្នាំ បណ្តុះបណ្តាលពីបញ្ហាសិទ្ធិមនុស្ស និងសិទ្ធិជនជាតិដើម ដើម្បីឲ្យខ្មែរកម្ពុជាក្រោម មានសិទ្ធិសម្រេចវាសនាខ្លួនឯង៖ «ខ្មែរកម្ពុជាក្រោមឥឡូវមិនដូចកាលពីមុនទេ ជំនាន់មុនប្រើកំហឹង និងមានការញុះញង់ កើតឡើងកាលពីឆ្នាំ១៩៧០ និងឆ្នាំ១៩៨០។ ឥឡូវពលរដ្ឋខ្មែរក្រោមយល់ច្បាស់ថា អ្វីទៅជាសិទ្ធិជាម្ចាស់ស្រុក»។
អាណានិគមបារាំង បានកាត់ទឹកដីកម្ពុជាក្រោមចំនួន ២១ខេត្តក្រុង ដែលមានផ្ទៃដីទំហំជាង ៦ម៉ឺន ៨ពាន់គីឡូម៉ែត្រក្រឡា (៦៨.៩៦៥គីឡូម៉ែត្រក្រឡា) ទៅឲ្យវៀតណាម កាន់កាប់ខុសច្បាប់ ដោយគ្មានការឯកភាពយល់ព្រមពីពលរដ្ឋខ្មែរក្រោម កាលពីថ្ងៃទី៤ ខែមិថុនា ឆ្នាំ១៩៤៩។ គិតត្រឹមថ្ងៃទី៤ ខែមិថុនា ឆ្នាំ២០១៤ នេះ គឺមានរយៈពេល ៦៥ឆ្នាំគត់ ដែលខ្មែរកម្ពុជាក្រោមជាង ១០លាននាក់ ជាម្ចាស់ទឹកដីម្ចាស់ស្រុក បានរស់នៅក្រោមការគ្រប់គ្រងរបស់វៀតណាម។
មន្ត្រីនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាន់ថុង កាលពីថ្ងៃព្រហស្បតិ៍ ទី៥ មិថុនា ស្វាគមន៍ចំពោះយុទ្ធនាការផ្សារភ្ជាប់ពលរដ្ឋខ្មែរកម្ពុជាក្រោម និងពលរដ្ឋខ្មែរនៅលើពិភពលោក ប៉ុន្តែព្រមានថា ប្រសិនបើយុទ្ធនាការធ្វើឡើងដើម្បីញុះញង់ខ្មែរក្រោមប្រឆាំងនឹងរដ្ឋាភិបាលវៀតណាម នោះអាជ្ញាធរវៀតណាម នឹងចាត់វិធានការតាមផ្លូវច្បាប់៖ «បងប្អូនទាំងជនជាតិអាមេរិក ថៃ បារាំង កម្ពុជា និងឡាវ ទៅវៀតណាម អញ្ជើញទៅវៀតណាម ក្នុងចំណងមិត្តភាពទំនាក់ទំនងធម្មតាទេ។ ប៉ុន្តែទៅវៀតណាម ដើម្បីល្មើសច្បាប់វៀតណាម ឬច្បាប់អន្តរជាតិ វៀតណាម នឹងដោះស្រាយតាមច្បាប់»។
ពាក់ព័ន្ធនឹងបញ្ហាទឹកដីវិញ លោក ត្រឹង វ៉ាន់ថុង អះអាងផ្ទុយនឹងអ្នកប្រវត្តិសាស្ត្រថា បារាំង មិនបានកាត់ទឹកដីខ្មែរក្រោម ឲ្យវៀតណាម ទេ ប៉ុន្តែទឹកដីខ្មែរកម្ពុជាក្រោម ជាទឹកដីវៀតណាម តាំងពីយូរយារណាស់មកហើយ៖ «ព័ត៌មានបាត់បង់ទឹកដីគ្មានអ្វីជាមូលដ្ឋានទេ គ្មានអ្វីជាភស្តុតាងទេ»។
លោក ត្រឹង វ៉ាន់ថុង បន្ថែមទៀតថា ខ្មែរកម្ពុជាក្រោម ជាជនជាតិដើមមួយក្នុងចំណោមជនជាតិ៥៣ផ្សេងទៀត ដែលរស់នៅទឹកដីវៀតណាម ហើយថា វៀតណាម គោរពសិទ្ធិមនុស្សជនជាតិដើមទាំងអស់។ ទោះបីជាយ៉ាងណាក៏ដោយ ខ្មែរកម្ពុជាក្រោមនៅតែបន្តទទួលរងការធ្វើទុក្ខបុកម្នេញពីអាជ្ញាធរវៀតណាម។
កាលពីឆ្នាំ២០១៣ តុលាការវៀតណាម បានកាត់ទោសព្រះសង្ឃពីរអង្គ និងពលរដ្ឋខ្មែរក្រោមពីរនាក់ផ្សេងទៀត ឲ្យជាប់ពន្ធនាគារពី ១០ខែទៅ ៦ឆ្នាំ ដោយចោទពីបទបំផ្លាញសណ្ដាប់ធ្នាប់សាធារណៈ និងរត់ទៅក្រៅប្រទេស ដើម្បីប្រឆាំងរដ្ឋាភិបាលវៀតណាម។ ប៉ុន្តែអង្គការសមាគមខ្មែរកម្ពុជាក្រោម អះអាងថា តុលាការវៀតណាម កាត់ទោសព្រះសង្ឃ និងពលរដ្ឋខ្មែរក្រោមទាំងនោះ ដោយសារតែបាននាំគ្នាតវ៉ាឲ្យមានការសាងសង់សាលារៀនភាសាខ្មែរ ក្នុងវត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។